ஈரோடு - நோயாளியின் பித்தப்பையில் இருந்த 4,294 கற்கள் அகற்றப்பட்டன, உலக அளவில் அதிகபட்சம்!

உலக அளவில் அதிகபட்சமாக ஈரோட்டில் நோயாளி ஒருவரின் வயிற்றில் 4 ஆயிரத்து 294 கற்கள் அகற்றப்பட்டன.

ஓய்வு பெற்ற அதிகாரி

ஈரோடு அருகே உள்ள ஆர்.என்.புதூர் பகுதியை சேர்ந்தவர் துரைசாமி (வயது 62). ஓய்வு பெற்ற கிராம நிர்வாக அதிகாரி. சில நாட்களுக்கு முன்பு துரைசாமிக்கு வாயுத்தொல்லை ஏற்பட்டது.

இதற்கு சிகிச்சை பெறுவதற்காக ஈரோடு ஈ.வி.என். ரோட்டில் உள்ள தனியார் ஆஸ்பத்திரிக்கு வந்தார். அங்கு அவருக்கு வயிற்று நோய் சிறப்பு அறுவை சிகிச்சை நிபுணர் டாக்டர் டி.கே.சாமி பரிசோதனை செய்தார்.

பித்தப்பையில் கற்கள்

அப்போது துரைசாமியின் வயிற்றில், பித்தப்பையில் கற்கள் இருப்பதை டாக்டர் கண்டுபிடித்தார். அதைத்தொடர்ந்து பித்தப்பையில் உள்ள கற்களை அகற்ற எண்டோஸ்கோப்பி முறையில் அறுவை சிகிச்சை செய்யப்பட்டது.

சில கற்கள் இருக்கும் என்று நினைத்து அறுவை சிகிச்சையை தொடங்கிய டாக்டர்களுக்கு பெரும் ஆச்சரியம் அளிக்கும் வகையில் துரைசாமியின் வயிற்று பித்தப்பையில் 4 ஆயிரத்து 294 கற்கள் இருந்தன. தலா 1/2 கிராம் எடைக்கும் குறைவாக இருந்த இந்த கற்கள் மொத்தம் 300 கிராம் எடையளவுக்கு இருந்தன. இந்த கற்கள் இருந்ததால் துரைசாமியின் பித்தப்பை பாதிப்பு அடைந்து இருந்தது. அதையும் டாக்டர்கள் அகற்றினர்.

இதுபற்றி வயிற்றுநோய் சிறப்பு அறுவை சிகிச்சை நிபுணர் டாக்டர் டி.கே.சாமி நேற்று நிருபர்களிடம் கூறியதாவது:-

உலகில் அதிகபட்சம்

வாயு தொல்லை, சர்க்கரை நோய் இருப்பவர்களுக்கு பித்தப்பையில் கல் உருவாவதற்கு வாய்ப்புகள் அதிகம். எனவே ஒவ்வொருவரும் கண்டிப்பாக 40 வயதுக்கு மேல் எண்டோஸ்கோப்பி ஸ்கேன் செய்து கொள்ள வேண்டும்.

தற்போது துரைசாமியின் வயிற்றில் இருந்து 4 ஆயிரத்து 294 கற்கள் எடுத்து இருக்கிறோம். இதற்கு முன்பு ஜெர்மனியில் ஒரு மூதாட்டிக்கு 3 ஆயிரத்து 110 கற்கள் எடுக்கப்பட்டன. துரைசாமியின் வயிற்றில் இருந்து எடுக்கப்பட்ட கற்கள்தான் உலக அளவில் அதிகபட்ச பித்தப்பை கற்களாக பதிவு ஆகி உள்ளது.

இவ்வாறு டாக்டர் டி.கே.சாமி கூறினார்.

தினதந்தி