2006 முதல் 3121 கிகாவாட் வரை... - இந்தியாவுக்கு காற்றாலை மின்சாரமே போதும்! - அமெரிக்க ஆராய்ச்சி கண்டுபிடிப்பு!

உலகில் நிறுவப்பட்டுள்ள 200 கிகாவாட்டுகள் அளவிலான காற்றாலை மின்சார உற்பத்தி நிலையங்களில், 15000 மெகாவாட்டுகள் வரையிலான காற்றாலைகளை இந்தியா நிறுவியிருக்கிறது. இது உலக அளவில் ஐந்தாவது இடம். இதில் கிட்டத்தட்ட 47 சதவிகிதம் தமிழ்நாட்டில் நிறுவப்பட்டு, கிட்டத்தட்ட 6000 மெகாவாட் மின்சாரம் உற்பத்தியாகிறது. தமிழ் நாட்டில் ஆரல்வாய்மொழி கணவாய்ப் பகுதிகளிலும், கயத்தாறு, தாராபுரம் பகுதிகளிலும் ஏராளமான காற்றாலைகள் நிறுவப்பட்டுள்ளன. இவற்றைப் பெரும்பாலும் தனியார் நிறுவனங்களும் தனியார்களும் நிறுவிக்கொண்டு, அதில் பெறும் மின்சாரத்துக்கான கட்டணத்தையோ, பதில் மின்சாரத்தையோ தமிழ்நாடு மின்சார வாரியத்திடமிருந்து பெற்றுக் கொள்கிறார்கள். காற்றாலை, சூரியசக்தி போன்ற பசுமை மின்சாரத்தையும், புனல் மின்சாரத்தையும் மிக அதிகம்.

“இந்தியா அடுத்த பத்தாண்டுகளில் தற்போதுள்ள 15 கிகா வாட்டுகள் காற்றாலை மின் உற்பத்தித் திறனில் இருந்து, கிட்டத்தட்ட 102 கிகா வாட்டுகள் வரை உயர்த்தப்படலாம். அது இந்தியாவின் ஒட்டுமொத்த மின்சாரத் தேவையில் கிட்டத்தட்ட 5 சதவிகிதம் முதல் 6 சதவிகிதம் வரை பூர்த்தி செய்யும்’ என்கிறது இந்தியாவின் மரபுசாரா எரிசக்தித் துறை அமைச்சகம்.

ஆனால், “102 கிகா வாட்டுகள் என்பது மிக மிகக் குறைவான கணக்கீடு. இந்தியா காற்றின் முழுவீச்சையும் திறமையாகப் பயன்படுத்தினால் இதைவிட கிட்டத்தட்ட 20 முதல் 30 மடங்கு அதிக மின்சாரம் கிடைக்கும்’ என்கிறது அமெரிக்காவின் புகழ்பெற்ற லாரன்ஸ் பெர்க்லி ஆராய்ச்சி சாலை. இந்த நிறுவனத்தின் விஞ்ஞானி அமோல் பாட்கேயின் தலைமையிலான குழு, இந்தியாவின் காற்றாலைத் திறன் குறித்த முழுமையான ஆராய்ச்சி முடிவுகளை ஓர் அறிக்கையாக இந்திய அரசுக்கு அளித்துள்ளது.

லாரன்ஸ் பெர்க்லி லேப் விஞ்ஞானிகளின் கண்டுபிடிப்பின்படி இந்தியாவின் காற்றாலை உற்பத்தித் திறன் 2006 கிகா வாட்டுகள் முதல் 3121 கிகா வாட்டுகள் வரை இருக்கக்கூடுமாம். இந்தக் கணக்கின்படி இந்தியா தம் ஒட்டுமொத்த மின்சாத்த தேவையையும் அதன் காற்றாலை மின்சாரம் மூலமாகவே உற்பத்தி செய்து கொள்ள முடியும்.

