டவுட்' தனபாலு

**கேசவன்** · **கேசவன்** Tue May 29, 2012 11:02 am

தமிழக காங்., தலைவர் ஞானதேசிகன்: எண்ணெய் நிறுவனங்கள் நஷ்டத்தில் இயங்குகின்றன என்பதும், நமது தேவையில் 80 சதவீதம் இறக்குமதி செய்யப்படுகிறது என்பதும், ஒரு லிட்டர் பெட்ரோல் எட்டு ரூபாய் நஷ்டத்தில் விற்கப்படுகிறது என்பதும், அனைத்துக் கட்சித் தலைவர்களுக்கும் தெரியும்.

டவுட் தனபாலு: அது மட்டுமில்ல... உங்க மத்திய அரசு, எந்தப் பிரச்னையா இருந்தாலும், அடுத்தவங்க மேல தான் பழி போட்டுட்டே இருக்குமே தவிர, ஒரு நாளும், பிரச்னையைத் தீர்க்க முயற்சிக்காது அப்படிங்கிறதும் அனைத்துக் கட்சித் தலைவர்களுக்குத் தெரியும்...!

****

மத்திய நிலக்கரித் துறை அமைச்சர் ஸ்ரீபிரகாஷ் ஜெய்ஸ்வால்: சம்பந்தப்பட்ட மாநில அரசின் அனுமதியுடன் தான் நிலக்கரி சுரங்கங்கள், தனியார் நிறுவனங்களுக்கு ஒதுக்கப்
பட்டன. இதில், முறைகேடு எதுவும் நடக்கவில்லை.

டவுட் தனபாலு: ராஜா கூடத்தான் கருணாநிதி, சோனியாவின் அனுமதியுடன் அலைக்
கற்றைகளை ஒதுக்கியிருப்பாரு... அதுக்காக, அதை சரின்னு ஒப்புக்க முடியுமா...? அடிமாட்டு விலைக்கு சுரங்கங்களைக் கொடுத்தீங்களா,
இல்லையா...? அதைச் சொல்லுங்க...!

*****

பெட்ரோலிய அமைச்சர் ஜெய்பால் ரெட்டி: டீசலுக்கு இரட்டை விலை நிர்ணயிப்பது குறித்து பரிசீலிக்கவில்லை. டீசல் கார்களுக்கு, ஒரே நேரத்தில், 80 ஆயிரம் ரூபாய் வரி விதிப்பது குறித்து, மத்திய நிதி அமைச்சகம் ஆலோசித்து வருகிறது.

டவுட் தனபாலு: இப்படி மாத்தி மாத்தி யோசிக்கிறதுக்கு பதிலா, அடுத்த அஞ்சு வருஷத்துக்கு இந்தியாவுல எந்த எரிபொருள் வாகனமும் உற்பத்தி செய்யக் கூடாதுன்னு ஒரே போடா போட்டுடுங்க... எரிபொருள் மிச்சமாகும்... சுற்றுச்சூழல் பச்சை பசேல்னு ஆகிடும்..

dinamalar