நாடாளுமன்றம் முன் போராட்டம் ஐதராபாத் நிஜாம் குடும்பம் முடிவு

வருமான வரித்துறை தொல்லை
நாடாளுமன்றம் முன் போராட்டம் ஐதராபாத் நிஜாம் குடும்பம் முடிவு

ஐதராபாத்: வருமானவரித் துறையினர் தொந்தரவை தடுத்து நிறுத்தக் கோரி நாடாளுமன்றத்தின் முன்பாக அடுத்த வாரம் போராட்டம் நடத்தப் போவதாக ஐதராபாத் நிஜாம் குடும்பத்தினர் அறிவித்துள்ளனர்.
இந்திய சுதந்திரத்துக்கு முன் ஐதராபாத்தை ஆண்டவர் 7வது நிஜாம் மிர் உஸ்மான் அலிகான். இவருக்கு 16 மகன்கள், 18 மகள்கள். அவர்களில் இரண்டு மகன்கள் 3 மகள்கள் உயிருடன் இருக்கின்றனர். இவர்களுக்கு 104 பேரக் குழந்தைகள். நிஜாமுக்கு சொந்தமான நகைகளை மத்திய அரசு கடந்த 1995ம் ஆண்டு ரூ.206 கோடிக்கு எடுத்துக் கொண்டது. இதற்கான வருமான வரி, சொத்து வரியாக ரூ. 30.50 கோடி விதிக்கப்பட்டது. நிஜாம் குடும்பத்தினர் ரூ.15.45 கோடி செலுத்தினர். மீதமுள்ள ரூ.15.05 கோடி வருமானவரித் துறையிடம் உத்தரவாத தொகையாக செலுத்தினர். இதில் இருந்து, நிஜாம் குடும்பத்தினருக்கு கடந்த 2004ம் ஆண்டில் ரூ. 4.39 கோடியையும், 2006ம் ஆண்டில் ரூ.66 லட்சத்தையும் வருமானவரித் துறை திருப்பி கொடுத்தது. இதனால் வங்கியில் உள்ள தொகை ரூ.8.66 கோடியாக குறைந்தது. 2006ம் ஆண்டில் வருமானவரித் துறை அனுப்பிய நோட்டீசில் ரூ.8.99 கோடி வரிபாக்கி செலுத்த வேண்டும் என கூறியது.

இதை செலுத்த நிஜாம் குடும்பத்தினர் மறுத்து வருகின்றனர். இது குறித்து நிஜாம் குடும்ப நல சங்க தலைவர் நஜப் கூறியதாவது: வரிபாக்கி நிலுவையில் உள்ள நிலையில், உத்தரவாத தொகையிலிருந்து பணத்தை வருமானவரித் துறை ஏன் திருப்பி கொடுத்தது? இதை எதிர்த்து ஆந்திர உயர் நீதிமன்றத்தில் வழக்கு தொடர்ந்தோம். 8 வாரத்தில் பிரச்னையை தீர்க்கும்படி 2006ல் உயர் நீதிமன்றம் உத்தரவு பிறப்பித்தது. ஆனால், கடந்த ஐந்தரை ஆண்டுகளாக எதுவும் செய்யப்படவில்லை. நிதியமைச்சர் பிரணாப் முகர்ஜியை சந்தித்து முறையிட்டோம். பலனில்லை. எங்கள் குடும்பத்தில் பெரும்பாலானோர் முதியவர்கள், உடல்நலம் குன்றியவர்கள். சிலரிடம் வாழ்வதற்கே பணம் இல்லை. எங்களுக்கு நீதி கிடைக்க வேண்டும். வருமானவரித் துறை தொந்தரவை தடுத்து நிறுத்தக் கோரி டெல்லியில் நாடாளுமன்ற பட்ஜெட் கூட்டத் தொடர் நடக்கும் போது போராட முடிவு செய்துள்ளோம் என்றார்

thinakaran