மனிதர்கள் விற்பனைக்கு! - கலை என்ற பெயரில் புது வியாபாரம்

`கொத்தடிமை முறை ஒழிந்துவிட்டதா?' என்று கேட்டால், `பட்'டென்று `ஒழிந்து விட்டது' என்பீர்கள். ஆனால் கலை என்ற பெயரில் அது திரும்பி வந்திருக்கிறது. பட்டப் பகலில், பட்டவர்த்தனமாக, `நான் விற்பனைக்கு' என்ற அறிவிப்பைத் தாங்கி நிற்கிறார்கள் சிலர்.

அதிர்ச்சியாக இருக்கிறதா? தொடர்ந்து படியுங்கள்...

இந்தியாவின் மும்பை, சுவிட்சர்லாந்தின் ஜுரிச் என்று மாறி மாறிச் செயல்படும் ஓவியர், பிரீத்தி சந்திரகாந்த். கருத்து அடிப்படையிலான கலையில் கவனம் செலுத்திவரும் பிரீத்தி, `வாழும் கலைப் படைப்புகள்' என்ற பெயரில் மனிதர்களை விற்பனைக்கு அறிவித்திருக்கிறார். இது தனது சோதனை முயற்சி என்று கூறும் பிரீத்தி, இப்போதைக்கு 6 பேரை விற்பனைக்கு நிறுத்தியிருக்கிறார், அவர்களை `வாங்குவோர்' தன்னை ஏற்கனவே அணுகியிருப்பதாகவும் கூறுகிறார்.

``முதல் வாடிக்கையாளரை நாங்கள் உலக அளவில் எதிர்பார்த்திருக்கிறோம். இதுவரை பலர் எங்களிடம் விசாரித்திருக்கிறார்கள். இம்மாதிரியான ஒரு கலைப் படைப்பை நீங்கள் வாங்குவது ஆர்வமூட்டுவதாகவே இருக்கும்'' என்கிறார் பிரீத்தி.

கருத்து சார்ந்த ஓவியர், சிந்தனையாளர் ரொமானோ பேசியாட்டி உடன் இணைந்து செயல்படும் பிரீத்தி, மனித கலைப் படைப்புகளை உருவாக்கும் யோசனை, பிரெஞ்சு கருத்தோவியர் யுவென் கிளெய்னின் கருத்தில் இருந்து பிறந்ததாகக் கூறுகிறார். கலைஞர்கள் தங்களைத் தாங்களே ஆள வேண்டும் என்று கூறுபவர் கிளெய்ன்.

``நாங்கள் உண்மையில் அந்த லெவலுக்கு போயிருக்கிறோம். கலைஞர்கள் தங்களைத் தாங்களே ஆள்வதோடு மட்டுமின்றி, மற்றவர்களையும் கலையாக உருவாக்க வேண்டும், அவர்களில் இருந்து கலைப் படைப்புகளை உருவாக்க வேண்டும்'' என்கிறார் பிரீத்தி.

கடந்த 2002-ம் ஆண்டிலேயே தனது இந்தப் புதுமை (?) முயற்சியைத் தொடங்கிவிட்டார் பிரீத்தி. தங்களைக் கலைப் படைப்பாக்குவதற்கு சுமார் ஆயிரம் பேர் தாமாகவே முன்வந்தார்கள் என்பதும் ஆச்சரியமூட்டும் விஷயம். ஆனால், விற்கத் தகுந்தவர்களாக 6 பேர் மட்டும் (3 இந்தியர்கள், 3 ஐரோப்பியர்கள்) தேர்ந்தெடுக்கப்பட்டிருக்கிறார்கள்.

சரி, இந்த உயிருள்ள கலைப் படைப்பை வைத்து என்ன செய்வது?

கலைப்பொருளை எப்படி உங்கள் வீட்டில் நீங்கள் விரும்பிய இடத்தில் வைத்து அலங்கரிப்பீர்களோ, அதைப்போல, `இவர்களை' உட்காரவோ, நிற்கவோ வைக்கலாம். பூங்கா, அருங்காட்சியகம் என்று நீங்கள் விரும்பிய இடத்துக்கு அனுப்பலாம். அவர்கள் சென்றுவந்து, தங்களின் அனுபவங்களை உங்களிடம் சமர்த்தாக விவரிப்பார்கள். சுருக்கமாகச் சொல்வதென்றால், உங்களின் `அறிவுஜீவித்தனமான நீட்சி'யாக இவர்கள் இருப்பார்கள்.

