தேவகோட்டை அருகே போலி தங்க கட்டிகளை கொடுத்து ரூ.27 1/2 லட்சம் மோசடி: அண்ணன்-தங்கை கைது

சிவகங்கை மாவட்டம் தேவகோட்டை அருகே உள்ள விளாங்காட்டூரை சேர்ந்த தங்கையா மகன் மணவாளன் (40), மகள் கண்ணகி (29) இவர்களிடம் தங்க கட்டிகள் குறைந்த விலைக்கு கிடைப்பதாக கூறி மதுரையை சேர்ந்த ஒரு புரோக்கர் தூத்துக்குடி பாண்டியன் தெருவைச் சேர்ந்த மாரியப்பன் மகன் ராம்தாஸ் என்பவரிடம் கூறினார்.

இதையடுத்து ராம்தாஸ் ரூ.27 1/2 லட்சம் பணத்தை எடுத்து கொண்டு மதுரை மாவட்டம் அலங்காநல்லூரை சேர்ந்த தனது நண்பர் சக்திவேல் என்பவரை தன்னுடன் அழைத்து கொண்டு காரில் தங்க கட்டிகள் வாங்குவதற்காக நேற்று மாலை விளாங்காட்டூர் சென்றார்.

அங்கு சென்றதும் மதுரை புரோக்கர் கொடுத்த செல்போன் நம்பரில் மணவாளனுடன் தொடர்பு கொண்டனர். அப்போது மணவாளன் தேவகோட்டை டி.எஸ்.பி. அலுவலகம் அருகே வந்து தங்க நகை கட்டிகளை வாங்கி செல்லுங்கள் என்று கூறினார்.

இதையடுத்து ராம்தாசும், சக்திவேலும் டி.எஸ்.பி. அலுவலகம் அருகே சென்றனர். அப்போது அங்கு மோட்டார் சைக்கிளில் நின்று கொண்டிருந்த மணவாளன், அவரது தங்கை கண்ணகி ஆகியோரிடம் சென்று ரூ.27 1/2 லட்சம் பணத்தை கொடுத்தனர்.

பின்னர் அவர்கள் சூட்கேசில் வைத்திருந்த தங்க கட்டிகளை கொடுத்துவிட்டு உடனே அவசர அவசரமாக மோட்டார் சைக்கிளில் அண்ணனும் தங்கையும் திரும்பி சென்றனர். தங்க கட்டிகளை வாங்கிய ராம்தாஸ் சூட்கேசை திறந்து தங்க கட்டிகளை சரிபார்த்தபோது தங்க முலாம் பூசப்பட்ட போலி தங்க கட்டிகள் என்பதை கண்டு அதிர்ச்சி அடைந்தார்.

உடனே ராம்தாஸ் சுதாரித்து கொண்டு காரில் வேகமாக சென்று மணவாளன் மோட்டார் சைக்கிளை விரட்டினார். தேவகோட்டை ஆர்.டி.ஓ. அலுவலகம் அருகே சென்று கொண்டிருந்த மணவாளன் மோட்டார் சைக்கிளின் பின்னால் ராம்தாஸ் தனது காரை மோத விட்டார்.

இதில் மணவாளனும் கண்ணகியும் தூக்கி வீசப்பட்டனர். நடுரோட்டில் அவர்கள் வைத்திருந்த பணக்கட்டுகள் ரூ.27 1/2 லட்சம் சிதறி விழுந்தது. இதை பார்த்த அப்பகுதி பொதுமக்கள் விபத்து என நினைத்து திரண்டனர்.

உடனே ராம்தாசும், சக்திவேலும் சேர்ந்து ரோட்டில் சிதறி கிடந்த பணக்கட்டுகளை எடுத்து கொண்டு காரில் தப்ப முயன்றனர். ஆனால் பொதுமக்கள் 4 பேரையும் சுற்றி வளைத்து பிடித்தனர்.

பின்னர் இதுகுறித்து தேவகோட்டை போலீசாருக்கு தகவல் கொடுத்தனர். போலீசார் விரைந்து வந்து 4 பேரையும் போலீஸ் நிலையத்துக்கு அழைத்து சென்று விசாரணை நடத்தியபோது அண்ணன்-தங்கையும் சேர்ந்து போலி தங்க கட்டிகளை கொடுத்து ஏமாற்றியது தெரியவந்தது.

இதையடுத்து ஏ.எஸ்.பி.சமந்ரோகன் ராஜேந்திரா உத்தரவின் பேரில் தேவகோட்டை டவுன் போலீசார் வழக்கு பதிவு செய்து மணவாளன் அவரது தங்கை கண்ணகி ஆகியோரை கைது செய்து பணத்தை பறிமுதல் செய்தனர்.

மாலைமலர்

நம்பியார் ஸ்டைல் மாதிரியே இருக்கே ரொம்ப சினிமா பார்கிறார்கள்

நல்ல அண்ணன் தங்கை.

சூப்பர் சினிமா கதை நிஜமாகவே.