பன்றிக்காய்ச்சலுக்கு பலியானோர் எண்ணிக்கை 3 ஆக உயர்வு, சென்னையில் மேலும் ஒரு பெண் சாவு

சென்னையில் பன்றிக்காய்ச்சல் நோய் தாக்கி சிகிச்சை பலனின்றி மேலும் ஒரு பெண் உயிரிழந்தார். இதனால், பன்றிக்காய்ச்சலுக்கு பலியானோர் எண்ணிக்கை 3 ஆக உயர்ந்துள்ளது.

73 பேர் பாதிப்பு

சென்னை உள்பட தமிழகத்தில் சேலம், கோவை, திருப்பூர், வேலூர், தூத்துக்குடி உள்ளிட்ட மாவட்டங்களில் பன்றிக்காய்ச்சல் நோய் வேகமாக பரவி வருகிறது. இதுவரை சென்னையில் 35 பேரும், கோவையில் 19 பேரும் பன்றிக்காய்ச்சல் நோய் பாதித்துள்ளது.

நேற்று முன்தினம் சென்னையில் 4 பேரும், திருப்பூரில் 3 பேரும் என மேலும் 7 பேருக்கு பன்றிக்காய்ச்சல் நோய் பாதிப்பு ஏற்பட்டது. இவர்கள் உள்பட தமிழகத்தில் இதுவரை 73 பேர் பன்றிக்காய்ச்சல் பாதிப்புக்கு ஆளாகியிருக்கிறார்கள்.

பலி எண்ணிக்கை 3 ஆக உயர்வு

இதற்கிடையே திருப்பூர் மாவட்டத்தைச் சேர்ந்த 70 வயதான விவசாயி மற்றும் விழுப்புரம் மாவட்டத்தைச் சேர்ந்த கல்லூரி மாணவி ஒருவரும் பன்றிக்காய்ச்சலுக்கு பலியானார்கள். இந்த நிலையில் சென்னை அருகே திருப்போரூரைச் சேர்ந்த மஞ்சுளா (வயது 35) என்பவர் பன்றிக்காய்ச்சலால் பாதிக்கப்பட்டு செட்டிநாடு ஆஸ்பத்திரியில் சிகிச்சை பெற்று வந்தார்.

டாக்டர்கள் தீவிர சிகிச்சை அளித்தும் நோயின் தாக்கத்தை கட்டுப்படுத்த முடியவில்லை. நோயின் தாக்கம் தீவிரம் அடைந்ததைத்தொடர்ந்து மஞ்சுளா உயிருக்கு ஆபத்தான கட்டத்தை அடைந்தார். அதைத் தொடர்ந்து அவர் மேல் சிகிச்சைக்காக சென்னை அரசு பொது மருத்துவமனையில் நேற்று மாலை சேர்க்கப்பட்டார். டாக்டர்கள் அவருக்கு தீவிர சிகிச்சை அளித்தும் பலனளிக்காமல் ஒரு சில மணி நேரங்களில் மஞ்சுளா பரிதாபமாக உயிரிழந்தார். இதையடுத்து பன்றிக்காய்ச்சலுக்கு பலியானோரின் எண்ணிக்கை 3 ஆக உயர்ந்துள்ளது.

இதுபற்றி சுகாதாரத்துறை இயக்குனர் பொற்கை பாண்டியனிடம் கேட்டபோது அவர் கூறியதாவது:-

தமிழகத்தில் நோய் கட்டுக்குள் உள்ளது

பன்றிக்காய்ச்சல் நோய்க்கு சிகிச்சை அளிக்க தேவையான அனைத்து மருத்துவ வசதிகளும் அனைத்து அரசு ஆஸ்பத்திரிகளில் செய்யப்பட்டு உள்ளன. `டாமிபுளு' மாத்திரைகளும் தேவையான அளவு இருப்பில் உள்ளது. ஆனால், தனியார் ஆஸ்பத்திரியில் சிகிச்சைக்காக சேர்க்கப்பட்ட மஞ்சுளாவுக்கு நோயின் பாதிப்பு எல்லை மீறிய பிறகுதான் ராஜீவ்காந்தி அரசு பொது மருத்துவமனையில் அனுமதிக்கப்பட்டுள்ளார்.

கடைசி நேரத்தில் சேர்க்கப்பட்டதால் சிகிச்சை பலனின்றி உயிரிழந்துவிட்டார். தமிழகத்தின் பன்றிக்காய்ச்சல் பரவுதல் கட்டுக்குள் உள்ளது. தொடர்ந்து ரெயில் நிலையங்கள், விமான நிலையங்களில் சுகாதார அலுவலர்கள் தீவிர கண்காணிப்பு மற்றும் பரிசோதனையில் ஈடுபட்டுள்ளனர் பன்றிக்காய்ச்சல் அறிகுறிகள் உடலில் தென்பட்டால் உடனடியாக அருகில் உள்ள அரசு ஆஸ்பத்திரியை அணுகி பரிசோதனை செய்துகொள்ள பொதுமக்களை கேட்டுக் கொள்கிறேன். தொடர்ந்து ஒவ்வொரு கட்டமாக தடுப்பூசி போடும் பணிகளும் நடந்து வருகிறது.

இவ்வாறு பொற்கை பாண்டியன் கூறினார்.

தினத்தந்தி