பாலிடிக்ஸ் பஜார்

ஓயாத உத்தபுரம்? : மதுரை மாவட்ட காவல் கண்காணிப்பாளர் முயற்சியால், உத்தபுரத்தில் இரு பிரிவினரிடையே அமைதி ஏற்பட்டாலும் முணுமுணுப்புகள் இருக்கத்தான் செய்கின்றன. கிராமத்துக்கு பேருந்து நிலையம், ரேஷன் கடை, மழை நீர் வடிகால்வாய், தெருவிளக்குகள்... என்று பல பொதுநல வசதிகளை செய்து தருவதற்கு மார்க்ஸிஸ்ட் கம்யூனிஸ்ட் ராஜ்யசபா உறுப்பினர் தமது தொகுதி நிதியிலிருந்து மூன்றரை லட்சம் (தி.மு.க. ஆட்சியின் போது) கொடுத்தார். ஆனால் அதை பயன்படுத்தவே இல்லை. இப்போது ஐந்து லட்சம் கொடுக்க தயாராக இருந்தும் மாவட்ட நிர்வாகம் செய்படுத்த வேண்டிய பணிகளை பட்டியலிட்டு கொடுக்காமல் இருக்கிறது. இது ஒருபுறம் இருக்க உத்தபுரம் பிரச்னை வெடித்ததற்கு காரணம் கோயி“ல வழிபாட்டு உரிமை தான். குழம்பிய குட்டையில் மீன் பிடிக்கும் கதையாக நலிந்த பிரிவினரை மதம் மாற்றும் முயற்சியில் சில சக்திகள் இறங்கியிருக்கின்றனஎன்று குமுறுகின்றன இந்து இயக்கங்கள். இதை தடுக்க வேண்டியது மாவட்ட நிர்வாகமோ, மறை மாவட்ட நிர்வாகம்போல செய்படுவது தான் வேததையிலும் வேதனை. என்று கொந்தளிக்கின்றன அந்த இயக்கங்கள்.

வல்லவனுக்கு வல்லவன்: பாண்டிச்சேரியில் மருத்துவக்கல்லூரிக்கு, அனுமதி வாங்கியதில் முறைகேடுகள்: தமிழ்நாட்டில் கல்லூரி அட்மிஷனுக்கு கேப்பிடேஷன் பீஸ் எக்கச்சக்கம் வாங்குவதாக குற்றச்சாட்டு... இப்படி சி.பி.ஐ. யிடம் மாட்டிக்கொண்டாலும் கூட்டணிக் கட்சியாக இருப்பதால் மட்டும் தப்பிப்பவர் அல்ல அந்த மத்திய அமைச்சர். சோதனை மேல் சோதனையாக சென்னையில் அவருடைய மருத்துவ கல்லூரிக்கு பக்கத்து நிலத்தை அபகரித்ததாகவும் குற்றச்சாட்டு. காவல் துறையினர் மேலிடத்துக்கு விஷயத்தை கொண்டு போக, வழக்கு போடுவதற்கு பிரதமரிடம் அனுமதி வாங்கி விடுங்கள் என்று சொல்லிவிட்டதாம். மேலிடம் யாரை எப்படி வளைத்து போடுவதென்பது அவருக்கு தெரியாதா என்ன? எனவே மத்திய அரசின் அனுமதி கிடைக்குமா என்பது கேள்விக்குறி.

தில்லையார் தியரி:தோழி தோட்டத்துக்கு திரும்பி விட்டாலும் அவரின் சொந்தபந்தங்கள் தொடர்ந்து சிறையில் வாடுகின்றனர். ஆனால், இந்த மொத்த எபிசோடும் தம் திட்டப்படியே நடந்து வருவதாக பீற்றிக்கொள்கிறாராம் தில்லை அரசர். ஆட்சி செய்பவருக்கு எங்கள் தயவும் உதவியும் தேவை. என்பதை மறுபடி உலகறிய செய்து விட்டோம். இனி எங்களை எந்த காலத்திலும் அசைக்க முடியாது. இனி எங்கள் ஜெயில் வாசமே என்று கும்மியடிக்கிறாராம் அவர்.

பக்திப்பரவசம் ? : அ.இ.அ.தி.மு.க.வினர், தி.மு.க. வினரை போல் போலியாக இல்லாமல் வெளிப்படையாகவே கோயில், குளம், மலை என்று சுற்றி வருபவர்கள், பெரும்பாலான அ.தி.மு.க. பிரமுகள் அமாவாசை, பௌர்ணமி மற்றும் வெள்ளிக்கிழமைகளில் சில குறிப்பிட்ட கோயில்களுக்கும், மகான்களின் சமாதிகளுக்கும் செல்வதை வழக்கமாக கொண்டிருக்கிறார்கள். கால்நடைத்துறை அமைச்சர் தாம் பரம் சின்னையா அமாவாசை இரவு மந்திராலயம் சென்று ராகவேந்திரர் பிருந்தாவனத்தில் தங்கி வருவதை வாடிக்கையாக கொண்டிருக்கிறார். இதில் கூடுதல் தகவல் என்னவென்றால், தாம்பரத்தை சுற்றியுள்ள பேரூராட்சி, ஊராட்சி ஒன்றியத்தலைவர்களும், அமைச்சருடன் கிளம்பிவிடுகிறார்கள். அமைச்சருடன் போகும் பிரமுகர்கள் தங்கள் அலுவலகங்களில் ராகவேந்திரர் படம் வைத்துக் கொண்டிருக்கிறார்கள். இது ராகவேந்திரர் மீதுள்ள பக்தியாலா அல்லது அமைச்சரை காக்காய் பிடிக்கும் முயற்சியா? என்று வியக்கிறார்கள் தாம்பரம் தொகுதி கட்சித் தொண்டர்கள்.

சங்கடம்! : பலாப்பழம் ஊரை சேர்ந்த அந்த எதிர்க்கட்சி எம்.எல்.ஏ.வுக்கு தொகுதியில் நல்ல பெயர் இல்லை. இவர் சமீபத்தில் புதுச்சேரியில் பிரபல ஹோட்டலில் தங்கியிருந்தபோது ஒரு கும்பல் அவரிடமிருந்து லட்சக்கணக்கான ரூபாய்களை அடித்து பிடுங்கி கொண்டு போய் விட்டதாம். காவல்துறையிடம் புகார் கொடுக்க முடியாத சங்கடத்தில் இருக்கிறாராம் அவர்.
-சஞ்சயன்

கல்கி செய்தி