மயங்கி விழுந்ததால் சச்சின் காயம்

கடந்த செவ்வாய்கிழமை இரவு, தென் ஆப்ரிக்க ஓட்டலில் சச்சின் டெண்டுல்கர், மயக்கமடைந்து விழுந்துள்ளார்.
சாம்பியன்ஸ் டிராபி போட்டியில், பங்கேற்பதற்காக சச்சின் தென் ஆப்ரிக்கா சென்றிருந்தார். தரையில் விழுந்த அவருக்கு மூக்குப் பகுதியில் லேசான வெட்டுக் காயமும் இடது கண்ணுக்கு கீழே, கன்னத்தில் சிறிய காயமும் ஏற்பட்டுள்ளது.
சாம்பியன்ஸ் டிராபியில், அரை இறுதிப் போட்டிக்கு இந்திய அணி தகுதி பெறவில்லை. இதையடுத்து, யூசுப் பதான், அபிஷேக் நாயர், அணி நிர்வாகி அனுராக் தாகூர், பிசியோதெரபிஸ்ட் நிதின் படேல், மசாஜர் ரமேஷ் மானே ஆகியோர், தென் ஆப்ரிக்காவிலிருந்து சச்சினுடன் நாடு திரும்பினர். சச்சினுடன் அவர்களும் அவரது வீட்டுக்கு நேற்று வந்தனர். தோனி உள்ளிட்ட மற்ற வீரர்கள் அடுத்த விமானத்தில் நாடு திரும்பினர்.
மும்பை விமான நிலையத்தில் சச்சினின் வருகைக்காக பத்திரிகையாளர்கள் காத்திருந்தனர். வீங்கியிருந்த கண்ணுடன் நாடு திரும்பிய சச்சின் அவர்களை சந்திக்கவில்லை.
"புட் பாய்சன்' ஏற்பட்டதாகக் கூறி, கடந்த புதன் கிழமை வெஸ்ட் இண்டீசுக்கு எதிரான போட்டியில், சச்சின் விளையாடவில்லை. போட்டி நடப்பதற்கு முந்தைய தினமான செவ்வாய்க்கிழமை, ஜோகனஸ்பர்க்கில் உள்ள ஓர் இந்திய ரெஸ்டாரன்டில் சச்சின், தோனி, நெஹ்ரா மற்றும் ஹர்பஜன் சிங் ஆகியோர் சாப்பிட சென்றனர்.
அந்த ரெஸ்டாரன்ட் மீன் கறி மற்றும் "பிரைடு ரைசுக்கு' பெயர் பெற்றது. இவ்விரு உணவு வகைகளையும் அவர்கள் விரும்பி சாப்பிட்டுள்ளனர். ஓட்டல் அறைக்கு திரும்பிய போது, அவருக்கு லேசான மயக்கம் ஏற்பட்டிருக்கிறது. அப்போது அவர் தன்னை அறியாமல் மயங்கி விழுந்தார்.
சற்று நேரத்தில் அவரது அறைக்கு திரும்பிய வீரர்கள் சச்சின் விழுந்து காயப்பட்டிருப்பதை அறிந்து, முதலுதவி சிகிச்சைக்கு ஏற்பாடு செய்தனர்.
இதையடுத்து, மறுநாள் நடந்த போட்டியில் பங்கேற்க வேண்டாம் என்று அப்போது சச்சின் முடிவு செய்தார். "புட் பாய்சனால்' அவருக்கு வயிற்றில் தொற்று ஏற்பட்டது என்றுதான் மறுநாள் அறிவிக்கப்பட்டது. ஆனால், அவர் மயக்கமடைந்ததால்தான் மறுநாள் போட்டியில் பங்கேற்கவில்லை என்பது தற்போது தெரியவந்துள்ளது.