உடற்பயிற்சியின் பலன்கள்

**சிவா** · **சிவா** Mon Mar 26, 2012 8:57 am

தொடர்ந்து உடற்பயிற்சி செய்து வந்தால் கட்டுமஸ்தான உடலமைப்பு, உறுதியான தசைகள், ஆரோக்கியமான உடல் என பல பலன்கள் கிடைக்கும் என்பது நாம் அறிந்ததே. ஆனால், இந்த பலன்களுக்கு காரணமான உடலியல் நிகழ்வுகள் என்ன, நம் உடலை ஆரோக்கியமாகவும் உறுதியாகவும் வைத்துக்கொள்ள உடற்பயிற்சி எப்படி உதவுகிறது என்பது குறித்து நமக்குத் பெரிதாக ஒன்றும் தெரியாது.

இது குறித்து நமக்கு மட்டுமல்ல, உடற்பயிற்சி தொடர்பான ஆய்வுகளைச் செய்யும் விஞ்ஞானிகளுக்கும் இன்னும் சரியாகப் புரியவில்லை என்பதுதான் உண்மை. ஆனால், டென்மார்க் நாட்டின் கோபன்ஹேகன் நகரில் சமீபத்தில் நடந்த ஆய்வு ஒன்றில், `உயிரணுக்களின் சக்தியை முறைப்படுத்தும் மரபணுக்களை உடற்பயிற்சி தூண்டுகிறது' என்று கண்டறியப்பட்டிருக்கிறது. மேலும், கடினமான உடற்பயிற்சிக்கு பிறகு ஒருவருடைய தசை உயிரணுக்களிலுள்ள டி.என்.ஏ.வில் சில வேதியியல் மாற்றங்கள் நிகழ்வதும் தெரியவந்துள்ளது என்கிறார் ஆய்வாளர் ரோமெய்ன் பார்ஸ்.

இரண்டு முக்கியமான விவரங்களை முன்வைக்கிறது இந்தப் புதிய ஆய்வு. ஒன்று, உடற்பயிற்சியினால் உயிரணுக்களுக்கு உண்டாகும் பயன்களுக்கு காரணமான நுண்ணிய உடலியல் நிகழ்வுகள், மாற்றங்கள் என்னென்ன என்பது. மற்றொன்று, ஒருவருடைய சுறுசுறுப்பான வாழ்க்கைமுறையினால் உண்டாகும் பயன்கள் அவருடைய அடுத்தடுத்த சந்ததிகளுக்கும் சென்றடைகிறதா இல்லையா என்பது குறித்த கேள்விகள் மற்றும் சந்தேகங்கள்.

அதாவது, நம்முடைய தாய் தந்தையர் சுறுசுறுப்பாக இருந்ததால் அல்லது இல்லாததால் ஏற்பட்ட பின்விளைவுகள், அவர்களிடம் இருந்து நாம் பெற்ற மரபணுக்கள் மூலம் நமக்கும் வந்திருக்கிறதா என்பது குறித்த புரிதல்.

பொதுவாக, மரபணுக்களில் உள்ள டி.என்.ஏ.வில் நிகழும் மீதைலேஷன் (ஙக்ஞ்குட்ஙீஹஞ்கூச்ஙூ - மீதைல் குரூப் எனும் வேதியியல் மூலக்கூறுகளை டி.என்.ஏ.வுடன் சேர்த்தல்) எனப்படும் ஒருவகை வேதியியல் மாற்றத்தின் மூலம் ஒரு மரபணுவின் செயல்பாடுகளை தூண்டவும் முடியும், தடை செய்யவும் முடியும். அதாவது, மீதைலேஷன் அதிகமாக நிகழ்ந்தால் மரபணு செயல்பாடு தடைபடும். குறைவாக நிகழ்ந்தால் மரபணு செயல்பாடு சீராக இருக்கும். சுருக்கமாகச் சொன்னால், மீதைலேஷன் அளவின் மூலம் மரபணுக்களில் இருந்து உற்பத்தியாகும் புரதங்களின் அளவை கட்டுப்படுத்த முடியும் என்கிறது மரபணுவியல்.

