மக்கள் கண்ணீர் ஆட்சியை வீழ்த்தும்: முதல்வர் ஜெயலலிதா கோபம்

**ரா.ரமேஷ்குமார்** · 23/01/2011

சென்னை:""மத்திய அரசு பெட்ரோல் விலையை திரும்ப பெறாவிட்டால், மக்களுடைய கண்ணீர் ஆட்சியை விரைவில் வீழ்ச்சி அடையச் செய்யும் ஆயுதமாக மாறும்,'' என, தமிழக முதல்வர் ஜெயலலிதா தெரிவித்துள்ளார்.

மக்கள் கண்ணீர் ஆட்சியை வீழ்த்தும்: முதல்வர் ஜெயலலிதா கோபம் Tamil_News_large_472799

இதுகுறித்து, தமிழக முதல்வர் ஜெயலலிதா வெளியிட்டுள்ள அறிக்கை:விலைவாசி உயர்ந்து வருவதற்கும், இந்திய ரூபாயின் மதிப்பு சரிந்து வருவதற்கும், நாட்டில் தற்போது நிலவும் மந்தமான பொருளாதார நிலைக்கும், மத்திய அரசு பின்பற்றும் தவறான பொருளாதாரக் கொள்கை தான் காரணம். இந்த நிலையில், தற்போது சர்வதேச சந்தையில் கச்சா எண்ணெய் விலை அதிகரித்து வருவதை காரணம் காட்டி, விலைவாசி ஏற்றத்திற்கு வழிவகுக்கும் வகையில், பெட்ரோலுக்கு லிட்டருக்கு, 7 ரூபாய் 50 காசு வரை விலை உயர்த்தி உள்ளது. இது, ஏழை, எளிய மக்களை வஞ்சிக்கும் செயலாகும்.

மத்திய அரசு பெட்ரோலிய பொருட்களின் விலையை உயர்த்தும்போது எல்லாம், சர்வதேச சந்தையில் கச்சா எண்ணெய் விலை ஏற்றம், இந்திய ரூபாய் மதிப்பு வீழ்ச்சி போன்ற எடுபடாத வாதத்தையே எடுத்து வைப்பதை ஏற்று கொள்ள முடியாது.மேலும், அமெரிக்க டாலரில் இந்திய ரூபாயின் மதிப்பை கட்டுபடுத்தாமல், பெட்ரோல் விலை உயர்வை ஏற்று கொள்ள முடியாது.வழி உண்டு: மத்திய அரசின், இந்த மக்கள் விரோத செயல் காரணமாக, இரு சக்கர வாகனங்கள் மற்றும் சிற்றுந்துகளை பயன்படுத்தும் மக்களுக்கு, இந்த உயர்வு பெரும் சுமையாக இருக்கும்.
மேலும், மத்திய அரசின் எண்ணெய் நிறுவனங்கள் மற்றும் தனியார் எண்ணெய் நிறுவனங்கள் அதிக அளவில் லாபம் ஈட்டி, மத்திய அரசு உட்பட அதன் பங்குதாரர்களுக்கு அதிக அளவு ஈவுத்தொகையினை அளிக்கிறது.

இந்த நிறுவனங்களின் லாபத்தை குறைப்பதன் மூலமும், பெட்ரோல் வரியை குறைப்பதன் மூலமும், பெட்ரோல் விலை உயர்வை தவிர்க்கலாம்.மக்களை பெரிதளவில் பாதிக்கும் முடிவை, மத்திய அரசு கைவிட்டு, பெட்ரோல் விலையை திரும்ப பெற வேண்டும். இல்லையெனில், மக்களுடைய கண்ணீர் ஆளும் காங்கிரஸ் கூட்டணி ஆட்சியை விரைவில் வீழ்ச்சி அடையச் செய்யும் ஆயுதமாக மாறும்.இவ்வாறு ஜெயலலிதா தெரிவித்துள்ளார்.

