வி.கே.சிங் கடிதத்தை கசியவிட்டது தேச விரோத செயல்: அந்தோணி

புதுடெல்லி: ராணுவத் தலைமைத் தளபதி வி.கே.சிங் கடிதத்தை கசியவிட்டது, தேச விரோதச் செயல் என்று பாதுகாப்பு அமைச்சர் ஏ.கே.அந்தோணி குறிப்பிட்டார்.

வயது சர்ச்சை முடிவுக்கு வந்த பிறகு, ராணுவ தலைமைத் தளபதி ஜெனரல். வி.கே. சிங், ஆயுத தளவாடங்கள் கொள்முதல் தொடர்பாக, தமக்கு லஞ்சம் கொடுக்க பேரம் பேசப்பட்டதாக கூறிய புகார் பெரும் பரபரப்பை ஏற்படுத்தியது.

அந்த விவகாரம் அடங்குவதற்கு முன்பே, போர்ச் சவால்களை எதிர்கொள்ள போதுமான அளவு ஆயுதம், ராணுவத்திடம் இல்லை என்று பிரதமருக்கு வி.கே.சிங் எழுதிய கடிதம் கசிந்தது பெரும் சர்ச்சையை உண்டாக்கியது. இது, நாடாளுமன்றத்திலும் புயலைக் கிளப்பியது.

இதற்கு விளக்கம் அளித்த பாதுகாப்புத் துறை அமைச்சர் ஏ.கே. அந்தோணி, எந்தவொரு சவாலையும் எதிர்கொள்ளும் திறன், இந்திய ராணுவத்திடம் உள்ளதாக தெரிவித்தார்.

இதனிடையே, வி.கே.சிங்கின் கடிதம் கசியவிடப்பட்டது தொடர்பாக தீவிர விசாரணை மேற்கொள்ளப்பட்டு வருகிறது.

இந்த நிலையில், பாதுகாப்புத் துறை சார்ந்த நிகழ்ச்சி ஒன்றில் கலந்துகொண்ட அமைச்சர் ஏ.கே.அந்தோணி இன்று நிருபர்களிடம் கூறுகையில், "முப்படைகளின் தலைமை பொறுப்பில் வகிப்பவர்கள், அரசின் நம்பிக்கைக்கு உரியவர்களாக திகழ்கிறார்கள். ஊழலை நாம் ஏற்று கொள்ள முடியாது. தவறுகள் எந்த நிலையில் கண்டுபிடிக்கப்பட்டாலும் அதனை களைய தயங்க மாட்டோம்.

இந்தியாவை சுற்றியுள்ள நாடுகள் தங்களது பாதுகாப்பு அம்சங்களை வளப்படுத்தி வருகின்றனர். பாதுகாப்பை நாம் இன்னும் நவீனப்படுத்த வேண்டிய கட்டாயத்தில் உள்ளோம். அதற்குரிய நடவடிக்கைகளை செயல்படுத்த மிக பெரிய அளவில் முயற்சிகள் மேற்கொள்ளப்பட வேண்டும்.

ராணுவத் தலைமைத் தளபதியின் கடிதத்தை கசியவிட்டவர்களை கண்டறிவதற்கு முன்னுரிமை அளிக்கப்பட்டுள்ளது. புலனாய்வுத்துறை தீவிர விசாரணை நடத்தி வருகிறது. தேச விரோதச் செயலை செய்தவர்கள் மீது கண்டிப்பாக நவடிக்கை எடுக்கப்படும்," என்றார் பாதுகாப்பு அமைச்சர் ஏ.கே.அந்தோணி.

விகடன் .com

கடைசியில் கசிய விட்டவர் வி. கே. சிங்க் தான் என்று முடிவு செய்வார்கள்.