சரக்கு விலை எகிறும்; கோதுமை விலை குறையும்: கூடுதல் வருவாய் எதிர்பார்ப்பு

**krishnaamma** · **krishnaamma** Tue Mar 27, 2012 1:23 pm

சென்னை : ஆடம்பர குடி மையங்களில் அருந்தும் சரக்கு விலை உயர்கிறது. கோதுமை, ஓட்ஸ், இன்சுலின் உள்ளிட்டவை விலை குறைகின்றன. இந்த வரி சீரமைப்பின் மூலம், அரசுக்கு கூடுதலாக 1,500 கோடி ரூபாய் வருவாய் கிடைக்கும் என எதிர்பார்க்கப்படுகிறது.

இது தொடர்பாக, தமிழக அரசின் பட்ஜெட்டில் அறிவிக்கப்பட்டுள்ளதாவது:கோதுமை மீது தற்போது விதிக்கப்படும் 2 சதவீத, "வாட்' முற்றிலும் விலக்கிக் கொள்ளப்படும். ஓட்ஸ் மீது தற்போது விதிக்கப்படும் 5 சதவீத, "வாட்' விலக்கிக் கொள்ளப்படும்.சுற்றுச்சூழலுக்கு உகந்த சாதனங்களை ஊக்குவிக்கும் விதமாக, மின் சக்தியால் இயங்கக்கூடிய இரு சக்கர வாகனங்களுக்கு விதிக்கப்படும், "வாட்' 14.5 சதவீதத்தில் இருந்து 5 சதவீதமாகக் குறைக்கப்படும்.

மின்சாரத்தைச் சேமிக்கும் சாதனங்களை ஊக்குவிக்கும் விதமாக, காம்பேக்ட் ப்ளோரசன்ட் விளக்குகள் (சி.எப்.எல்.,) மற்றும் காம்பேக்ட் ப்ளோரசன்ட் குழல் விளக்குகளுக்கு, "வாட்' 14.5 சவீதத்தில் இருந்து 5 சதவீதமாகக் குறைக்கப்படும்.பெருகி வரும் சர்க்கரை நோயைக் கருத்தில் கொண்டு, "இன்சுலின்' மருந்துகளின் விலையைக் குறைக்கும் விதமாக, அதன் மீது தற்போது விதிக்கப்படும் 5 சதவீத, "வாட்' முற்றிலும் விலக்கப்படும்.உள்ளூர் தீக்குச்சித் தொழிற்சாலைகள், வெளிச்சந்தை போட்டியைச் சமாளிக்கும் வகையில், மரக்குச்சிகள் மற்றும் மரப்பட்டைகளுக்கு தற்போது விதிக்கப்படும் 14.5 சதவீத, "வாட்' 5 சதவீதமாகக் குறைக்கப்படும்.பெண்கள் மற்றும் குழந்தைகளின் சுகாதாரத்தை மேம்படுத்த, இந்த அரசு எடுத்து வரும் பல்வேறு முயற்சிகளின் தொடர்ச்சியாக, சானிடரி நாப்கின்கள் மற்றும் டயாபர்கள் மீது தற்போது விதிக்கப்படும், "வாட்' 14.5லிருந்து 5 ஆகக் குறைக்கப்படும்.கையால் தயாரிக்கப்படும் பூட்டுகளுக்கு விதிக்கப்படும் 5 சதவீத, "வாட்' முற்றிலும் விலக்கப்படும். பாலூட்டும் புட்டிகள், பாலூட்டும் காம்புகளுக்கு விதிக்கப்படும் 5 சதவீத, "வாட்' முற்றிலும் விலக்கப்படுகிறது.

போக்குவரத்து மற்றும் தொழிற்சாலை பாதுகாப்பை மேம்படுத்தும் விதமாக, தலைக் கவசத்துக்கு (ஹெல்மெட்) விதிக்கப்படும் 5 சதவீத, "வாட்' நீக்கப்படுகிறது.வெளிமாநிலங்களில் இருந்து வாங்கியோ, கொள்முதல் செய்தோ, கொண்டு வந்தோ விற்பனை செய்யப்படும், அனைத்து வகையான மது வகைகளுக்கும், இரண்டாவது கட்ட விற்பனை நிலையில் 14.5 சதவீதமும், அனைத்து மதுபானங்களுக்கு மூன்றாவது கட்ட விற்பனை நிலையில் 14.5 சதவீதமும் விற்பனை வரி விதிக்கப்படும்.ஆண்டுக்கு ஐந்து கோடி ரூபாய்க்கு குறைவாக தாவர எண்ணெய்களின் விற்பனை அளவு இருந்தால், அதற்கு அளிக்கப்பட்டு வந்த, "வாட்' விலக்கு நீக்கப்பட்டு, 5 சதவீதம், "வாட்' விதிக்கப்படும்.வாகனங்கள் மீதான வரியை சீரமைக்கும் விதமாக, சுற்றுலாப் பயண வாகனங்கள், மாக்சி வாகனங்கள், தனியார் சேவை வாகனங்கள், மாற்றுப் பேருந்து வாகனங்கள், கட்டுமானம் போன்றவற்றுக்காக பயன்படுத்தப்படும் வாகனங்கள், பிற மாநில ஒப்பந்த வாகனங்கள் மீதான வரிகள் சீரமைக்கப்படுகின்றன.முன்னுரிமையில் விருப்ப எண்களைப் பதிவு செய்வதற்கான கட்டணம் இரு மடங்காக உயர்த்தப்பட்டு, சில மாற்றங்கள் செய்யப்படும். இந்த மாற்றங்கள், இரு சக்கர வாகனங்களுக்குப் பொருந்தாது.தற்போது உள்ளூர் திட்ட அமைப்புகள் மூலம் வசூலிக்கப்பட்டு வரும் கட்டமைப்பு மற்றும் அடிப்படை கட்டணம், தற்போதுள்ள கட்டண அளவில் 50 சதவீதம் உயர்த்தி நிர்ணயிக்கப்படும்.கூடுதல் வருவாயைத் திரட்ட எடுக்கப்படும் இந்த நடவடிக்கைகளின் காரணமாக, மாநில அரசுக்கு 1,500 கோடி ரூபாய் கூடுதலாகக் கிடைக்கும். இதன் மூலம் இந்த அரசு, மக்கள் நலத் திட்டங்களையும், வளர்ச்சித் திட்டங்களையும் நிதிப் பற்றாக்குறை ஏதுமின்றி சிறப்பாகச் செயல்படுத்த இயலும்.