பூகோள அளவீட்டுத் தகவல்கள் மூலமாக இந்தியாவில் காற்றாலைகள் உற்பத்திக்குத் தகுதியான நிலப்பரப்பு இந்திய அரசின் கணக்கை விட பல மடங்கு அதிகமாக இருப்பதாக இந்த குழு தமது அறிக்கையில் தெரிவித்துள்ளது. “இந்தத் திருத்தப்பட்ட கணக்கீடுகளின் மூலமாக சீனாவின் காற்றாலை உற்பத்தியின் அளவு 50 சதவிகிதமும், அமெரிக்காவில் 400 மடங்கும் அதிகமாகும்’ என்கிறார் இந்தக் குழுவைச் சேர்ந்த இட்ரான் நிறுவன ஆலோசகர் ரஞ்சித் பார்விர்கர். பெர்க்லி லேப் குழுவுடன் இந்தியாவின் மரபுசாரா எரிசக்தித் துறை அமைச்சகம் ஓர் புரிந்துணர்வு ஒப்பந்தத்தைக் கையெழுத்திட்டுள்ளது. இந்த நிறுவனத்தின் கண்டுபிடிப்பின்படி இந்தியாவின் மொத்த காற்று வீச்சுள்ள நிலப்பகுதியில் 0.05% நிலப்பகுதி பயன்படுத்தப்பட்டாலே காற்றாலை மூலமாக மட்டும் 543 கிகா வாட்டுகள் வரை மின் உற்பத்தியைப் பெறலாம். இந்தப் புதிய கணக்கில் பாதி அளவை எட்டினால் இந்தியா மின்சாரத் தேவையில் தற்சார்புடைய ஒரு நாடாக மாறிவிடும். இருந்தாலும், அதை அடைவதற்கு ஏராளமான நிதி தேவை மற்றும் கட்டுமானச் சவால்கள் உள்ளன.

தமிழகத்தின் இன்றைய காற்றாலை மின் உற்பத்தித் திறனான 6000 மெகாவாட்டுகளைக் கூட தமிழக மின்சார வாரியம் உரிய விதத்தில் பயன்படுத்திக் கொள்ள வில்லை. காற்றாலை மின்சாரத்துக்கு அளிக்கும் கட்டணமும் அவற்றøப் பயன்படுத்திக் கொள்ளும் வழிமுறைகளும் ஒரு தேசியக் கொள்கையாக வகுக்கப்படவேண்டியதும் அவசியம். மேற்கண்ட கட்டுமானத்தை உருவாக்குவதற்குத் தேவையான திட்டமிடுதலை உரிய முறையில் செய்தாலன்றி இந்த 3000 கிகா வாட்டுகளும் காற்றில் கரைந்த மின்சாரம்தான். மற்ற மின் உற்பத்தி முறைகளை விடத் தூய்மையான சூழல் மாசு ஏற்படுத்தாத மின்சார உற்பத்தியாகக் காற்றாலை கருதப்பட்டாலும்கூட அதிலும் பல எதிர்மறை விளைவுகள் உள்ளன. காற்றாலை மின்சாரத்துக்குத் தேவைப்படும் நிலம், அவற்றில் இருந்து உற்பத்தியாகும் மின்சாரத்தைப் பொது பகிர்மானத்துக்குக் கொண்டு செல்லும் செலவு, காற்றாலைகளினால் பறவைகளுக்கு ஏற்படும் அபாயங்கள் போன்றவற்றையும் நாம் கணக்கில் கொள்ள வேண்டும்.

காற்று வழி மின்சாரத்தின் முழுத் திறனையும் பெறுவதற்கான சவால்கள் ஏராளமாக இருப்பினும், இந்தப் புதிய கணக்கீட்டுக் கண்டுபிடிப்பு அசாத்தியமான நம்பிக்கையையும் ஒளிமயமான எதிர்காலம் குறித்த கனவுகளையும் உருவாக்குகின்றன.

- ச. திருமலைராஜன்

நன்றி - கல்கி

இந்த மின்சார தொல்லை அதிகமா இருக்கே

அண்ணன் ஆற்காட்டார் கவனிக்க

balakarthik wrote:அண்ணன் ஆற்காட்டார் கவனிக்க

:farao: இப்போ எதுக்கு ஆற்க்காட்டார்....இவரை பற்றி இப்போ ஆர் ..கேட்டார் ??? அதிகமோ!!!

கே. பாலா wrote:

balakarthik wrote:அண்ணன் ஆற்காட்டார் கவனிக்க

:farao: இப்போ எதுக்கு ஆற்க்காட்டார்....இவரை பற்றி இப்போ ஆர் ..கேட்டார் ??? அதிகமோ!!!

அது மின்சாரம்னாலே ஆற்காட்டார் நினைவுக்கு வந்துவிடுகிறார் நான் என்ன செய்வது கொஞ்சம் ஷாட் சர்க்யூட் பிராப்ளம்