"ஹாட்ரிக்' கோப்பை வெல்லுமா சென்னை * ஐ.பி.எல்., பைனலில் கோல்கட்டாவுடன் மோதல்

சென்னை:ஐந்தாவது ஐ.பி.எல்., தொடரின் பைனலில், "நடப்பு சாம்பியன்' சென்னை சூப்பர் கிங்ஸ், கோல்கட்டா நைட்ரைடர்ஸ் அணிகள் இன்று மோதுகின்றன. இதில் சென்னை அணி வென்று "ஹாட்ரிக்' பட்டம் வெல்லும் என்று எதிர்பார்க்கப்படுகிறது.
சென்னை, மும்பை, கோல்கட்டா உள்ளிட்ட 9 அணிகள் பங்கேற்ற ஐந்தாவது ஐ.பி.எல்., தொடர் இன்றுடன் நிறைவு பெறுகிறது. இன்று சென்னையில் நடக்கும் பைனலில், தோனியின் சென்னை சூப்பர் கிங்ஸ், காம்பிரின் கோல்கட்டா நைட்ரைடர்ஸ் அணியை சந்திக்கிறது.


மீண்ட "பார்ம்':
லீக் சுற்றில் தட்டுத் தடுமாறிய சென்னை அணி, "பிளே ஆப்' சுற்றில் மும்பையை வெளியேற்றி, சேவக்கின் டில்லி அணியையும் சாய்த்து, தொடர்ந்து மூன்றாவது முறையாக பைனலுக்கு தகுதி பெற்றது.
இதற்கு அணியின் முன்னணி பேட்ஸ்மேன்கள் சரியான நேரத்தில் "பார்முக்கு' திரும்பியது முக்கிய காரணம். ஐ.பி.எல்., தொடரில் இரண்டாவது சதத்தை பதிவு செய்த முரளி விஜய், அதிரடியாக ரன்கள் சேர்க்கும் கேப்டன் தோனி, டுவைன் பிராவோ, பத்ரிநாத் ஆகியோர் இன்றும் நம்பிக்கையுடன் செயல்பட வேண்டும். மைக்கேல் ஹசியின் மந்தமான ஆட்டம் மாறினால் நல்லது.
அஷ்வின் நம்பிக்கை:
சென்னை அணியின் பவுலிங், ஓரளவு முன்னேற்றம் அடைந்துள்ளதாக தெரிகிறது. வேகப்பந்து வீச்சாளர் ஹில்பெனாஸ், ஆல்பி மார்கலுடன் ஜகாதியின் சுழலும் எடுபடுவது ஆறுதல் தான். டில்லிக்கு எதிராக முதன் முறையாக அஷ்வின் எழுச்சி பெற்றது, நம்பிக்கை தருகிறது.
காம்பிர் அசத்தல்:
கோல்கட்டா அணியைப் பொறுத்தவரை, துவக்கத்தில் 2 தோல்வியுடன் தொடரை துவக்கியது. பின் எழுச்சி பெற்று, பங்கேற்ற 16 போட்டிகளில் 10 வெற்றியுடன் "பிளே ஆப்' சுற்றுக்கு முன்னேறியது. நடந்த முதல் போட்டியில் டில்லி அணியை சாய்த்து, முதன் முறையாக பைனலுக்கு தகுதி பெற்றது .
அணியின் கேப்டன் காம்பிரின் பேட்டிங் தான் அணிக்கு முதுகெலும்பு. இதுவரை 588 ரன்கள் குவித்துள்ள இவருக்கு காலிசும் (340 ரன்கள்) கைகொடுக்கலாம். துவக்கத்தில் மெக்கலம் (289), அதிக பந்துகளை வீணடிக்கிறார். "மிடில் ஆர்டரில்' மனோஜ் திவாரி (251) ஆறுதல் தரலாம். தொடர் முழுவதும் சொதப்பிய யூசுப் பதான், கடைசி நேரத்தில் எழுச்சி பெற்றுள்ளது வரவேற்கத்தக்கது.
சுனில் "சுழல்':'
பவுலிங்கை பொறுத்தவரை, சுழல் வீரர் சுனில் நரைன், பெரும் பலமாக உள்ளார். இதுவரை 24 விக்கெட் வீழ்த்தி இரண்டாவது இடத்தில் இருந்தாலும், "எக்கானமி ரேட்' 5.20 தான். இவரது பந்துகளில் ரன்கள் எடுப்பதை விட, விக்கெட்டை காப்பாற்றுவதே சிரமம். இன்று காம்பிருக்கு முக்கிய துருப்பு சீட்டாக சுனில் நரைன் இருப்பது நிச்சயம். இவருடன், "ஆல் ரவுண்டர்' காலிஸ் (14 விக்.,), ரஜத் பாட்யா (12), பாலாஜி (11), சாகிப் அல் ஹசனும் (11) பவுலிங்கில் அசத்தலாம்.
கோப்பை யாருக்கு:
சொந்த மண்ணில் களமிறங்கும் சென்னை அணி, இன்று வென்றால் "ஹாட்ரிக்' கோப்பை கைப்பற்றி சாதிக்கலாம். முதன் முறையாக பைனலுக்கு வந்துள்ள கோல்கட்டா அணியும், அவ்வளவு எளிதாக விட்டுத் தராது என்பதால், கடும் போட்டி காத்திருக்கிறது.
கவனமாக விளையாடுவோம்
-முரளி விஜய்-
பைனல் குறித்து சென்னை அணியின் துவக்க வீரர் முரளி விஜய் கூறுகையில்,"" ஒவ்வொரு அணியும் எதிரணியை ஏதாவது ஒரு நாளில் தோல்வியடைச் செய்து விடும். இதனால் இன்று கோல்கட்டா அணியை எளிதாக எடுத்துக் கொள்ள மாட்டோம். பைனலுக்கு தயாராக உள்ளோம்,'' என்றார்.
--
மழை வருமா
இன்று போட்டி நடக்கும் சென்னையில் வானம் மேகமூட்டமாக காணப்படும். வெப்பநிலை அதிகபட்சம் 40, குறைந்த பட்சம் 30 டிகிரி செல்சியமாக இருக்கும். மழை வருவதற்கு 20 சதவீத வாய்ப்பு உள்ளது.

-தினமலர்

சென்னை அணி வெற்றி பெற வாழ்த்துக்கள் .

சென்னை வெற்றி பெற வாழ்த்துகள் - நம் சிங்கம்புணரி நண்பர் கொல்கொத்தா மீது கொள்ளைப் பணத்தை கட்டி இருக்கார்ன்னு கேள்விப் பட்டேன்.

பார்க்கலாம் , இரண்டுமே பலம் வாய்ந்த அணி ..