இறைவன் அருவமா, உருவமா, அருவுருவமா?

**சாமி** · **சாமி** Mon Jun 25, 2012 11:04 pm

இறைவன் அருவமா, உருவமா, அருவுருவமா என்ற கேள்வி தொன்றுத் தொட்டே கேட்கப்பட்டு வருகிறது. அவன் மூன்றுமாய் இருக்கிறான் என்பது சைவசித்தாந்தம் கூறும் விடை ஆகும்.

அருவமோ உருவா ரூபம் ஆனதா அன்றி நின்ற
உருவமோ உரைக்கும்கர்த்தா வடிவெனக் குணர்த்திங் கென்னில்
அருவமும் உருவா ரூபம் ஆனதும் அன்றி நின்ற
உருவமும் மூன்றும் சொன்ன ஒருவனுக் குள்ள வாமே
என்பது சிவஞான சித்தியார் பாடல்.

அருவமான ஆண்டவனை நம் மனம் பற்றாது. மனம் பற்றுவதற்கு உருவம் வேண்டும். எனவே அருவமான ஆண்டவன் நம்மனம் பற்றிய உருவம் எதுவோ அவ்வுருவில் நின்று அருள்புரிவான் என்பது சித்தாந்தம்.

ஆரொருவார் உள்குவார் உள்ளத்துள்ளே
அவ்வுருவாய் நிற்கின்ற அருளும் தோன்றும்
என்பது அப்பர் இதுபற்றிக் கூறுகிற விளக்கம்.

மலர்மிசை ஏகினான் மாணடி சேர்ந்தார்
நிலமிசை நீடு வாழ்வார்
என்ற குறளில் ஏகினான் என வரும் சொல்லுக்கு உரை வரைந்த பரிமேலழகர், அன்பால் நினைவோரது உள்ளக்கமலத்தின்கண் அவர் நினைந்த வடிவோடு விரைந்து சேறலின் ‘ஏகினான்’ என இறந்தகாலத்தால் கூறினார்’ என்று உரை கூறியதும் இக்கருத்தை ஒட்டியதே.

அன்பால் நினைக்கின்றவர் எந்த உருவில் நினைத்தாலும் கடவுள் அவ்வுருவில் வருவார் என்பதால் எந்தெந்த உருவில் எவ்வெவ் சமயம் கடவுளை வணங்குகிறதோ அவ்வச் சமயங்கள் எல்லாவற்றிற்கும் இது பொதுவானது காண்க. இதனால் திருக்குறளும், சைவசித்தாந்தமும் எல்லாச் சமயங்களுக்கும் பொது என்க.

ஆக, மனிதர்கள் உய்ய அருவமான இறைவன் மனிதர் மாட்டு உள்ள கருணையினால் உருவம் எடுக்கிறான். அருவத்திலிருந்து உருவம் நேரே வராது. அதனால் அதற்கு இடைப்பட்ட அருவுருவமும் அவன் கொள்கிறான். இவ்வாறு இறைவனுக்கு அருவம், அருவுருவம், உருவம் என்ற மூன்றுமாயிற்று.

(நன்றி: சிவனியமும் சால்பியமும் நூல்)

ஆரூரன் · ஆரூரன் Wed Jun 27, 2012 11:37 am

மனிதர்கள் உய்ய அருவமான இறைவன் மனிதர் மாட்டு உள்ள கருணையினால் உருவம் எடுக்கிறான். அருவத்திலிருந்து உருவம் நேரே வராது. அதனால் அதற்கு இடைப்பட்ட அருவுருவமும் அவன் கொள்கிறான்.

உண்மைக் கருத்து ! நன்றி !!

இறைவன் அருவமா, உருவமா, அருவுருவமா?

இறைவன் அருவமா, உருவமா, அருவுருவமா?

Re: இறைவன் அருவமா, உருவமா, அருவுருவமா?

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக