கூடங்குளம், இடிந்தகரைக்கு செல்லும் பாதையில் மரங்களை வெட்டி குறுக்கே போட்டதால் பஸ் போக்குவரத்து துண்டிப்பு

கூடங்குளம், இடிந்தகரைக்கு செல்லும் 2 பாதைகளிலும் போராட்டக்காரர்கள் மரங்களை வெட்டிப்போட்டும், கற்களை போட்டும் மூடிவிட்டனர். இதனால் அந்த ஊர்களுக்கு பஸ் போக்குவரத்து துண்டிக்கப்பட்டு இருக்கிறது.

கூடங்குளம் போராட்டம்

கூடங்குளம் அணுமின் நிலையத்துக்கு எதிரான போராட்டக்காரர்களை கைது செய்வதற்காக கூடங்குளத்தில் அதிரடியாக போலீஸ் குவிக்கப்பட்டு உள்ளது. 144 தடை உத்தரவும் பிறப்பிக்கப்பட்டு உள்ளது.

ஊர் எல்லைகள் சீல் வைக்கப்பட்டு போலீசார் தீவிரமாக கண்காணித்து வருகிறார்கள். ரகசியமாக போராட்டத்துக்கு யாரும் உதவி செய்கிறார்களா? என்றும் கண்காணித்து வருகிறார்கள்.

பாதைகள் அடைப்பு

இதற்கிடையே இடிந்தகரை கிராம மக்கள் தங்கள் கிராமத்துக்கு வரும் பாதைகளை அடைத்து உள்ளனர். இடிந்தகரைக்கு செல்ல தாமஸ் மண்டபம், வைராவிகிணறு விலக்கு ஆகிய பகுதிகள் வழியாக 2 பாதைகள் உள்ளன. இந்த 2 பாதைகளிலும் எந்த வாகனங்களும் போய்வர முடியாதபடி பெரிய கற்கள் மற்றும் மரங்கள், முள்மரங்களை வெட்டிப்போட்டு உள்ளனர்.

பஸ் நிறுத்தங்களில் வைக்கப்பட்டு இருக்கும் சிமெண்டு இருக்கைகளை தூக்கி வந்து சாலையின் குறுக்காக போட்டு உள்ளார்கள்.

இதனால் இடிந்தகரை கிராமத்துக்கு யாரும் வாகனங்களில் செல்ல முடியாத நிலை ஏற்பட்டு உள்ளது. அதே போல் ஊரின் உள்ளே இருந்தும் வாகனங்கள் எதுவும் வெளிவர முடியாதபடி அடைக்கப்பட்டு உள்ளது.

பஸ் போக்குவரத்து துண்டிப்பு

இடிந்தகரை, கூடங்குளம் பகுதிக்கு பஸ் போக்குவரத்து துண்டிக்கப்பட்டு உள்ளது. பஸ் இல்லாததால் பிளஸ்-2 தேர்வுக்கு சென்ற மாணவ-மாணவிகள் அவதிப்பட்டனர். போராட்ட பந்தலில் திரண்டு இருந்த மக்களுக்கு தண்ணீர் பாக்கெட்டுகள், பிஸ்கட் போன்றவை படகுகள் மூலம் கடல்வழியாக கொண்டு வரப்பட்டன.

இடிந்தகரை செல்லும் பாதையை அடைத்தது பற்றி உதயகுமாரிடம் கேட்டபோது, "எங்கள் மீது சமூக விரோத தாக்குதல்கள் நடந்துவிடக்கூடாது என்பதற்காக பாதைகளை அடைத்து உள்ளோம். போலீசார் வருவதை தடுக்க வேண்டும் என்பது எங்கள் நோக்கம் அல்ல'' என்று கூறினார்.

தினதந்தி