லொள்ளோ லொள்ளு !!!!!!

எச்சரிக்கை!குடிமகன்கள் நடமாடும் பகுதி...:

தண்ணி போட்டா தள்ளாடுவதும்,வெட்டி வீரத்துடன் சவடால் விடுவதும்,(போலீசைக்காணும்போது மட்டும் விதிவிலக்கு உண்டு)பனைமரத்திற்கு முட்டுக்கொடுத்து நிற்பதும்,சரியாய் சாக்கடை ஒரத்தில் கவிழ்ந்து கிடப்பதும், குடிகாரர்களின் தனி அடையாளமாகிவிட்டது.இந்த நிலையில் நாம்தான் ஜாக்கிரதையாக ஒதுங்கி செல்லவேண்டும்.இல்லாவிட்டால் ஏறிய போதை இறங்கும் வரை பலியாகவேண்டி இருக்கும்.எதற்கும் ஜனங்களுக்கு ஒரு எச்சரிக்கையாக இருக்கட்டுமே என்பதற்காக , பழையங்குடி ஊராட்சி தலைவரும்,உப தலைவரும் சேர்ந்து மதுபானக்கடை பகுதி ஆகவே வாகனங்கள் மெதுவாக செல்லவும் என்று ‘நாசூக்காக’ போர்டு வைத்துள்ளனர்.

உயிர் மண்ணுக்கு உடல் திரிஷாவுக்கு

தூத்துக்குடி மாவட்டம் எட்டயபுரம் தாலுகாவை சேர்ந்த விளாத்திகுளம் பகுதியில் 1958-ம் ஆண்டு எஸ்.எஸ்.எல்.சி.,படித்த (அன்றைய)மாணவர்களும்,இன்றைய ஊர் பெரியவர்களுமான சிலர் ஒன்று சேர்ந்து ஊருக்கும்,தங்களுக்கும் பெருமை சேர்க்கும்(!) அருமையான காரியத்தை செய்திருக்கின்றனர்.

அந்த காரியம் என்னவென்றால் நடிகை திரிஷாவிற்கு பிறந்த நாள் வாழ்த்து தெரிவித்து பிரம்மாண்டமாய் ‘பிளக்ஸ்’ பேனர்கள் வைத்துள்ளனர். திரிஷாவின் பெரிய படத்தை போட்டவர்கள் மறக்காமல் திரிஷாவின் படத்திற்கு கீழ் முறுக்கு மீசையுடன் கூடிய தங்களது சிறிய படங்களையும் போட்டுள்ளார்கள். மேலும் ‘திரிஷாவின் சிரிப்பு, திகட்டாத இனிப்பு’ என்று கவிதை படித்து இருக்கிறார்கள் அதுவும் போதது என்று ‘சினிமா உலகின் சிரிப்பு ராணி’ என்று பட்டம் வேறு கொடுத்து இருக்கிறார்கள்.

முத்தாய்ப்பாக எங்களைப் போல (நீண்டகாலம்)வாழ்க, வாழ்க என்று மனமுவந்து வாழ்த்தியிருக்கிறார்கள்.

ஏல இமயமல எங்க ஊரு சாமிமல எல்லாம் அவரே

தேமுதிக தலைவர் விஜயகாந்தை அவரது தொண்டர்கள் போஸ்டர் மூலம் வாழ்த்துகிறார்களா? அல்லது மறைமுகமாக அவரை கவிழ்க்க பார்க்கிறார்களா? தெரியவில்லை,இங்கே அவரை பகத்சிங்காக,பாரதியராக,நேதாஜியாக,லால்பகதுõர் சாஸ்திரியாக,வ.உ.சியாக சித்தரித்து பிரம்மாண்டமாக பிளக்ஸ் பேனர் வைத்துள்ளனர்.கருப்பு கண்ணாடி,வெள்ளை தொப்பி போட்டு எம்ஜிஆர் கெட்டப்பில் போஸ்டர் ஒட்டிய போதே, விஜயகாந்த் ஏன் இன்னோரு தலைவரை காப்பியடிக்கிறார்.,அவர் அவராகவே இருந்தால்தான் நல்லது என்று, மக்கள் விமர்சனம் செய்தார்கள்.,இந்த நிலையில் இப்போது இந்த மாதிரி பேனரை பார்க்கும் மக்கள் என்ன சொல்வார்களோ?