இதற்கு முந்தைய ஆய்வுகளில், உயிரணுக்களுக்கு தேவையான சக்தியை உற்பத்திசெய்யும் தொழிற்சாலையான `மைட்டோகான்ட்ரி'யாக்களை முறைப்படுத்தும் மரபணுக்களின் செயல்பாடுகளை உடற்பயிற்சி அதிகப்படுத்துகிறது என்பது மட்டும் கண்டறியப்பட்டது. ஆனால், இதற்கு அடிப்படை காரணம் என்ன என்பது இதுவரை தெரியவில்லை.

இந்த புதிய ஆய்வில், மிகவும் அதிகபட்சமான மற்றும் குறைந்தபட்ச சைக்கிள் ஓட்டும் உடற்பயிற்சி செய்தவர் களின் தொடையிலிருந்து அறுவை செய்து எடுக்கப்பட்ட தசை உயிரணுக்கள் பரிசோதனை செய்யப்பட்டன. அவற் றின் டி.என்.ஏ.வில் அதிகபட்சமான உடற்பயிற்சிக்கு பிறகு மிகவும் குறைவான மீதைலேஷனும், குறைவான உடற்பயிற்சிக்கு பிறகு அதிகமான மீதைலேஷனும் நிகழ்ந்திருந்தது. இதனால் உடற்பயிற்சியின் அளவுக்கு ஏற்றவாறு தசை உயிரணுக்களின் சக்தியை முறைப்படுத்தும் புரதங்களின் அளவும் மாறியிருந்தது கண்டறியப்பட்டது.

மற்றொரு பரிசோதனையில், எலியின் தசை உயிரணுக்களில் (காபியில் இருக்கும் வேதியியல் மூலக்கூறான) `காபீன்' செலுத்தப்பட்டது. ஒரு தசையின் சுருங்கி விரியும் திறனுக்கு காரணமான கால்சியத்தின் அளவினை, தசை உயிரணுக்களில் அதிகப்படுத்த வல்லது இந்த `காபீன்'. இது செலுத்தப்பட்ட எலியின் தசை உயிரணுக்களில் குறைவான மீதைலேஷன் நிகழ்ந்து அதிகமான புரத உற்பத்தி தொடங்கியிருந்ததும் கண்டறியப்பட்டது.

இந்த ஆய்வின் மூலம், மீதைலேஷன் போன்ற வேதியியல் நிகழ்வுகள் தசை வளர்ச்சி மற்றும் செயல்பாட்டுக்கு எந்த வகையில் உதவுகின்றன என்பது குறித்த புதிய புரிதல்கள் ஏற்பட்டிருக்கிறது என்கிறார் வாஷிங்டன் ஸ்டேட் பல்கலைக்கழகத்தின் ஆய்வாளர் மைக்கேல் ஸ்கின்னர்.

மேலும், இந்த ஆய்வு முடிவுகளிலிருந்து பொதுமக்களாகிய நமக்கு கிடைக்கும் படிப்பினை என்னவென்றால், இளமையிலேயே உடற்பயிற்சி செய்யத் தொடங்கிவிட்டால் தசை வளர்ச்சியானது மிகவும் சீராகவும், ஆரோக்கியமாகவும் இருக்கும் என்பதுதான்.

மிக முக்கியமாக, மீதைலேஷன் மாற்றங்கள் டி.என்.ஏ. அல்லது மரபணுவில் நிகழ்கின்றன. இந்த மரபணுக்கள் ஒருவரிடமிருந்து அவருடைய சந்ததிக்கு செல்லும்போது அதிலிருக்கும் மீதைலேஷன் மாற்றங்களும் அப்படியே சென்றடைய வாய்ப்பிருக்கிறது என்பது குறிப்பிடத்தக்கது. இதனால்தான் நம்முடைய வாழ்க்கை முறையின் பயன்கள் அல்லது பாதிப்புகள் நம் சந்ததிக்கும் சென்றுவிட வாய்ப்பிருக்கிறது என்கிறார்கள் மரபியல் ஆய்வாளர்கள்.
-முனைவர் பத்மஹரி