புதுக்கோட்டையில் அமைச்சர்களுக்கு ரூ 185.18 சாப்பாடு அலவன்ஸ்!

புதுக்கோட்டை இடைத் தேர்தலில் யார் வெற்றி பெறுவார், யார் தோல்வியடைவார் என்பதில்ல் எந்த சந்தேகமும் கிடையாது என்றாலும், வேட்பாளர்கள் பணம் செலவு செய்யாமல் இருக்க முடியுமா? இதெல்லாம் ஒரு முதலீடுதானே, போட்டதை எடுத்து விடலாம்.

ஆனால் பாவம், இவர்களது சொந்த பணத்தை (பின்னாட்களில் மக்கள் வட்டியுடன் செலுத்துவார்கள்) செலவு செய்வதற்கேஈ தேர்தல் கமிஷன் ஆயிரம் கெடுபிடிகளை போடுகிறது. அந்த வகையில், புதுக்கோட்டை இடைத்தேர்தலில் போட்டியிடும், அ.தி.மு.க., தே.மு.தி.க., வேட்பாளர்கள் இருவருக்குமே, அனுமதிக்கப்பட்டதைவிட கூடுதலாக செலவு செய்துள்ளதாகக் கூறி, தேர்தல் நடத்தும் அலுவலர் நோட்டீஸ் அனுப்பியுள்ளார்.

புதுக்கோட்டை இடைத்தேர்தல் வேட்பாளர்கள் மூன்று முறை தங்களின் செலவுக் கணக்கை தாக்கல் செய்ய வேண்டும் என்று தேர்தல் கமிஷன் அறிவித்துள்ளது. கடந்த மாதம் 30-ம் தேதி அ.தி.மு.க., வேட்பாளர், 125,435 ரூபாய் செலவு செய்ததாகவும், தே.மு.தி.க. வேட்பாளர் 102,370 ரூபாய் செலவு செய்ததாகவும், கணக்கு தாக்கல் செய்துள்ளனர்.

அதை ஆய்வு செய்த தேர்தல் அதிகாரி முத்துமாரி, இரு வேட்பாளர்களுக்கும் தனித்தனியே, நோட்டீஸ் அனுப்பியுள்ளார். தேர்தல் அதிகாரிகள் மதிப்பீட்டின்படி, அ.தி.மு.க. வேட்பாளர், 721,922 ரூபாய் செலவு செய்ததாக குறிப்பிடப்பட்டுள்ளது.

அ.தி.மு.க. வேட்பாளர் கணக்கு காட்டியதைவிட, கூடுதலாக செலவு செய்த, 596,487 ரூபாய்க்கு, நோட்டீஸ் கிடைத்த 48 மணிநேரத்தில் விளக்கம் அளிக்க வேண்டும் என்று கூறப்பட்டுள்ளது. தே.மு.தி.க. வேட்பாளர் கணக்கு காட்டியதை விட கூடுதலாக செலவு செய்ததாக மதிப்பிடப்பட்ட, 90,033 ரூபாய்க்கு விளக்கம் அளிக்குமாறு கோரப்பட்டுள்ளது.

ஒரு வேட்பாளர் அதிகபட்சமாக செலவு செய்யக்கூடிய தொகை, 16 லட்ச ரூபாய் மட்டுமே என்று, தேர்தல் கமிஷன் நிர்ணயித்துள்ளது. தே.மு.தி.க. வேட்பாளர் ஜாகிர் உசேனுக்கு வேண்டுமானால் இது போதுமானதாக இருக்கலாம். ஆனால், அ.தி.மு.க. வேட்பாளர் கார்த்திக் தொண்டைமானுக்கு இந்தத் தொகை மூக்குப் பொடி போடவே போதாது.

தேர்தல் கமிஷன் இதோ, இப்படி ஒரு கணக்கை போட்டு பார்க்கலாம்.

