ஜனாதிபதி உரையின்போது எம்.பி.க்கள் கோஷம்

ஜனாதிபதி உரை ஆற்றியபோது, இலங்கை அரசுக்கு எதிரான தீர்மானம் உள்ளிட்ட பிரச்சினைகளை எழுப்பி எம்.பி.க்கள் கோஷமிட்டனர்.

கடைசி உரை

பாராளுமன்ற பட்ஜெட் கூட்டத்தொடரின் தொடக்க நாளான நேற்று இரு அவைகளும் அடங்கிய கூட்டுக் கூட்டத்தில் ஜனாதிபதி பிரதீபா பட்டீல் உரை ஆற்றினார். வருகிற ஜுலை மாதம் அவர் ஓய்வு பெறுவதால், இது அவரது கடைசி உரை ஆகும். சபையை நடத்துவதில், ஆளுங்கட்சியும், எதிர்க்கட்சிகளும் ஆக்கப்பூர்வ ஒத்துழைப்புடன் இணைந்து செயல்பட வேண்டும் என்று ஜனாதிபதி கேட்டுக் கொண்டார்.

இருப்பினும், அவரது உரையே 5 தடவை இடையூறு செய்யப்பட்டது. பல்வேறு கட்சி எம்.பி.க்கள் தங்களது கோரிக்கைகளை வலியுறுத்தி கோஷமிட்டதால், இந்த இடையூறு ஏற்பட்டது.

அ.தி.மு.க., தி.மு.க.

ஜனாதிபதி தனது உரையை தொடங்கும்போதே, இலங்கை அரசுக்கு எதிரான அமெரிக்க தீர்மானத்தை இந்தியா ஆதரிக்க வேண்டும் என்று தி.மு.க. எம்.பி.க்கள் கோஷமிட்டனர்.

ஜனாதிபதி தனது உரையை முடிக்கும் தருவாயில், அ.தி.மு.க. எம்.பி. மைத்ரேயன் இதே கோரிக்கையை வலியுறுத்தினார். அப்போது அவரை இருக்கையில் அமருமாறு ஜனாதிபதி சைகை செய்தார்.

ஆளும் காங்கிரஸ் எம்.பி.க்கள் கூட, தெலுங்கானா தனி மாநில கோரிக்கையை வலியுறுத்தி, `ஜெய் தெலுங்கானா' என்று கோஷமிட்டு ஜனாதிபதி உரைக்கு இடையூறு செய்தனர். தேசிய தீவிரவாத தடுப்பு மையம் அமைப்பது பற்றி ஜனாதிபதி குறிப்பிட்டபோது, எதிர்க்கட்சி எம்.பி.க்கள் எதிர்ப்பு கோஷம் எழுப்பினர்.

சிறுபான்மையினருக்கு 4.5 சதவீத உள்ஒதுக்கீடு வழங்குவது பற்றி ஜனாதிபதி குறிப்பிட்டபோது, பா.ஜனதா எம்.பி. ஹுக்கும் நாராயண யாதவ் எதிர்ப்பு தெரிவித்தார்.

உர உற்பத்தியை அதிகரிப்பது பற்றி ஜனாதிபதி குறிப்பிட்டபோது, விவசாயிகள் உரம் கிடைக்காமல் அவதிப்படுவதாக ஐக்கிய ஜனதாதள எம்.பி. ஜெகனாபாத் ஜெகதீஷ் சர்மா குற்றம் சாட்டினார்.

நீண்ட உரை

ஜனாதிபதி பிரதீபா பட்டீல், 70 நிமிட நேரம் உரை ஆற்றினார். சமீபகாலங்களில் அவர் ஆற்றிய நீண்ட உரை இதுவே ஆகும். கடந்த ஆண்டு அவரது உரை 67 பத்திகளாக இருந்த நிலையில், நேற்றைய உரை 100 பத்திகள் கொண்டதாக இருந்தது. வழக்கமாக நின்றபடி உரை ஆற்றும் ஜனாதிபதி, நேற்று இருக்கையில் அமர்ந்தபடி பேசினார்.

அகிலேஷ் யாதவ்

கூட்டம் தொடங்குவதற்கு முன்பு, உத்தரபிரதேச முதல்-மந்திரியாக பதவி ஏற்க உள்ள அகிலேஷ் யாதவ் எம்.பி., பாராளுமன்ற மைய மண்டபத்தை சுற்றி வந்து அனைவருடனும் கை குலுக்கினார். சபையினுள் காங்கிரஸ் தலைவர் சோனியா காந்தி முன்பு, கைகூப்பி தலை தாழ்த்தி வணக்கம் தெரிவித்தார்.

அகிலேஷ் யாதவுக்கு வாழ்த்து தெரிவிக்க எம்.பி.க்கள் ஆர்வம் காட்டினர். ஒரு எம்.பி., அவரை செல்போனில் படம் எடுத்தார். சோனியா காந்தி, சமாஜ்வாடி தலைவர் முலாயம்சிங் இருக்கைக்கு சென்று, உ.பி. தேர்தல் வெற்றிக்காக அவருக்கு வாழ்த்து தெரிவித்தார்.

ராகுல் வரவில்லை

காங்கிரஸ் பொதுச்செயலாளர் ராகுல் காந்தி, சபைக்கு வராதது பலரது கவனத்தை ஈர்த்தது. ஜனாதிபதி உரை, எந்தவகையிலும் உறுப்பினர்களை கவரவில்லை. பெரும்பாலான உறுப்பினர்கள் ஆர்வமின்றி காணப்பட்டனர். சில மூத்த உறுப்பினர்கள் குட்டித் தூக்கம் போட்டனர்.

தினதந்தி

நல்ல வேலை யாரும் பலான படம் பாத்து மாட்டிக்கல. அதுவே சந்தோஷம்.

கோஷம் போட்டதோட இவங்க வேஷம் முடிஞ்சது - இலங்கைக்கு எதிரான தீர்மானத்தை ஆதரிக்கலேன்னா மிஞ்சப் போவது மக்களின் துவேஷமே.