கவலைப்படாதே!

அந்த அரசினர் மேல்நிலைப்பள்ளியில் ஆசிரியை விஜயாம்பிகை தன் மாணவ மாணவிகளுக்கு ரிவிஷன் டெஸ்ட் முடிந்து திருத்திய விடைத்தாள்களை வழங்கிக் கொண்டிருந்தார். ஒரு சிலர் தவிர அனைத்து மாணவ மாணவிகளும் மிகக் குறைந்த மதிப்பெண் பெற்றிருந்தனர்.

ஆசிரியைக்கு கோபமும், வேதனையும் வந்தது. இவ்வளவு கஷ்டப்பட்டு அக்கறை எடுத்து பாடம் நடத்தியும் இப்படி குறைந்த மார்க் வாங்கியிருக்கிறார்களே என எண்ணிக் கொண்டார். இருந்தாலும் அதை வெளிக் காட்டிக் கொள்ளவில்லை.

"நான் உங்களிடம் ஒரு தோழி போல் பழகி பாடம் எடுக்கிறேன். உயிரியல் தான் எளிதான பாடம். இதில் போய் இப்படி பின் தங்கிவிட்டீர்கள். இனி முழு ஆண்டு பரீட்சையில் என் பாடத்தில் அனைத்து மாணவச் செல்வங்களும் 90 சதவீதத்துக்கு மேல் மார்க் வாங்க வேண்டும் சரியா? இனியாவது கவனமாக படிங்க'' என்றார் மனக்குறையை மறைத்துக் கொண்டு!

ஆசிரியை தொடர்ந்து பேசினார்...

"நான் போன வாரம் என் பழைய மாணவன் ஒருவனை சந்தித்தேன். வகுப்பில் கடைசி பெஞ்சில் இருப்பான். நன்றாக படிக்க மாட் டான். பெயில் ஆகிக் கொண்டே இருப்பான். அவன் கையெழுத்து கோழி கிண்டியதுபோல் கிறுக்கலாக இருக்கும். தெளிவாக புரியாது. எப்படியோ பிளஸ்-2வில் 650 மார்க் எடுத்து பாஸாகிவிட்டான்.

அதன்பின் கல்லூரியில் சேர்ந்து பி.காம், எம்.காம் படித்து முடித்து அதற்கு மேலும் பேங்க் சம்பந்தமாக மேற்படிப்பு படித்து இன்று ஒரு பேங்கில் மேனேஜராக இருக்கிறான். அன்று அவன் என்னைப் பார்த்து, `டீச்சர் நீங்க கொடுத்த ஊக்கமும், முயற்சியும் வகுப்பில் பாடத்தின் இடையே பேசும் தத்துவங்களும், பொன் மொழிகளும் நல்ல கதைகளுமே, நானும் ஒரு நல்ல நிலைக்கு வர தூண்டுகோலாய் இருந்தது. உங்கள் வார்த்தைகள் இன்னும் அப்படியே என் காதில் கேட்டுக் கொண்டே இருக்கிறது' என்றவன் எனக்கு இனிப்பு வாங்கிக் கொடுத்து வழியனுப்பினான்.

இன்னொரு மாணவனைப் பற்றியும் சொல்கிறேன் கேளுங்க. `என் வகுப்பல் முதல் மார்க் வாங்கும் மாணவன் ஒருவன் இருந்தான். அவன் கையெழுத்து பவளம்போல் இருக்கும். ஸ்கூல் பர்ஸ்ட் வந்தான். வீட்டின் வறுமை காரணமாய் ஒரு ஜவுளிக் கடையில் கணக்கெழுதும் வேலைக்கு சேர்ந்துவிட்டான். மேற்கொண்டு படிக்கவில்லை. அவன் இன்றும் ஜவுளிக் கடையில்தான் இருக்கிறான்.

அதனால் மாணவ கண்மணிகளே `நாம் குறைந்த மார்க் வாங்கிட்டோமே, நமக்கு படிப்பு நன்றாக வராது, இனி எப்படி நன்றாக படித்து நல்ல நிலைக்கு வர முடியும் என யாரும் எண்ணிக் கொள்ள வேண்டாம். காலம் பொன் போன்றது. முயற்சியுடையோர் இகழ்ச்சியடையார். கண்டிப்பா நீங்கள் எல்லாம் ஒருநாள் நல்ல நிலைக்கு வருவீங்க. நம்பிக்கையோடு தொடர்ந்து படிங்க'' என்று பேசி முடித்தார்.

மதிப்பெண் தாளை வாங்கியவர்கள் அடுத்த தேர்வில் இன்னும் அதிக மார்க் வாங்க வேண்டும் என்று உறுதியெடுத்துக் கொண்டார்கள்!

சி.சித்ரா தேவி

நல்ல பதிவு...நன்றி சிவா