வேதாரண்யேஸ்வரர் கோவிலில் புதிய தேர் திருப்பணி அமைச்சர் ஜெயபால் தொடங்கி வைத்தார்

வேதாரண்யம் வேதாரண்யேஸ்வரர் கோவிலில் புதிய தேர் அமைப்பதற்கான திருப்பணியை அமைச்சர் ஜெயபால் தொடங்கி வைத்தார்.

புதிய தேர் திருப்பணி

வேதாரண்யம் வேதாரண்யேஸ்வரர் திருக்கோவில் மூர்த்தி, தலம், தீர்த்தம் ஆகிய மூன்றிலும் சிறப்பு பெற்றது. மூடி கிடந்த இக்கோவில் கதவை அப்பரும், சம்மந்தரும் தேவார பதிகங்கள் பாடி கதவு திறந்து பின் மூடியதாக வரலாறு. அகத்திய முனிவருக்கு சிவபெருமான் திருமண கோலத்தில் காட்சி அளித்த தலம். இப்படி பல சிறப்புகள் பெற்ற இக்கோவிலில் ஆண்டு தோறும் மாசி மாதத்தில் 28 நாட்கள் மாசி மக உற்சவம் நடைபெறுவது வழக்கம். இதில் தியாகராஜசுவாமி மற்றும் விநாயகர், சுப்பிரமணியன், அம்மன், சண்டிகேஸ்வரர் ஆகிய சாமிகள் ஐந்து தேர்களில் எழுந்தருளுவார்கள். இதை காண பல்லாயிரக் கணக்கான மக்கள் கூடுவார்கள். இப்படி சிறப்பாக நடைபெற்ற தேரோட்டம் 1958-ம் ஆண்டோடு நின்று விட்டது. அதன் பின் தேர் திருவிழா நடைபெறவில்லை. தொடர்ந்து தேரும் பழுதாகி அதிலுள்ள மரங்கள், சிற்பங்கள் திருட்டு போயின. இதை அறிந்த கோவில் நிர்வாகம் தேரை அடியோடு பிரித்து அதில் மீதமிருந்த சிற்பங்களை எடுத்து கோவிலில் பாதுகாப்பாக வைத்துள்ளனர்.

அமைச்சர் தொடங்கி வைத்தார்

புதிதாக தேர் செய்து தேர் திருவிழா நடத்த தமிழக அரசு 2006-ம் ஆண்டு ரூ.10 லட்சம் நிதியுதவி அளித்தது. மற்ற செலவினங்களுக்கு பொதுமக்களிடம் நிதிவசூல் செய்து தேர் செய்ய ஏற்பாடு செய்யப்பட்டது. தேர் திருப்பணி செய்ய மொத்த செலவு தொகை ரூ. 39 லட்சத்து 80 ஆயிரம் நிர்ணயிக்கப்பட்டுள்ளது.

இந்த நிலையில் புதிய தேர் செய்ய டெண்டர் விடப்பட்டு தேர் திருப்பணி தொடக்க விழா நேற்று காலை வேதாரண்யம் வேதாரண்யேஸ்வரர் கோவிலில் நடைபெற்றது. விழாவிற்கு இந்து சமய அ
நிலையத்துறை இணை ஆணையர் இளங்கோ முன்னிலை வகித்தார். கோவிலில் பஞ்சமூர்த்திகளுக்கு அபிசேக ஆராதனைகள் நடைபெற்று சிறப்பு தீபாராதனைக்கு பின் திருத்தேர் திருப்பணியை அமைச்சர் ஜெயபால் தொடங்கி வைத்தார். நிகழ்ச்சியில் கலெக்டர் முனுசாமி, மயிலாடுதுறை பாராளுமன்ற உறுப்பினர் ஓ.எஸ்.மணியன், முன்னாள் அமைச்சர் ஜீவானந்தம், சட்டமன்ற உறுப்பினர் என்.வி.காமராஜ், ஊராட்சி ஒன்றியக்குழுத்தலைவர் சுசீலாதேவி சரவணன், நகர்மன்ற தலைவர் மலர்கொடி நமசிவாயம், மாவட்ட ஊராட்சி உறுப்பினர்கள் ரவிச்சந்திரன், ராஜகுமாரி ஐயப்பன், உதவி ஆணையர் சிவராம்குமார் மற்றும் பலர் கலந்து கொண்டனர். முன்னதாக மீன்வளத்துறை அமைச்சர் ஜெயபாலை கோவில் செயல் அலுவலர் அரசுமணி வரவேற்றார்.