பன்றிக்காய்ச்சலுக்கு கோவை விவசாயி பலி

**சிவா** · **சிவா** Mon 2 Apr 2012 - 14:21

கோவையில் பன்றிக்காய்ச்சலினால் பாதிக்கப்பட்ட 70 வயது விவசாயி பரிதாபமாக இறந்தார். இதைத்தொடர்ந்து கோவை, திருப்பூர் மாவட்டங்களில் பன்றிக்காய்ச்சல் நோய் பரவலை கட்டுப்படுத்த சுகாதாரத்துறையினர் நடவடிக்கை மேற்கொண்டு வருகிறார்கள்.

பன்றிக்காய்ச்சல் பாதிப்பு

தமிழ்நாட்டில் கடந்த 3 ஆண்டுகளுக்கு முன்பு கோவையில் பன்றிக்காய்ச்சல் பரவியது. வெளிநாடுகளில் இருந்து வந்தவர்கள் மூலம் இந்த நோய் பரவியதாக கண்டறியப்பட்டது. பன்றிக்காய்ச்சல் பாதிப்புக்கு குழந்தை உள்பட 3 பேர் பலியான சம்பவம் கோவையில் பரிதாபத்தை ஏற்படுத்தியது.

கோவை அரசு ஆஸ்பத்திரியில் பன்றிக்காய்ச்சலுக்கு என்று சிறப்பு வார்டு அமைக்கப்பட்டதுடன், அங்கு வேலை பார்க்கும் நர்சு மற்றும் டாக்டர்களுக்கு தடுப்பூசி போடப்பட்டது. கோவையில் கடந்த சில மாதங்களாக பன்றிக்காய்ச்சல் நோய் கட்டுப்படுத்தப்பட்டு இருந்தது.

விவசாயிக்கு பன்றிக்காய்ச்சல்

திருப்பூர் மாவட்டம், காங்கேயம் அருகில் உள்ள எல்லப்பாளையம் புதூரை சேர்ந்த விவசாயி கந்தசாமி(வயது 70) கடந்த சில நாட்களாக காய்ச்சலால் பாதிக்கப்பட்டார். அவர் காங்கேயத்தில் உள்ள ஆஸ்பத்திரியில் சிகிச்சை பெற்றும் காய்ச்சல் குணமாகவில்லை. மேலும் தொண்டை வலி, தலை வலியாலும் மிகவும் அவதிப்பட்டார். இதைத்தொடர்ந்து கந்தசாமியை, கோவையில் உள்ள ஒரு தனியார் மருத்துவமனையில் சிகிச்சைக்காக சேர்த்தனர்.

அங்கு அவருக்கு தீவிர சிகிச்சை அளிக்கப்பட்டது. கந்தசாமியின் ரத்தம் பரிசோதனைக்கு அனுப்பி வைக்கப்பட்டது. பரிசோதனையின் முடிவில் கந்தசாமி பன்றிக்காய்ச்சலால் பாதிக்கப்பட்டது உறுதி செய்யப்பட்டது.

பரிதாப சாவு

இதைத்தொடர்ந்து கடந்த 13 நாட்களாக தீவிர சிகிச்சை அளிக்கப்பட்டும் குணமாகாமல் அபாய கட்டத்தை எட்டினார். இதைத்தொடர்ந்து தனியார் மருத்துவமனை நிர்வாகத்தினர் கோவை அரசு ஆஸ்பத்திரிக்கு கந்தசாமியை அனுப்பி வைத்தனர். அரசு ஆஸ்பத்திரிக்கு வந்த சிறிது நேரத்தில் கந்தசாமி பரிதாபமாக இறந்தார். இதைத்தொடர்ந்து அவருடைய உடல் உடனடியாக உறவினர்களிடம் ஒப்படைக்கப்பட்டு சொந்த ஊருக்கு அனுப்பி வைக்கப்பட்டது.

தடுப்பு நடவடிக்கை

காங்கேயம் பகுதியில் பன்றிக்காய்ச்சலால் கந்தசாமி பாதிக்கப்பட்டு இருந்ததால், திருப்பூர் மாவட்டம் முழுவதும் பன்றிக்காய்ச்சல் தடுப்பு நடவடிக்கையை சுகாதாரத்துறையினர் தீவிரப்படுத்தி உள்ளனர். இறந்த கந்தசாமியின் குடும்பத்தினர் உள்பட வேறு யாருக்கும் இந்த காய்ச்சல் பாதிப்பு உள்ளதா? என்றும் ஆய்வு செய்யப்படுகிறது. இதேபோன்று கோவை மாவட்டம் முழுவதும் பன்றிக்காய்ச்சல் பரவலை தடுக்க சுகாதாரத் துறையினர் தீவிர நடவடிக்கை மேற்கொண்டு வருகிறார்கள். தனியார் மருத்துவமனையில் அனுமதிக்கப்பட்டு இருப்பவர்களில் யாருக்காவது பன்றிக்காய்ச்சல் பாதிப்பு இருந்தால் உடனடியாக சுகாதாரத்துறைக்கு தெரிவிக்குமாறு தனியார் மருத்துவமனை நிர்வாகத்தினரை அதிகாரிகள் கேட்டுக் கொண்டுள்ளனர்.

சென்னையிலும் பன்றிக்காய்ச்சலினால் 2 பேர் பாதிக்கப்பட்டுள்ளதால், தமிழ்நாடு முழுவதும் இந்த நோயை கட்டுப்படுத்த, சுகாதாரத்துறையினர் முடுக்கி விடப்பட்டுள்ளனர்.

தினதந்தி