10 நாட்களில் வாபஸ் பெற காஞ்சி மடாதிபதிக்கு நித்யானந்தா `கெடு'

எங்கு சென்றாலும் நடிகை ரஞ்சிதா வருகிறார் என்று கூறியதை காஞ்சி மடாதிபதி 10 நாட்களில் வாபஸ் பெற வேண்டும் என்று நித்யானந்தா கூறினார்.

பேட்டி

மதுரை ஆதீனம் அருணகிரிநாதர் நேற்று அதிகாலையில் நிருபர்களுக்கு பேட்டி அளித்தார். அப்போது அவர் கூறியதாவது:-

மதுரை ஆதீன மடத்தின் இளைய ஆதீனமாக நித்தியானந்தாவை நியமிக்க எனக்கு முழு உரிமை உண்டு. எனவே தான் அவரை நியமித்தேன்.

காஞ்சி சங்கராச்சரியார் மதுரை ஆதீன விவகாரத்தில் தலையிடக்கூடாது. அவர் கூறிய கருத்துக்கள் அவருக்கு தேவையில்லாதவை. இதனை கடுமையாக எதிர்க்கிறோம். அவரது கருத்துக்கள் சைவ சமயத்திற்கு நல்லதில்லை என்று எச்சரிக்கிறோம்.

293-வது ஆதீனமாக நித்தியானந்தாவுக்கு பட்டம் சூட்டியதில் எந்த மாற்றமும் இல்லை. இதற்காக எழுப்பப்படும் எந்த விமர்சனத்தையும் ஏற்க மாட்டோம். நான் உடல் ரீதியாக பாதிக்கப்பட்டுள்ளேன்.

இவ்வாறு அவர் கூறினார்.

இளைய ஆதீனம் நித்தியானந்தா கூறியதாவது:-

ரஞ்சிதா என்னுடன் இல்லை

நான் காஞ்சி மடத்தை மதிக்கிறேன். யாரோ கொடுத்த தவறான தகவலின் அடிப்படையில் காஞ்சிப் பெரியவர் தவறுதலாக கூறி இருக்கிறார். நான் நடிகை ரஞ்சிதாவை எங்கு சென்றாலும் அழைத்துச் செல்வதாக கூறி இருக்கிறார். ரஞ்சிதா என்னுடன் இல்லை. நான் எங்கு சென்றாலும் அவர் என்னுடன் வருகிறார் என்று கூறுவது தவறு. மற்ற சீடர்களை போல் அவ்வப்போது வந்து செல்கிறார்.

இது குறித்து காஞ்சி சங்கராச்சாரியாரை நேரில் சந்தித்து விளக்கத் தயாராக இருக்கிறேன். அவர் தெரிவித்த கருத்துக்களை 10 நாட்களில் திரும்பப் பெற வேண்டும். இல்லாவிட்டால் அடுத்த நடவடிக்கை குறித்து விரைவில் அறிவிப்பேன்.

நான் பொறுமையாகப் போகிறேன். அதனால் நான் பலசாலி இல்லை என யாரும் நினைக்கக்கூடாது.

மான நஷ்ட வழக்கு

தருமபுர ஆதீனத்தின் மதுரை கிளை மேலாளர் குருசாமி தேசிகர், இந்து மக்கள் கட்சி மாவட்ட தலைவர் சோலைக்கண்ணன் ஆகியோர் எங்களுக்கு எதிராக தொடர்ந்த வழக்குகளை சென்னை ஐகோர்ட்டு மதுரை கிளை தள்ளுபடி செய்துள்ளது. இதன் மூலம் சத்தியமே வென்றுள்ளது. அவதூறு வழக்கு போட்டவர்களை நீதிமன்றம் கடுமையாக கண்டித்துள்ளது.

இந்த வழக்கை தொடர்ந்தவர்கள் மீது அவதூறு மற்றும் மானநஷ்ட வழக்கு தொடர உள்ளோம். இந்த தீர்ப்பின் மூலம் நீதி வென்றுள்ளது. வருகிற 13, 14 ஆகிய தேதிகளில் மதுரை ஆதீனம் குறித்த விளக்க கூட்டம் இங்கு நடத்த உள்ளோம். இந்த கூட்டம் காலை 7 மணிக்கும், இரவு 7 மணிக்கும் நடக்கிறது. இதில் பொதுமக்கள், பத்திரிக்கையாளர்கள் கலந்து கொண்டு கேட்கும் கேள்விக்கு பதில் அளிக்கப்படும்.

ஆதீனம் மீனாட்சி அம்மன் கோவிலில் அர்த்த மண்டபம் உள்ளே சென்று சுவாமியை கும்பிட உரிமை உண்டு. ஆதீனத்துடன் நான் வரும் போது உள்ளே அனுமதிக்கிறார்கள். நான் தனியாக வரும் போது அனுமதிக்கவில்லை.

இவ்வாறு அவர் தெரிவித்தார்.

தினத்தந்தி