பெட்ரோல் விலை உயர்வு: இன்று முழு அடைப்பு போராட்டம்!

புதுடெல்லி/சென்னை:பெட்ரோல் விலை உயர்வை கண்டித்து
பா.ஜனதா உள்ளிட்ட எதிர்கட்சிகள் இன்று நடத்தும் முழு அடைப்பு
போராட்டத்திற்கு ஆதரவாக தமிழகத்தில் ஆட்டோக்கள் ஓடாது என்றும், கடைகள்
அடைக்கப்பட்டு இருக்கும் என்று அறிவிக்கப்பட்டுள்ளது.

பெட்ரோல் விலை லிட்டருக்கு ரூ.7.50 உயர்த்தப்பட்டதற்கு எதிர்ப்பு
தெரிவித்து மே 31 ம் தேதி (இன்று) நாடு தழுவிய முழு அடைப்பு போராட்டம்
நடத்தப்படும் என்று பா.ஜனதா தலைமையிலான தேசிய ஜனநாயக கூட்டணி அழைப்பு
விடுத்தது.

இந்த போராட்டத்திற்கு கம்யூனிஸ்டுகள் உள்ளிட்ட இடதுசாரி கட்சிகளும் ஆதரவு
தெரிவித்துள்ளன. இதன் காரணமாக நாளை நாடு முழுவதும் வேலை நிறுத்தம்
செய்வதற்கு அந்தந்த கட்சிகள் சார்பில் ஏற்பாடு மேற்கொள்ளப்பட்டு
வருகின்றன.இதற்கு பல்வேறு அமைப்புகளும் ஆதரவு அளிக்க முன் வந்துள்ளன.இந்த
முழு அடைப்பு போராட்டத்தையொட்டி ஆர்ப்பாட்டங்களும் நடைபெற உள்ளன.

தமிழ்நாட்டில் சி.ஐ.டி.யு.,ஏ.ஐ. டி.யு.சி.தொழிற்சங்கங்கள் மற்றும் பல்வேறு
அமைப்புகள் தமிழ்நாட்டில் முழு அடைப்புக்கு ஆதரவு தெரிவித்துள்ளன.எனவே
பெரும்பாலான தொழிலாளர்கள் வேலைக்கு செல்ல மாட்டார்கள்.பெரும்பாலான
கடைகளும் அடைக்கப்படும் என்று மார்க்சிஸ்ட் கம்யூனிஸ்ட் எம்.எல்.ஏ.
சவுந்தர்ராஜன் தெரிவித்தார்.

தமிழ்நாட்டில் நாளை ஆட்டோக்கள் ஓடாது என்று சி.ஐ.டி.யு. ஆட்டோ சங்க பொது
செயலாளர் மனோகரன், தமிழ்நாடு ஆட்டோ தொழிலாளர் சம்மேளன பொதுச்செயலாளர்
எம்.எஸ். ராஜேந்திரன் ஆகியோர் தெரிவித்துள்ளனர்.இதன்படி இன்று காலை 6 மணி
முதல் மாலை 6 மணி வரை ஆட்டோக்கள் ஓடாது என்று அறிவிக்கப்பட்டுள்ளது.

தமிழ்நாடு வணிகர் சங்கங்களின் பேரவை தலைவர் த.ப.வெள்ளையனும்”பெட்ரோல் விலை
உயர்வை கண்டித்து 31-ம் தேதி மாலை 4 மணி வரை கடைகள் அடைக்கப்படும்”என்று
அறிவித்துள்ளார்.

தமிழ்நாடு வணிகர் சங்கங்களின் பேரமைப்பின் மாநில தலைவர் விக்கிரமராஜா வேலை
நிறுத்தத்துக்கு தார்மீக ஆதரவு தெரிவிக்கிறோம்.ஆனால் கடை அடைப்பில் பங்கு
பெறவில்லை என்று அறிவித்து உள்ளார்.

அதே சமயம் ஓட்டல்கள் இன்று வழக்கம் போல் திறந்து இருக்கும் என்று ஓட்டல் சங்க நிர்வாகி ஒருவர் தெரிவித்தார்.

மேலும் பேருந்துகளும் வழக்கம்போல் ஓடும் என அறிவிக்கப்பட்டுள்ளது.பொது
மக்களுக்கு எந்தவித இடையூறும் இல்லாமல் சென்னை நகரிலும்,மாநிலத்தின்
அனைத்து பகுதிகளிலும் பஸ்களை இயக்க நடவடிக்கை எடுக்கப்பட்டுள்ளது என்று
போக்குவரத்து அதிகாரி ஒருவர் தெரிவித்தார்.

இதனிடையே முழு அடைப்பையொட்டி,இன்று காலை 6 மணி முதல் மாலை 6 மணிவரை
ஆட்டோக்களை ஓட்டாமல் வேலை நிறுத்த போராட்டத்தில் ஈடுபட்டு மறியல்
போராட்டத்தில் ஈடுபடுவது என முடிவு செய்யப்பட்டுள்ளதாக ஆட்டோ ஓட்டுனர்கள்
தொழிற்சங்கங்கள் தெரிவித்துள்ளன.

போராட்டத்துக்கு நேரடியாக வணிகர் சங்கங்கள், வியாபாரிகள் ஆதரவு
தெரிவிக்காத பட்சத்திலும் இன்று கடைகள், மார்கெட்டுகள் இயங்காது என்றே
தெரிகிறது. போராட்டத்தையொட்டி பலத்த போலீஸ் பாதுகாப்பு போடப்பட்டுள்ளது.

-விகடன்