சங்கரன்கோவில் இடைத்தேர்தல் பற்றி கருத்துக் கணிப்பு வெளியிட தடை

**சிவா** · **சிவா** Wed Mar 14, 2012 8:36 am

சங்கரன்கோவில் இடைத்தேர்தலை முன்னிட்டு கருத்து கணிப்போ, தேர்தலுக்குப் பிந்தைய கருத்து கணிப்போ வெளியிடுவதற்கு ஊடகங்களுக்கு தடை விதிக்கப்பட்டு உள்ளது.

இதுகுறித்து தமிழக தலைமை தேர்தல் அதிகாரி பிரவீண்குமார் நேற்று வெளியிட்ட உத்தரவில் கூறியிருப்பதாவது:-

தேர்தல் ஆணையம் உத்தரவு

சங்கரன்கோவில் சட்டசபை (தனி) தொகுதி இடைத்தேர்தல் வரும் 18-ந் தேதி காலை 8 மணி முதல் மாலை 5 மணி வரை நடைபெறுகிறது. இந்த தேர்தல் தொடர்பாக ஊடகங்கள், பத்திரிகைகள் கருத்து கணிப்போ, தேர்தலுக்கு பிந்தைய கருத்துக் கணிப்போ, தேர்தல் தொடர்பான எவ்விதமான ஆய்வு அறிக்கைகளோ வெளியிடுவதற்கு இந்திய தேர்தல் ஆணையம் தடை விதித்துள்ளது.

கருத்து கணிப்பு வெளியிட தடை

சங்கரன்கோவில் இடைத்தேர்தலையொட்டி 16-ந் தேதி மாலை 5 மணி முதல் 48 மணி நேரத்திற்கு ஊடகங்கள் கருத்து கணிப்போ அல்லது தேர்தல் தொடர்பான எந்த விதமான ஆய்வு அறிக்கையோ வெளியிடக்கூடாது என்று இந்திய தேர்தல் ஆணையம் கட்டுப்பாடு விதித்துள்ளது. அதுபோல தேர்தல் நடைபெறும் 18-ந் தேதி காலை 8 மணி முதல் மாலை 5.30 மணி வரை தேர்தலுக்குப் பிந்தைய கருத்து கணிப்பு வெளியிடக்கூடாது என்றும் ஊடகங்கள், பத்திரிகைகளுக்கு தடை விதிக்கப்படுகிறது.

இவ்வாறு அந்த உத்தரவில் கூறப்பட்டுள்ளது.

தினதந்தி