மத்திய அரசு செயல்பாட்டில் அதிருப்தி:முதல்வர் ஜெயலலிதா வெளிப்படை:"மத்தியில் ஓர் அரசு இருப்பதாகவே தெரியவில்லை. நாடு இப்போது தத்தளித்துக் கொண்டுள்ளது' என, தமிழக முதல்வர் ஜெயலலிதா கூறினார்.

அ.தி.மு.க., பிரமுகர்கள் எல்லாம், புதுக்கோட்டை இடைத்தேர்தலில் தீவிரமாகச் செயல்படுவது ஒரு புறம் இருந்தாலும், முதல்வர் ஜெயலலிதா, ஜனாதிபதி தேர்தலுக்காக தீவிரமாக காய் நகர்த்தி வருகிறார்.
நேற்று, கட்சி அலுவலக நிகழ்ச்சியில் பங்கேற்று விட்டு, தலைமைச் செயலகத்தில் நிருபர்களைச் சந்தித்தார்.

அப்போது, அவர்களிடம் கூறியதாவது:

ஜனாதிபதி தேர்தலில் பி.ஏ.சங்மாவை பாரதிய ஜனதா தலைமையிலான தேசிய ஜனநாயகக் கூட்டணி ஆதரிக்கும் என எதிர்பார்க்கிறீர்களா?
இதுகுறித்த எந்த கருத்தையும் கூற விரும்பவில்லை.

பா.ஜ., தலைவர் அத்வானியிடம் பேசினீர்களே?
ஜனாதிபதி தேர்தலில், பி.ஏ.சங்மாவை ஆதரிக்க வேண்டும் என அரசியல் கட்சித் தலைவர்களைக் கேட்டுக்கொண்டேன். இதுகுறித்து, அ.தி.மு.க., சார்பில் விரிவான அறிக்கையும் வெளியிடப்பட்டுள்ளது. இதற்கு மேல், இதில் கூறுவதற்கு ஒன்றுமில்லை.

பி.ஏ.சங்மா சார்ந்துள்ள தேசியவாத காங்கிரஸ் கட்சியே அவரை ஆதரிக்கவில்லையே?
இது பற்றி மேலும் கூற விரும்பவில்லை. என்ன நடக்கிறது என பொறுத்திருந்து பார்ப்போம்.

ஐக்கிய முற்போக்கு கூட்டணி அரசின் மூன்று ஆண்டு ஆட்சி பற்றி உங்கள் கருத்து என்ன?
நாட்டின் சாதாரண குடிமகனுக்குக் கூட, மத்தியில் ஓர் அரசாங்கமே நடைபெறவில்லை என்று தெரியும். இதனால், நாடு இப்போது தத்தளித்துக் கொண்டுள்ளது.
லோக்சபா தேர்தல் 2014ம் ஆண்டுக்கு முன்னரே லோக்சபா தேர்தல் வந்துவிடும் என நினைக்கிறீர்களா?
யூகங்களுக்கு பதில் சொல்ல முடியாது.இவ்வாறு முதல்வர் ஜெயலலிதா கூறினார்.

காங்கிரஸ் மீது முதல்வர் கடும் தாக்குதல் நடத்தி வருவதால், சங்மாவை அந்தக் கட்சி ஆதரிக்கும் என எதிர்பார்ப்பதற்கில்லை. அதேசமயம், பா.ஜ., உள்ளிட்ட பிரதான எதிர்க்கட்சிகளும் வாய் திறக்க மறுப்பதால், தான் முன்னிறுத்திய ஜனாதிபதி வேட்பாளர் சங்மாவின் வெற்றி வாய்ப்புகள் குறித்து, முதல்வர் அக்கறை கொள்வதாகத் தெரிகிறது. அவரது டில்லி பயணத்தில், ஜனாதிபதி தேர்தல் குறித்து அடுத்த உத்தி உருவாக்கப்படலாம் என்று தெரிகிறது.

-தினமலர்