3 மணி நேரத்திற்காக 7000 கி.மீ., தேவையா இந்த பயணம் * இந்திய அணி தோல்வி ஏன்??

ஜோகனஸ்பர்க்:தென் ஆப்ரிக்க அணிக்கு எதிரான "டுவென்டி-20' போட்டியில், மழை வரும் என்று தெரிந்தும், வேகமாக விளையாடாததால் இந்திய அணி தோல்வியடைந்தது என்று சர்ச்சை கிளம்பியுள்ளது.ஐந்தாவது ஐ.பி.எல்., தொடர் துவங்க ஐந்து நாட்களே இருந்த நிலையில், இப்போட்டி தென் ஆப்ரிக்காவில் ஏற்பாடு செய்யப்பட்டு இருந்தது. இதில் பங்கேற்க, இந்திய வீரர்கள் மும்பையில் இருந்து 6963 கி.மீ., தூரமுள்ள ஜோகனஸ்பர்க்கை அடைய 8 மணி நேரம் ஆனது. அதேநேரம், நியூசிலாந்து தொடரில் பங்கேற்றுவிட்டு, 11796 கி.மீ., பயணம் செய்து (15 மணி நேரம்) வந்திருந்தனர் தென் ஆப்ரிக்க அணியினர். மூன்று மணி நேரம் மட்டும் நடந்த இப்போட்டிக்காக இருநாட்டு கிரிக்கெட் போர்டுகளும் ஏன், இவ்வளவு "ரிஸ்க்' எடுத்தன என புரியவில்லை. நேற்று முன்தினம் நடந்த இப்போட்டியில், முதலில் விளையாடிய தென் ஆப்ரிக்க அணி 20 ஓவரில், 4 விக்கெட்டுக்கு 219 ரன்கள் எடுத்தது. இலக்கை துரத்திய இந்திய அணி 7.5 ஓவரில், விக்கெட் இழப்பின்றி 71 ரன்கள் எடுத்த போது, மழையால் போட்டி தடைபட, "டக்வொர்த் லீவிஸ்' விதிப்படி 11 ரன்கள் பின்தங்கி இருந்ததால் இந்திய அணி தோற்றதாக அறிவிக்கப்பட்டது. காம்பிர் 49 (28 பந்து), உத்தப்பா 18 (19 பந்து) அவுட்டாகாமல் இருந்தனர்.
காரணம் என்ன:
ஏற்கனவே ஆஸ்திரேலிய தொடரில் "அடி' வாங்கிய வேகத்துடன், ஆசிய கோப்பை தொடரில் பங்கேற்க சென்றது இந்திய அணி. அங்கு "கத்துக்குட்டி' வங்கதேசத்திடம் "கடி' வாங்கியது. இந்நிலையில் ஐ.பி.எல்., துவங்க இருந்த நேரத்தில், தென் ஆப்ரிக்கா சென்று, அங்கும் "உதை' பட நேரிட்டது.
ஜோகனஸ்பர்க் மைதானத்தில் எந்த இலக்கையும் எளிதாக "சேஸ்' செய்யலாம். இந்நிலையில், 220 ரன்கள் என்ற இலக்கை துரத்திய இந்திய அணிக்கு காம்பிர் "ஜெட்' வேகத்தில் துவக்கம் தந்தார். மறுமுனையில் உத்தப்பா பந்துகளை வீணடித்தது, ரசிகர்களை வெறுப்படையச் செய்தது.
மழை வரும் என்ற நிலையில், "டக்வொர்த்-லீவிஸ்' விதிப்படி, எவ்வளவு ரன்கள் தேவை என்பதை அவ்வப்போது இவர்களிடம் எடுத்து சொல்லி இருக்க வேண்டும். அணி நிர்வாகம் எதுவும் செய்யவில்லை.
19 பந்துகளில் 18 ரன்கள் மட்டும் எடுத்து "ரிலாக்சாக' விளையாடிய உத்தப்பா, சற்று வேகம் காட்டி இருந்தால், பற்றாக்குறையாக இருந்த 11 ரன்களை எட்டி பிடித்து இருக்கலாம். மொத்தத்தில், ஆஸ்திரேலியா, வங்கதேசத்தில் அடைந்த தோல்வியுடன், 7000 கி.மீ., பயணம் செய்து தென் ஆப்ரிக்கா சென்று, அங்கும் தோற்ற சோகத்தில் தான் இந்திய அணியினர் நாடு திரும்பினர்.
ஆறு மாதமாக...
இந்திய வீரர் ஒருவர் கூறுகையில்,"" ஆறு மாதமாக போட்டிகளில் பங்கேற்பதால் குடும்பத்துடன் நேரம் செலவிட முடியவில்லை. இந்நிலையில், எவ்வித தொடர்பும் இன்றி, இப்போட்டியை ஏன் ஏற்பாடு செய்தார்கள் என்றே தெரியவில்லை. இதனால், அணியில் யாருக்குமே மகிழ்ச்சி இல்லை. இனி, உடனடியாக ஐ.பி.எல்., தொடரில் பங்கேற்க வேண்டும்,'' என்று புலம்பினார்.

தினமலர்..!