இலங்கை அகதிகள் முகாம்: ரூ.25 கோடி ஒதுக்கீடு

இலங்கை அகதிகள் முகாமில் அடிப்படை வசதிகள் செய்து கொடுக்க ரூ.25 கோடி ஒதுக்கீடு - ஜெயலலிதா உத்தரவு

தமிழகத்தில் உள்ள இலங்கை அகதிகள் முகாம்களில் வாழும் தமிழர்களுக்கு அடிப்படை வசதிகள் செய்து கொடுப்பதற்காக ரூ.25 கோடியை முதல்-அமைச்சர் ஜெயலலிதா ஒதுக்கியுள்ளார்.

இதுகுறித்து அரசு நேற்று வெளியிட்ட செய்திக்குறிப்பில் கூறியிருப்பதாவது:-

விடுதிகளில் கூடுதல் இடங்கள்

தமிழகத்தில் உள்ள அகதிகள் முகாம்களில் தங்கி வாழும் இலங்கை தமிழர்கள் நலன் காக்க முதல்-அமைச்சர் ஜெயலலிதா தலைமையிலான அரசு பல்வேறு நடவடிக்கைகளை எடுத்து வருகிறது. அகதிகள் முகாம்களில் வாழும் இலங்கைத் தமிழர்களின் குழந்தைகள் தங்கி படிப்பதற்காக ஆதிதிராவிடர் மற்றும் பிற்படுத்தப்பட்டோர் நல விடுதிகளில் கூடுதல் இடங்கள் ஏற்படுத்தப்பட்டு உள்ளது.

மேலும், தமிழக அரசால் பல்வேறு சமூகப் பாதுகாப்புத் திட்டங்களின் கீழ் வழங்கப்படும் ஓய்வூதியப் பலன்களையும் இலங்கை தமிழர்களுக்கு வழங்க மாண்புமிகு முதல்-அமைச்சர் ஜெயலலிதா ஏற்கெனவே உத்தரவிட்டுள்ளார்.

படிப்புக்கு ஊக்கத் தொகை

தமிழ்நாட்டிலுள்ள அகதிகள் முகாம்களிலிருந்து கல்லூரிகளில் உயர்கல்வி மேற்கொள்ளும் இலங்கைத் தமிழ் அகதிகள் குடும்ப மாணவ மாணவியருக்கு, ஆண்டு ஒன்றுக்கு இளங்கலை (பி.ஏ.) பயிலுவோருக்கு 1,200 ரூபாயும், இளம் அறிவியல் (பி.எஸ்சி) பயிலுவோருக்கு 1,250 ரூபாயும், முதுகலை (எம்.ஏ.) பயிலுவோருக்கு 1,330 ரூபாயும், முதுகலை அறிவியல் (எம்.எஸ்சி) பயிலுவோருக்கு 1,650 ரூபாயும், தொழில்நுட்ப கல்வி (டிப்ளமா) பயிலுவோருக்கு 850 ரூபாயும்,

பொறியியல் (பி.இ.) பயிலுவோருக்கு 2,750 ரூபாயும், மருத்துவம் (எம்.பி.பி.எஸ்.) பயிலுவோருக்கு 4,700 ரூபாயும், கால்நடை மருத்துவம் (பி.வி.எஸ்.சி) பயிலுவோருக்கு 1,400 ரூபாயும், சட்டம் (பி.எல்.) பயிலுவோருக்கு 860 ரூபாயும், வேளாண்மை அறிவியல் (பி.எஸ்சி. அக்ரி) பயிலுவோருக்கு 2,850 ரூபாயும் ஊக்கத் தொகையாக வழங்க முதல்-அமைச்சர் ஜெயலலிதா உத்தரவிட்டுள்ளார். இதன்மூலம், 1,000 இலங்கை தமிழர் அகதி மாணவ மாணவியர் பயன்பெறுவர். இதற்காக அரசுக்கு 20 லட்சத்து 98 ஆயிரம் ரூபாய் செலவு ஏற்படும்.

அடிப்படை வசதிகளுக்கு ரூ.25 கோடி

இலங்கை அகதிகள் முகாம்களில் தற்பொழுது இயங்கி வரும் 416 மகளிர் சுய உதவிக் குழுக்களுக்கு ஒரு தடவை மானியமாக ஒவ்வொரு குழுவிற்கும் 10,000 ரூபாய் வழங்க முதல்-அமைச்சர் உத்தரவிட்டுள்ளார். இதனால் அரசுக்கு 41 லட்சத்து 60 ஆயிரம் ரூபாய் செலவு ஏற்படும்.

தமிழகத்திலுள்ள இலங்கை அகதிகள் முகாம்களில் வாழும் தமிழர்களின் நலனைக் கருத்தில் கொண்டு அந்த முகாம்களில் வசிக்கும் மக்களின் குடிநீர் வசதியினை மேம்படுத்தும் பொருட்டு ரூ.4 கோடியே 33 லட்சத்து 38 ஆயிரம் நிதி ஒதுக்கீடு செய்தும், முகாம்களில் கட்டப்பட்டுள்ள வீடுகளை பழுதுபார்த்தல், சாலைகளை சீரமைத்தல், நூலகக் கட்டிடம் கட்டுதல், ரேஷன் கடை அமைத்தல், கூடுதல் கழிப்பறை மற்றும் குளியலறை ஏற்படுத்துதல், சமுதாய கூடங்கள் அமைத்தல், மின்கம்பங்கள் மற்றும் தெரு விளக்கு அமைத்தல், சமையலறை கட்டுதல் போன்ற அடிப்படை வசதிகளை செய்து கொடுக்கும் பணிகளுக்காக ரூ.20 கோடியே 66 லட்சத்து 62 ஆயிரம் நிதி ஒதுக்கீடு செய்தும், ஆக மொத்தம் இலங்கை அகதிகள் முகாம்களில் அடிப்படை வசதிகளை மேற்கொள்வதற்காக ரூ.25 கோடி நிதி ஒதுக்கீடு செய்து முதல்-அமைச்சர் ஜெயலலிதா உத்தரவிட்டுள்ளார்.

விரிவான மருத்துவக் காப்பீட்டுத் திட்டம்

தமிழக மக்களுக்காக அமல்படுத்தப்படும் அனைத்து நலத் திட்டங்களையும் அகதிகள் முகாம்களில் வசிக்கும் இலங்கை தமிழர்களுக்கும் வழங்கி வரும் முதல்-அமைச்சர், சமீபத்தில் தமிழக மக்களுக்கு அறிமுகப்படுத்தப்பட்ட முதல்-அமைச்சரின் விரிவான மருத்துவ காப்பீட்டுத் திட்டத்தினை அகதிகள் முகாம்களில் வசிக்கும் இலங்கை தமிழர்கள் அனைவருக்கும் விரிவுபடுத்த ஆணையிட்டுள்ளார். அரசின் இந்த நடவடிக்கைகள் மூலம், அகதிகள் முகாம்களில் வசிக்கும் இலங்கைத் தமிழர்களின் வாழ்வில் மேலும் வளம் ஏற்படும்.

இவ்வாறு செய்திக்குறிப்பில் கூறப்பட்டுள்ளது.

தினதந்தி

திட்டங்களை நடைமுறைப் படுத்தி நலம் செய்க
ஒதுக்கீடை ஒதுக்க திட்டம் தீட்டாமல்.