1,006 ஜோடிகளுக்கு திருமணம்: தங்குவது முதல் வீடு திரும்புவது வரை தடபுடல் ஏற்பாடு

**krishnaamma** · **krishnaamma** Thu Jun 14, 2012 12:06 pm

சென்னை: திருவேற்காட்டில், வரும் 18ம் தேதி, முதல்வர் தலைமையில், 1,006 ஜோடிகளுக்கு திருமணம் நடைபெற உள்ளது. இந்து சமய அறநிலையத் துறை சார்பில், வரும் 18ம் தேதி, 1,006 ஜோடிகளுக்கு, 29 வகை சீர் வரிசைப் பொருட்களுடன், இலவச திருமணங்கள் நடத்தி வைக்கப்பட உள்ளன. முதல்வர் தலைமையில் நடைபெற உள்ள, இந்த திருமணத்திற்காக, பிரமாண்ட பந்தல்கள் அமைக்கப்பட்டுள்ளன. இவற்றை அறநிலையத் துறை அமைச்சர் மற்றும் அதிகாரிகள் ஆய்வு செய்து, ஏற்பாடுகளை கவனித்து வருகின்றனர்.

மண்டபங்கள் பதிவு: தமிழகம் முழுவதுமுள்ள பல்வேறு பகுதிகளில் இருந்து வரும் ஜோடிகள், அவர்களது உறவினர்கள் தங்குவதற்காக பூந்தமல்லி, வேலப்பன் சாவடி, திருவேற்காடு, மதுரவாயல், வானகரம் ஆகிய பகுதிகளில், மொத்தம் 18 கல்யாண மண்டபங்கள் பதிவு செய்யப்பட்டுள்ளன. ஒரு மண்டபத்தில், இட வசதியைப் பொறுத்து, 70 முதல் 90 ஜோடிகள், உறவினர்களுடன் தங்க வைக்கப்பட உள்ளனர். சொந்த ஊர்களில் இருந்து அவர்கள் வருவதற்கு, 200க்கும் மேற்பட்ட பஸ்கள் ஏற்பாடு செய்யப்பட்டுள்ளன. திருமண மண்டபங்களில் தங்கும் ஜோடிகள், உறவினர்களுக்கு, உணவு ஏற்பாடு செய்து கொடுப்பது, அவர்களுக்கு வேண்டிய உதவிகளை செய்வதற்காக, ஒரு மண்டபத்திற்கு இரண்டு செயல் அலுவலர்கள் நியமிக்கப்பட்டுள்ளனர். 18ம் தேதி திருமணம் முடிந்த பிறகு, மதியம் தடபுடல் விருந்து பரிமாறப்பட உள்ளது.

சீர் வரிசையுடன்...: விருந்து முடிந்த பிறகு, ஜோடிகள் தாங்கள் வந்த பஸ்கள் மூலமாகவே, சீர் வரிசைப் பொருட்களுடன் சொந்த ஊருக்கு அனுப்பி வைக்கப்படுகின்றனர். மண்டபத்திற்கு வந்த பிறகு, திருமணம் முடிந்து, அவரவர் வீடுகளுக்கு செல்வது வரை, முழுமையாக பொறுப்பேற்றுக் கொண்டு வழிநடத்த வேண்டும் என்று, செயல் அலுவலர்களுக்கு, உயர் அதிகாரிகள் உத்தரவிட்டுள்ளனர். அதற்கேற்ப, சென்னையிலிருந்து பஸ்கள் புறப்பட்டு சொந்த ஊருக்குச் செல்வது வரை கண்காணித்து, தகவல் தெரிவிக்க வேண்டும் என்று அறிவுரை வழங்கப்பட்டுள்ளது. இதற்கான ஏற்பாடுகளில், அறநிலையத் துறை செயல் அலுவலர்கள் மும்முரமாக ஈடுபட்டுள்ளனர்.