ஆடு, மாடுகளை தொடர்ந்து நாட்டு கோழியும் இலவசம்

ஆடு, மாடுகளை தொடர்ந்து இலவச கோழி வழங்கும் திட்டத்தை, முதற்கட்டமாக 7 மாவட்டங்களில் தமிழக அரசு அறிமுகப்படுத்துகிறது. அதன்படி, மாவட்டம்தோறும் 300 குடும்பங்கள் தேர்வு செய்யப்பட்டு, தலா 45 நாட்டுக்கோழி குஞ்சுகள் வழங்கப்படுகிறது. பொது விநியோக திட்டத்தின் கீழ் ஏழை, எளிய குடும்பத்தினருக்கு மாதம்தோறும் தலா 20 கிலோ அரிசி இலவசமாக வழங்கப்படுகிறது. அதேபோல கறவை பசுமாடு, வெள்ளாடுகள், செம்மறி ஆடுகள், திருமண உதவித்தொகை, 4 கிராம் தங்கம், மின்விசிறி, கிரைண்டர், மிக்சி, பள்ளி மாணவ, மாணவிகளுக்கு லேப்டாப் பொருட்கள் இலவசமாக வழங்கப்படுகிறது. இந்நிலையில், இலவச கோழி வழங்கும் திட்டம் தமிழகத்தில் செயல்படுத்தப்பட உள்ளது.



இதுதொடர்பாக, தமிழக அரசு வெளியிட்ட அறிக்கை:

தமிழகத்தில் ‘கிராமப்புற புழக்கடை கோழி அபிவிருத்தி திட்டம்Õ என்ற புதிய திட்டம் நடைமுறைப்படுத்தப்படுகிறது. கிராமப்புற பகுதிகளில் வறுமைக்கோட்டுக்கு கீழ் வாழும் குடும்பத்தினருக்கு கூடுதல் வருவாயை பெற்றுத்தரவும், அவர்களின் வாழ்க்கை தரத்தை மேம்படுத்தவும், அவர்களின் வாழ்வாதாரத்துக்கான கூடுதல் வேலை வாய்ப்பை ஏற்படுத்தவும், கிராமப்புற விவசாயிகளுக்கு கூடுதல் வருவாயை பெற்றுத்தந்து, அவர்களை சொத்துக்களுக்கு சொந்தக்காரர் ஆக்கும் வகையிலும் இந்த திட்டம் அமல்படுத்தப்படுகிறது.

காஞ்சிபுரம், தர்மபுரி, தஞ்சாவூர், திருவாரூர், சிவகங்கை, திருநெல்வேலி, திருவள்ளூர் ஆகிய மாவட்டங்களில் இந்த திட்டம் முதற்கட்டமாக ஸி45.60 லட்சம் செலவில் மத்திய அரசின் 100% மானியத்தில் அறிமுகப்படுத்தப்படுகிறது. ஒவ்வொரு மாவட்டத்திலும் தலா 300 குடும்பம் தேர்வு செய்யப்பட்டு, அந்தந்த மாவட்ட கலெக்டர்களிடம் ஒப்புதல் பெறப்பட்டு, ஒவ்வொரு குடும்பத்துக்கும் 4 வார வயதுள்ள 45 நாட்டுக்கோழி குஞ்சுகள் வழங்கப்படும். இதற்கு கூண்டு அமைப்பது, தீவனம் மற்றும் தண்ணீர் வைப்பதற்கான அமைப்பு போன்றவற்றை அமைக்க ஒவ்வொரு குடும்பத்துக்கும் நிரந்தர செலவின மானியமாக ரூ750 வழங்கப்படும். இந்த கோழிகளுக்கு ஏதேனும் உடல் நலக்குறைவு ஏற்பட்டால், அருகில் உள்ள கால்நடை மருத்துவமனைகளில் சிகிச்சை பெறலாம். மேலும், காலமுறைப்படி குடற்புழு நீக்கம், தடுப்பூசி போடுதல் போன்றவற்றையும் கால்நடை மருத்துவமனைகளில் பெறலாம். இந்த திட்டத்தால் நாட்டுக் கோழியினம் பெருகும். இவ்வாறு அறிக்கையில் கூறப்பட்டுள்ளது. இதுகுறித்து, கால்நடைத்துறை அமைச்சர் சின்னையா கூறுகையில், ‘‘கோழி வழங்குவதற்கான திட்டம் குறித்து நாளை காலை ஆலோசனைக் கூட்டம் நடக்கிறது. இதில், எந்தெந்த மாவட்டத்துக்கு எந்தெந்த தேதியில் வழங்குவது என்பதை முடிவு செய்வோம்‘‘ என்றார்.

செய்தி தினகரன்