உசிலம்பட்டி பகுதியில் 3-வது நாளாக சம்பவம்: கள்ளத்தொடர்பு பிரச்சினையில் வாலிபர் வெட்டிக்கொலை

உசிலம்பட்டி பகுதியில் கடந்த 3 நாட்களாக தினமும் கொலை சம்பவங்கள் அரங்கேறி வருகின்றன. நேற்று கள்ளத்தொடர்பு தகராறில் வாலிபர் பல இடங்களில் வெட்டுக்காயங்களுடன் பிணமாக கிடந்தார்.

கள்ளத்தொடர்பு

மதுரை மாவட்டம் உசிலம்பட்டியை அடுத்த செல்லம்பட்டியை சேர்ந்த பாண்டி மகன் லட்சுமணன் என்ற பால்பாண்டி(வயது 32). இவருக்கும் கரிசல்பட்டியை சேர்ந்த ஜெயாவுக்கும் திருமணமாகி 6 வயதில் ஒரு பெண் குழந்தை உள்ளது. பால்பாண்டி லோடுமேனாக இருந்து வந்தார்.

இவருக்கும் செல்லம்பட்டியை சேர்ந்த ஒரு பெண்ணிற்கும் கள்ளத்தொடர்பு இருந்ததாக தெரிகிறது. இந்த பிரச்சினை காரணமாக பால்பாண்டிக்கும், அந்த பெண்ணின் உறவினர்களுக்கும் இடையே பிரச்சினை இருந்து வந்துள்ளது.

படுகொலை

இதன் காரணமாக பால்பாண்டி செல்லம்பட்டியில் இருந்து வீட்டை மாற்றி கரிசல்பட்டிக்கு வந்துவிட்டார். தனது மாமனார் குடும்பத்தை ஒட்டி பால்பாண்டியும் தங்கியிருந்தார்.

வேலைக்கு சென்றுவிட்டு நேற்று முன்தினம் இரவு சைக்கிளில் செல்லம்பட்டியில் இருந்து கரிசல்பட்டிக்கு பால்பாண்டி புறப்பட்டுள்ளார். ஆனால் அவர் கரிசல்பட்டிக்கு வரவில்லை. இதையடுத்து அவரை பல இடங்களிலும் தேடினர்.

இந்த நிலையில் நேற்று காலை உடல் முழுவதும் வெட்டுக்காயங்களுடன் பால்பாண்டி முண்டுவேலம்பட்டி விலக்கு அருகே பிணமாக கிடந்தார். இதைப்பார்த்த அந்த பகுதி மக்கள் கரிசல்பட்டிக்கு தகவல் கொடுத்தனர்.

தினமும் கொலைகள்

இந்த படுகொலை சம்பவம் குறித்து செக்கானூரணி இன்ஸ்பெக்டர் ஜான்பிரிட்டோ வழக்குப்பதிவு செய்து விசாரணை நடத்தி வருகிறார்.

கடந்த 3 நாட்களாக இந்த பகுதியில் தினமும் கொலைகள் நடந்து வருகின்றன. கடந்த ஞாயிற்றுக்கிழமையன்று கருவேப்பிலை கிராமத்தில் தோட்டத்து வீட்டின் மாடியில் தூங்கிய விவசாயி தலையில் கல்லைப்போட்டு படுகொலை செய்யப்பட்டார்.

நேற்று முன்தினம் வட பழஞ்சியில் கள்ளத்தொடர்பு காரணமாக 2 குழந்தைகளை கொன்ற ஆட்டோ டிரைவர் திருப்பதி அவரது கள்ளக்காதலியான ஆசிரியை பிரேமலதா மற்றும் கொலைக்கு உதவிய பெரியகருப்பன் ஆகிய 3 பேர் கைது செய்யப்பட்டனர்.

அந்த கொலைகளின் சுவடுகள் அடங்குவதற்குள் நேற்று கள்ளக்காதல் பிரச்சினையில் வாலிபர் படுகொலை செய்யப்பட்டுள்ளது அந்த பகுதியில் அதிர்ச்சியை ஏற்படுத்தியுள்ளது.

தினதந்தி