முல்லைப் பெரியாறு: ஏப்ரல் இறுதியில் உச்ச நீதிமன்றத்தில் அறிக்கை தாக்கல்: நீதிபதி ஏ.எஸ். ஆனந்த்

புது தில்லி, ஏப். 22: முல்லைப் பெரியாறு அணை விவகாரம் தொடர்பான இறுதி அறிக்கை திட்டமிட்டப்படி இம்மாத இறுதியில் உச்ச நீதிமன்றத்தில் தாக்கல் செய்யப்படும் என்று அதிகாரம் அளிக்கப்பட்ட குழுவின் தலைவரும் உச்ச நீதிமன்றத்தின் முன்னாள் தலைமை நீதிபதியுமான ஏ.எஸ். ஆனந்த் தெரிவித்தார்.

முல்லைப் பெரியாறு அணைத் தொடர்பாக இறுதி கட்ட ஆலோசனை நடத்த அதிகாரம் அளிக்கப்பட்ட குழுவின் கூட்டம் தில்லியில் ஞாயிற்றுக்கிழமை நடைபெற்றது. சுமார் நான்கு மணி நேரம் கூட்டம் நடைபெற்றது.

இதில் முல்லைப் பெரியாறு அணையின் ஸ்திரத்தன்மையை உறுதி செய்ய அணை சுவரில் துளைகளிட்டும், அணையில் நீரின் அடியில் சென்று சேகரிக்கப்பட்ட பொருள்களின் அடிப்படையில் நடத்தப்பட்ட ஆய்வுகளின் அறிக்கைகளும் குழுவிடம் சமர்ப்பிக்கப்பட்டன.

இந்த அறிக்கைகளை அடிப்படையாக வைத்து இறுதி அறிக்கையைத் தயாரிக்கும் பணியைக் குழுவினர் தொடங்கினர்.
கூட்டத்துக்குப் பின்னர் செய்தியாளர்களிடம் குழுவின் தலைவர் ஏ.எஸ். ஆனந்த் கூறியது: ""முல்லைப் பெரியாறு அறிக்கைக்கு திங்கள்கிழமை இறுதிவடிவம் அளிக்கப்படும். திட்டமிட்டப்படி ஏப்ரல் இறுதியில் உச்ச நீதிமன்றத்தில் அறிக்கை தாக்கல் செய்யப்படும். குழுவுக்கு மீண்டும் கால நீட்டிப்பு தேவையற்றது'' என்று அவர் தெரிவித்தார்.

இந்த கூட்டத்தில் தமிழகத்தின் சார்பில் உச்ச நீதிமன்ற முன்னாள் நீதிபதி ஏ.ஆர். லட்சுமணன், கேரள அரசின் சார்பில் உச்ச நீதிமன்ற முன்னாள் நீதிபதி கே.டி. தாமஸ், இரண்டு தொழில்நுட்ப நிபுணர்கள் ஆகியோர் பங்கேற்றனர்.

முல்லைப் பெரியாறு அணை தொடர்பாக ஆய்வு நடத்த அதிகாரம் அளிக்கப்பட்ட குழுவை 2010 -ல் உச்ச நீதிமன்றம் நியமித்தது. இந்தக் குழுவின் நீட்டிக்கப்பட்ட பதவிக்காலம் இம்மாதம் 30-ம் தேதியுடன் முடிவடைகிறது.

தினமணி

~~~~~~~~~~~~~~~~~~~~~~

அப்ப இந்த வருடதில் தீர்ப்பை எதிர்பார்க்கலாம் !