மதுரை ஆதீன இளைய மடாதிபதியாக நித்யானந்தா பொறுப்பேற்பு

**சிவா** · **சிவா** Mon Apr 30, 2012 12:30 pm

மதுரை ஆதீனத்தின் இளைய மடாதிபதியாக நித்யானந்தா பொறுப்பு ஏற்றார்.

முடிசூட்டு விழா

மதுரை ஆதீனம் தனது இளைய வாரிசாக 293-வது குருமகா சன்னிதானமாக நித்யானந்தாவை நியமித்தார். அவருக்கு மதுரை ஆதீனம் மடத்தில் நேற்று முடிசூட்டு விழா நடந்தது. இதையொட்டி முதலில் ஆதீனத்துக்கு நித்யானந்தா தங்கக்கிரீடமும், துளசி மாலையும் அணிவித்து ஆசி பெற்றார். இதைத்தொடர்ந்து நித்யானந்தாவுக்கு மதுரை ஆதீனம் தங்கக் கிரீடமும், உத்திராட்சை மாலையும் அணிவித்தார்.

அதன்பின், மதுரை ஆதீனம் பேசும்போது கூறியதாவது:-

மதுரை ஆதீனம் 2 ஆயிரம் ஆண்டுகளுக்கு மேலாக செயல்பட்டு வருகிறது. திருஞானசம்பந்தரால் தோற்றுவிக்கப்பட்ட இந்த மடம், பழமை வாய்ந்தது. கடந்த 1980-ம் ஆண்டில் 292-வது சன்னிதானமாக நான் பொறுப்பேற்றேன். தற்போது 293-வது குரு மகா சன்னிதானமாக நித்யானந்தா சுவாமி அறிவிக்கப்பட்டு உள்ளார். அவர் ஆற்றல் மிக்கவர், ஆங்கிலத்தில் பேசும் திறமை மிக்கவர், நோய்களை குணப்படுத்திய திறமை கொண்டவர்.

அவரை மதுரை ஆதீன வாரிசாக அறிவிப்பது உலக தமிழ்மக்களுக்கு பெருமை சேர்ப்பதாக அமைந்து உள்ளது. ஆதீன மடத்தின் பொறுப்பை அவர் ஏற்பது நாங்கள் செய்த புண்ணியம்.

இணைந்து செயல்படுவோம்

நான் கடந்த 8 ஆண்டு காலமாக அவருடன் பழகி இருக்கிறேன். பெங்களூரில் நடந்த ஒரு யாகசாலை பூஜையில் கலந்து கொள்ள சென்ற போது, அவரை மடத்தின் வாரிசாக அறிவிக்க விருப்பம் தெரிவித்தேன். அதற்கு அவர் இறைவனிடம் உத்தரவு கேட்டு கூறுகிறேன் என்று சொல்லி, மறுநாள் மனப்பூர்வமாக அந்த பொறுப்பை ஏற்றுக்கொள்வதாக கூறினார். அதன்படி நாங்கள் இருவரும் இணைந்து செயல்படுவோம்.

பொய் குற்றச்சாட்டு

அவரை மதுரை ஆதீனமாக நியமித்தது குறித்து சில இந்து அமைப்புகள் எதிர்ப்பு தெரிவிப்பது அவர்களது அறியாமையை தான் வெளிக்காட்டுகிறது. அவர்கள் தெரிவிக்கும் குற்றச்சாட்டுகள் பொய்யானவை. ஆதீனத்தின் வாரிசாக ஒருவரை நியமிப்பது அந்த ஆதீன கர்த்தரின் பொறுப்பு. இதற்கு யாருடைய ஒப்புதலும் தேவையில்லை.

இவ்வாறு மதுரை ஆதீனம் கூறினார்.

விழாவில் நித்யானந்தா சாமியார் கூறியதாவது:-

நம்பிக்கை

மதுரை ஆதீனத்தின் பொறுப்பை மனப்பூர்வமாக ஏற்று கொண்டேன். ஆதீனத்தின் எல்லா புகழையும் நிலை நாட்டுவேன். என் மீது சிலர் பல்வேறு வதந்திகளை பரப்புகிறார்கள். அவர்கள் எல்லாம் பொய்யானவர்கள்.

தமிழக மக்கள் என் மீது நம்பிக்கை வைத்திருக்கிறார்கள். என் மீது பொய்யான பிரசாரம் செய்யப்பட்டது. வீடியோ ஆதாரங்கள் எல்லாம் பொய்யானவை. அதில் நான் சிக்க வைக்கப்பட்டேன். யாரோ சிலர் சொல்வதற்காக என்னுடைய பக்தர்களை விலக்கி வைக்க முடியாது.

இவ்வாறு அவர் கூறினார்.

எதிர்ப்பு

பின்னர் அவர்கள் இருவரும் மடத்தின் நிர்வாகிகள் மற்றும் பக்தர்களுடன் மீனாட்சி அம்மன் கோவிலுக்கு சாமி கும்பிடுவதற்காக ஊர்வலமாக புறப்பட்டு வந்தனர். இதற்கு அங்கிருந்த போலீசார் எதிர்ப்பு தெரிவித்தனர். இதைத்தொடர்ந்து மதுரை ஆதீனம், நித்யானந்தா மற்றும் குறிப்பிட்ட சிலர் மட்டுமே சென்றனர்.

கோஷம், மோதல்

இந்தநிலையில் ஆதீனமடத்துக்குள் எதிர்ப்பாளர்கள் திடீரென்று புகுந்து இளைய மடாதிபதியாக நித்யானந்தா நியமிக்கப்பட்டதற்கு எதிர்ப்பு தெரிவித்து கோஷம் போட்டனர். பின்னர் திருஞானசம்பந்தரை வாழ்த்தி அவர்கள் பாட்டுப் பாடினர். அப்போது நித்யானந்தா ஆதரவாளர்கள் அவரை வாழ்த்தி பாடல் பாடினர். இதனால் வாக்குவாதம் ஏற்பட்டு அங்கு இருதரப்பினரும் மோதிக்கொள்ளும் சூழ்நிலை ஏற்பட்டது.

இதைத்தொடர்ந்து அங்கு வந்த மதுரை ஆதீனம், மடத்துக்குள் வந்த எதிர்ப்பாளர்களை பார்த்து உள்ளே வர உங்களுக்கு அனுமதியில்லை என்று தெரிவித்து அவர்களை எச்சரித்தார். இதன்பின் எதிர்ப்பாளர்கள் அங்கிருந்து கலைந்து சென்றனர். அடுத்தடுத்து நடந்த இந்த சம்பவங்களால் மடத்துக்குள் பெரும் பரபரப்பு ஏற்பட்டது.

தினதந்தி