"மலைவலம் வந்தால் மலைக்கும் அளவிற்கு வாழ்க்கைத்தரம் உயரும்'' - சிவல்புரி சிங்காரம் பேச்சு

மலைவலம் வந்தால் மலைக்கும் அளவிற்கு வாழ்க்கைத் தரம் உயரும், நிலவு நிறைந்த நாளில் நாம் மலைவலம் வரவேண்டும். அப்போது தான் பொருளாதாரத்தில் நமக்கு நிறைவு உண்டாகும் என்று கிரிவல விழாவில் செட்டிநாடு கிரிவலக்குழு தலைவர் சிவல்புரி சிங்காரம் பேசினார்.

178-வது கிரிவலம்

பங்குனி மாத பவுர்ணமியன்று 178-வது மாத கிரிவலமாக கீழச்சிவல்பட்டியிலிருந்து, செட்டிநாடு கிரிவலக்குழுத் தலைவர் சிவல்புரி சிங்காரம் தலைமையில் சுமார் 250-க்கும் மேற்பட்ட பக்தர்கள் 25-க்கும் அதிகமான வாகனங்களில் புறப்பட்டு சென்றனர்.

முன்னதாக, பிளையார்பட்டியில் பக்தர்கள் ஒன்று கூடி புறப்பட்டு மலைவலம் புறப்பட்டனர். விழாவில் கவியரசு கண்ணதாசனின் மகன் காந்தி கண்ணதாசன் தனது குடும்பத்துடன் பங்கேற்றார். அவர்களோடு கண்ணதாசனின் மகள்களும் கலந்து கொண்டனர்.

`ஆனைமுகனைப் பார்க்காமல் இருக்க முடியுமா? அவர் அருளில்லாமல் வாழ்க்கை நடத்த முடியுமா?` என்ற பாடலைப் பாடிக்கொண்டு வலம் வந்த பக்தர்கள், அங்கிருந்து குன்றக்குடிக்கு சென்றனர். அங்கு ஆறுமுகப்பெருமான், ஊஞ்சல் முருகன், அருணகிரிநாதப்பெருமான், திருநீலகண்டநாயனார் ஆகிய தெய்வங்களை வழிபட்டு, இரவு விருந்துக்கு பின்பு வைரவன்பட்டிக்கு வந்தனர்.

பக்தி சொற்பொழிவு

வைரவன்பட்டி நகரத்தார் விடுதியில் சிவல்புரி சிங்காரம் தலைமையில் ஆன்மிக சொற்பொழிவு நடைபெற்றது. இதில் அலர்மேலுமங்கை சீனிவாசன், கோவை செல்வகணேசன், பெங்களுர் எல்.சோமு ஆகியோர் பக்தி பாடல்களைப் பாடினர். தெக்கூர் ஐ.சி.ஐ.சி.ஐ. வங்கி அதிகாரி அருணாச்சலம், மேட்டுப்பாளையம் குடிநீர் வடிகால் வாரியத்தில் பணிபுரியும் மணிமேகÛலை ஆகியோர் கிரிவலத்தில் கலந்து கொள்வதன் மூலம் ஏற்பட்ட பலன்கள் குறித்து எடுத்து கூறினர்.

பின்னர் சிவல்புரி சிங்காரம் பேசியதாவது:-

அன்றாட வாழ்க்கை நன்றாக அமைய வேண்டும் என்றால், அனைவரிடமும் அன்பு செலுத்த வேண்டும். வீட்டில் வசிப்பவர்களுக்கு `உபசரிப்பு` ம், ஆலயத்தில் வாசிப்பவர்களுக்கு `உச்சரிப்பு`ம் மிக மிக அவசியமாகும். `எம்பெருமான் துணை` என்று எழுதும் போது, இரண்டாவது எழுத்தில் அதாவது `ம்` மில் உள்ள புள்ளியில்லாமல் இருந்தால் என்ன ஆகும்? அதுபோல `கோடியில் ஒருவர்` என்று புகழ்ந்து எழுதும் போது, `கோ` வில் ’துணைக்கால்’ இல்லாமல் இருந்தால்? வாசித்துப் பாருங்கள்! அர்த்தமே விபரீதமாக மாறிவிடும்.

மதி நிறைந்த நந்நாளில் இன்று நாம் மலைவலம் வருகின்றோம். எனவே, வானில் மதிநிறைந்துள்ளது போல், நம் மனமும் நிறைந்துள்ளது. `மலைவலம் வந்தால் நம் வாழ்க்கை மலைக்கும் அளவிற்கு உயரும்`. ஆலயத்தில் தெய்வ சன்னதியில் நீங்கள் பாடும் பாடல்களில் `இல்லை, முடியாது, வேண்டாம்` என்பது போன்ற எதிர்மறை சொற்கள் இருக்கக் கூடாது. `முடியும், வேண்டும்` என்ற நேர்மறை வாசகங்கள், வார்த்தைகள் அமைந்த பாடல்களை பாடினால் ஆலயத்தில் எதிரொலித்து நம் வாழ்க்கையிலும் நல்ல பலன்களே கிடைக்கும். அதனால்தான் வடலூர் வள்ளலார் தான் 4 வயது குழந்தையாக இருக்கும் போதே `ஒருமையுடன் நினது திருமலரடி நினைக்கின்ற, உத்தமர் தம் உறவு வேண்டும்` என்ற வேண்டுதல் பதிகம் பாடினார்.

இவ்வாறு சிவல்புரி சிங்காரம் பேசினார்.

நிகழ்ச்சியில், மேலூர் சோலையப்பன், மேட்டூர் வைரவன், திருப்பத்தூர் இளஞ்செழியன், காரைக்குடி அ.தி.மு.க. பிரமுகர் கண்ணதாசன், புதுக்கோட்டை கல்வி இலாகா குணசேகரன், ரவீந்திரன், வேந்தன்பட்டி ஆறுமுகம், புதுக்கோட்டை பாலு, ஜோதி, நாகப்பட்டினம் மோகன், கோட்டநத்தம்பட்டி பழனிச்சாமி, காரைக்குடி ஆண்டியப்பன், காரைக்குடி மணிவாசகம் கனிமொழி உள்பட பலர் கலந்து கொண்டனர்.

தினதந்தி

நேர்மறை வாசகங்கள், வார்த்தைகள் அமைந்த பாடல்களை பாடினால் ஆலயத்தில் எதிரொலித்து நம் வாழ்க்கையிலும் நல்ல பலன்களே கிடைக்கும்.

உண்மை .! எண்ணமே வாழ்வு !

சிவா wrote:மலைவலம் வந்தால் மலைக்கும் அளவிற்கு வாழ்க்கைத் தரம் உயரும்,

உண்மை உண்மை , என் வாழ்வில் நான் உணர்ந்தது....

ஆன்மீக நண்பர்களே வாழ்நாளில் ஒருமுறையாவது திரு அண்ணாமலையும் , வெள்ளியங்கிரியும் , சதுரகிரியும் சென்று வாருங்கள். (நான் இன்னும் சதுரகிரி செல்லவில்லை அதற்குள் எனையாளும் ஈசன் என்னை இங்கு கொண்டு வந்துவிட்டார்)