எல்லாம் மேலே இருக்கிறவன் பார்த்துக்குவான்: விஜயகாந்த்

செங்கல்பட்டு: "சட்டசபைக்கு விஜயகாந்தை வரச்சொல் என்கின்றனர். நான் வந்தால், பஸ் கட்டணம், பால் விலை, மின் கட்டணத்தை குறைத்துவிடப் போகிறார்களா? மேலே இருக்கும் ஆண்டவன் எல்லாவற்றையும் பார்த்துக் கொண்டுதான் இருக்கிறான்' என, விஜயகாந்த் பேசினார்.


செங்கல்பட்டு தொகுதியில் பொதுமக்களிடம் குறைகளைக் கேட்க வந்த தே.மு.தி.க., தலைவர் விஜயகாந்த், பழைய பஸ் நிலையம் அருகில், கட்சி சார்பில் பொதுமக்களுக்கு, இரண்டு லாரிகளில் குடிநீர் வழங்கும் திட்டத்தைத் துவக்கி வைத்து, நலத்திட்ட உதவிகளை வழங்கிப் பேசியதாவது:

இடைவெளி ஏன்? நான், எனது கட்சி எம்.எல்.ஏ.,க்களின் தொகுதிகளுக்குச் சென்று, குறைகளைக் கேட்டு வருகிறேன். இங்கு மருத்துவமனைக்குச் சென்றேன். அங்கு எந்த சுகாதாரமும் இல்லை. ஓராண்டு சாதனை என்கின்றனர். மணல் கொள்ளையர்களிடமிருந்து 13 கோடி அபராதம் வசூலித்துள்ளோம் என, அமைச்சர் சொல்கிறார். முதல்வர் மணல் கொள்ளை என் கவனத்திற்கே வரவேயில்லை என்கிறார். உங்களுக்குள்ளேயே இந்த மாதிரி இடைவெளி ஏன்? மணல் கொள்ளை அமோகமாக நடக்கிறது. மணலை மரத்திற்கு மேல் குவித்து வைத்துள்ளனர். கேட்டால் அரசு, கோர்ட் உத்தரவு என்கின்றனர். நான் தொகுதி நிதி வரவில்லை எனக் குரல் கொடுத்ததால் தான், 10 நாள் முன்னதாக வழங்கியதாக நிதி ஒதுக்கினர். புதுக்கோட்டை தேர்தலில், நான் தைரியமாகத்தான் போட்டியிடுகிறேன். சட்டசபைக்கு விஜயகாந்தை வரச்சொல், வரச்சொல் என்கின்றனர். நான் வந்தால், பஸ் கட்டணம், பால் விலை, மின்சார கட்டணத்தை குறைத்துவிடப் போகிறார்களா? மேலே இருக்கும் ஆண்டவன் எல்லாவற்றையும் பார்த்துக் கொண்டுதான் இருக்கிறான்.

கொலை அதிகரிப்பு: செங்கல்பட்டில், 15 நாளைக்கு ஒரு கொலை நடக்கிறது. மருத்துவமனையிலேயே புகுந்து வெட்டுகிறான். ரோட்டில் நிம்மதியாக நடக்க முடிகிறதா? திருப்பூர் நகைக்கடை கொள்ளை, திருச்சி ராமஜெயம் கொலையில், இதுவரை குற்றவாளிகளை கண்டுபிடிக்கவில்லை. முன்பெல்லாம் காவலர்கள் ரோந்து வந்தனர். இப்போது ரோந்து போவதே இல்லை. போனாலும், காசு கொடுத்தால் வாங்கிக் கொண்டு போய்விடுகின்றனர். விஜயகாந்த் கோபப்படுகிறான் என்கின்றனர். தப்பு செய்தால், கோபம்தான் வரும், என்றார்.

-தினமலர்