தர்மத்தின் சக்தி!

சமந்தபுரம் என்ற சிற்றூரில் சங்கர் என்ற வள்ளல் ஒருவர் வாழ்ந்து வந்தார். அவருடைய இரக்க குணத்தை ஊரார் அனைவரும் அறிந்திருந்தனர். சங்கர் இப்படி நடந்து கொள்வது அவருடைய மனைவிக்குப் பிடிக்கவில்லை.

""இப்படி இருப்பதை எல்லாம் கொடுத்துக் கொண்டே இருந்தால், ஒருநாள் நாமும் அவர்களைப் போல இல்லாதவர்களாகி, இருப்பவர்களிடம் சென்று கையேந்த வேண்டிய சூழ்நிலை உருவாகிவிடும். ஆகவே, கொடுப்பதை நிறுத்துங்கள்... போதும் நாம் தர்மம் செய்தது!'' என்று உபதேசம் செய்தாள்.

""தர்மம் தலை காக்கும் என்று நீ கேள்விப்பட்டதில்லையா? நான் தர்மம் செய்கிறேன்; தடுக்காதே. ஒரு ஆண் தர்மம் செய்தால் அந்தத் தர்மத்தின் பாதிப் பங்கு பெண்ணைச் சேரும் என்கின்றனர். அதன்படி நான் செய்யும் தர்மத்தில் பாதி உன்னைக் கட்டாயம் வந்தடையும். ஒரு பெண் செய்யும் பாவத்தில் பாதிப் பாவம் ஆண் மக்களை அடையும் என்று சொல்லப்படுகிறது. ஆகவே, தயவு செய்து நீ இம்மாதிரிப் பாவம் செய்து உன் பாவத்தினை எனக்கும் பங்கு போடாதே!'' என்றார்.

அதன் பிறகு சங்கரின் மனைவி இது குறித்து எதுவும் பேசவில்லை.

தன் மனம் போனபடி தானதர்மங்களைச் செய்து கொண்டிருந்தார் சங்கர்.

ஒருசமயம் சங்கரும், அவரது மனைவியும் பக்கத்து ஊரில் நடைபெற்ற விசேஷத்துக்குச் சென்றுவிட்டுத் திரும்பிய போது, பெருமழை பிடித்துக் கொண்டது. எனவே, பாதை சேறும் சகதியுமாக இருந்ததால், அவர்களது வண்டி நின்றது.

அப்போது கையில் துப்பாக்கியுடன் வழி மறித்தான் கொள்ளைக்காரன் ஒருவன்.

""மரியாதையாக இருப்பதைக் கழற்றிக் கொடுங்கள்!'' என மிரட்டினான்.

சங்கரின் மனைவி பதறிப் போனாள். உதவிக்கு ஆள் வராதா? என்று ஏங்கினாள்.

""நாங்கள் நகைகளைக் கழற்றித் தரவில்லை என்றால் என்ன செய்வாய்?'' என்று கேட்டார் சங்கர்.

"துப்பாக்கியால் சுட்டுக் கொன்றுவிட்டு நகைகளைக் கொள்ளையடித்து போவேன்!'' என்றான் கள்வன்.

""எங்கள் நகைகளை தருவதற்கில்லை. உன்னால் முடிந்ததைச் செய்து கொள்!'' என்றார் சங்கர்.

துப்பாக்கியால் அவர் நெஞ்சை நோக்கி சுட்டான் திருடன்.

"டுப்' என்ற சின்னச் சப்தமும், புகையும் கிளம்பியதே தவிர குண்டு வெடித்து சங்கர் உயிரைக் குடிக்கவில்லை. மீண்டும் மீண்டும் சுட்டான் கள்வன்.

துப்பாக்கியில் போடப்பட்டிருந்த குண்டுகள், மழையில் நனைந்திருந்த காரணத்தினால் வெடிக்கவில்லை.

""பிடி அவனை!'' என்று வண்டிக்காரனிடம் குரல் கொடுத்தார் சங்கர். அவரும் திருடன் மேல் பாய்ந்தார். நிலைமை விபரீதமாகிவிட்டது என்று தெரிந்து கொண்ட திருடன் அங்கிருந்து ஓட்டம் பிடித்தான்.

அதன்பின் வீடு வந்து சேர்ந்தனர். அப்போது சங்கர் சொன்னார்...

""இதுதான், தர்மத்தின் சக்தி. நாம் வெளியூருக்கு விசேஷத்துக்குப் போய் திரும்பும்போது கொள்ளையன் வந்து கொள்ளையடிக்க வேண்டும் என்பது விதி. ஆனால், கொள்ளை போகாதவாறு நம்மைக் காப்பாற்ற அனுப்பப்பட்ட மழைதான் தர்மத்தின் சக்தி. சாதாரணமாக வந்து யாராவது என்னிடம் கேட்டாலே தந்து விடுவேன். ஆயினும், என்னிடம் கொள்ளையடிக்க வேண்டும் என்று ஒருவன் கருதினால், அவனுக்கு கொடுக்க மனம் வரவில்லை . நான் செய்த தர்மம்தான் மழை வடிவில் வந்து நம்மை காப்பாற்றியது,'' என்றான்.

தர்மத்தின் மதிப்பை முதல் முறையாக புரிந்து கொண்டாள் சங்கரின் மனைவி.

சிறுவர் மலர்

தர்மம் தலை காக்கும் உண்மைதான்.

நல்ல கதை