ஆனால் கலைப்படைப்பு என்று கூறினாலும், `விற்கப்படுவது' என்பது அவமானகரமானது இல்லையா?

அப்படியில்லை என்கிறார், மும்பையைச் சேர்ந்த `உயிருள்ள கலைப் படைப்பான' புருஷார்த்த சைனி.

``விற்கப்படுவதில் எனக்கு முழுச் சம்மதம். என்னுடைய ஒப்புதலைப் பெற்றபின்தான் என்னை விற்பதாக அறிவித்தார்கள்'' என்றும் கூறும் இவர், சாதாரணமாகத் தெருவில் போகிறவர் இல்லை. ஐ.ஐ.டி. பட்டதாரி. ஓவியர் பிரீத்தியின் மேலாளரும் கூட. இவர் தனக்கான `விலை'யை மட்டும் கூற மறுக்கிறார்.

ஒப்புதலை தெரிவித்தபின், பரிமாற்றம், விதிகள், கட்டுப்பாடுகள், `பேக்கேஜிங்', காப்பீடு, மறுவிற்பனை, ஏலம் போன்ற பல விஷயங்களைப் பிரீத்தி தெளிவாக விளக்கியதாகக் கூறுகிறார் இவர்.

ஆனால் மனிதர்களை விற்பது எப்படி கலை ஆகும் என்ற கேள்விக்கு சைனி தடுமாறாமல் பதில் கூறுகிறார்,

``நான் அறிந்தவரை, மனிதர்களை அவர்களின் சொந்த ஒப்புதலுடன் விற்றால் அது சட்டப்பூர்வமானதே.''

இந்த விஷயத்துக்கு மனித உரிமை ஆர்வலர்களிடம் இருந்து எதிர்ப்புக் கிளம்பலாம் என்று அறிந்து அதற்கும் தயாராக இருப்பதாகக் கூறுகிறார் இவர்.

``மனித உரிமை ஆர்வலர்கள் இதை எதிர்த்தால் அவர்களை சட்டப்பூர்வமாக எதிர்கொள்ள நான் தயாராயிருக்கிறேன். விற்கப்படுவதில் நான் உறுதியாக இருப்பேன். உங்களின் சுதந்திரத்தைப் பாதிக்காத ஒன்றை நான் செய்தால், அதற்கு எப்படி நீங்கள் கேள்வி எழுப்ப முடியும்?'' என்று கேட்கிறார் சைனி.

இப்படி விற்கப்படுபவர்களும், விற்பவர்களும் உறுதியாக இருந்தாலும், பழைய கொத்தடிமை முறையின் நவீன வடிவம்தான் இது என்கிறார்கள் விமர்சகர்கள்.

`விற்கப்படுவதற்கான உரிமை' என்பது நாளையே `சாவதற்கான உரிமை'யில் போய் நிற்கும். பெண் சிசுக்கொலை பெரும்பாலும் பெற்றொரின் ஒப்புதலுடன் நடப்பதால் அதுவும் சரிதான் என்று வாதிடத் தொடங்குவார்கள் என்கிறார்கள்.

உலகமெங்கும் மனிதக் கடத்தலும், விற்பனையும் பெரும் அளவில் நடந்துகொண்டிருக்கும் நிலையில் அதை இப்படிச் சட்டபூர்வமாக்குவது பெரும் விபரீதமாக முடியும் என்பது சமூக ஆர்வலர்களின் அச்சம்.

ஆனால், தான் ஒன்றும் மலிவான விளம்பரம் தேடவில்லை. கலைப் பொருட்களில் இருந்து மனிதர்களை நோக்கி அனைவரின் கவனத்தைத் திருப்புவதற்காகவே இவ்வாறு செய்கிறேன் என்று வாதிடுகிறார் பிரீத்தி சந்திரகாந்த்.

வாதங்கள், பிரதிவாதங்கள் மத்தியில், `உயிருள்ள கலைப் படைப்புகள்' விற்பனைக்குக் காத்திருக்கின்றன.

தினதந்தி

பகிர்வுக்கு நன்றி சிவா... இது ஏற்கெனவே வந்து விட்ட செய்தி இருப்பினும் ...

அறிவியல் மருத்துவம் இவைகளிலும் சிலர் தங்களை விற்று கொண்டு இருக்கிறார்கள்