புதுக்கோட்டை தொகுதிக்குள் 32 அமைச்சர்கள் வந்திருக்கிறார்கள். இந்த 32 அமைச்சரும் தலா 2 உதவியாளர்களுடன் மட்டும் வந்துள்ளார் என்று வைத்துக் கொள்ளுங்கள் (ஒவ்வொருவரும் ஊரில் இருந்து ஒரு கூட்டத்துடன் வந்து இறங்கியுள்ளார்கள். அது வேறு விஷயம். நாங்கள் ஒரு கணக்குக்கு, ஒரு அமைச்சருக்கு 2 உதவியாளர்கள் என்று வைத்துக் கொள்வோம்)

32 அமைச்சர்களுக்கும், 64 உதவியாளர்களுக்கும், 30 நாட்களுக்கு, 3 வேளை உணவு வழங்க வேண்டும் என்றால், மொத்தம் 8640 உணவு பார்சல்கள் தேவை. தேர்தல் கமிஷன் அனுமதித்த 16 லட்சம் ரூபாவை, அமைச்சர்களுக்கு உணவு வழங்க மட்டுமே ஒதுக்கினால்கூட, ஒரு சாப்பாட்டுக்கு ரூ 185.18 மட்டுமே செலவு செய்ய முடியும்.

தற்போதைய விலைவாசி தேர்தல் கமிஷனுக்கு தெரியுமா? ‘அமைச்சர் ஸ்பெஷல்’ மீல்ஸ் ஒன்றை ரூ 185.18-க்கு வாங்க முடியாது என்பது தேர்தல் கமிஷனுக்கு தெரியுமா? உணவுக்கே மொத்த பணமும் காலியாகி விட்டால், அப்புறம் அமைச்சர்களுக்கு, சோமபானம், தொட்டுக்க ஊறுகா எல்லாவற்றையும் தேர்தல் கமிஷனரா கொடுப்பார்?

இது மிகவும் தவறான ஒதுக்கீடு. ஆளுங்கட்சி வேட்பாளருக்கு தேர்தல் கமிஷன் ஒரு சலுகை வழங்க வேண்டும். தொகுதிக்குள் பம்பரமாக சுழன்றுவரும் அமைச்சர்களின் எண்ணிக்கைக்கு ஏற்றபடி, போனஸாக, அதிகபட்ச செலவுத் தொகை நிர்ணயிக்கப்பட வேண்டும்.

உதாரணமாக, பொது வேட்பாளருக்கு 16 லட்சம் ரூபா, பிரச்சாரத்துக்கு அமைச்சர்கள் வந்தால், தலைக்கு 10 லட்சம் போனஸ் தொகை. முதல்வர் வந்தால் 15 லட்சம் பம்பர் போனஸ் என்று, தேர்தல் கமிஷன் தமது சட்டத்தை மாற்றிக் கொள்ள வேண்டும். இல்லாவிட்டால், மேலே படத்தில் உள்ள நிலைமைதான் மூத்த அமைச்சருக்கு ஏற்படும்!

இடைத் தேர்தலில் அ.தி.மு.க.-வுக்கு எதிராக ஒரு கன்னுக்குட்டியை நிறுத்தினாலும், 32 அமைச்சர்கள் கதறிக்கொண்டு ஓடி வருவார்கள் என்று ஊரெல்லாம் கிண்டல் பேச்சு இருப்பது உண்மைதான். ஆனால், கன்னுக்குட்டிக்கு இருப்பதுபோலவே அமைச்சர்களுக்கும் வயிறு உள்ளது என்பதை தேர்தல் கமிஷன் உணர வேண்டும்.

விறுவிறுப்பு.காம்

மக்கள் பணத்தை மக்களுக்கு பயன் படுத்தாமல் அரசியல் ஆமைகள் தின்பது என்று முடிவு ஆகிவிட்டது - அதில் அந்த ஆமைகள் எவ்ளோ தின்னா என்ன?

பேசாம தேர்தல் கணிஷன் ஆட்களும் இந்த ஆளும் கட்சி ஆமைகளுடன் சேர்ந்தே விருந்து சாப்பிட்டா - இந்த பற்றாக் குறை வராமலிருக்கும் - பிரச்சினையும் இல்ல.