ஈரான் அணுசக்தி பேச்சுவார்த்தை தொடர்பில் பொது உடன்படிக்கையை எட்டுவதற்கு உலகின் 6 அதிகார சக்திகள் வியன்னாவில் கூடி ஆராய்வு

ஈரானின் சர்ச்சைக்குரிய அணுசக்தி நிகழ்ச்சித் திட்டம் தொடர்பில் ஒருங்கிணைந்த அணுகுமுறையொன்றை முன்னெடுக்க இணக்கபாடொன்றை எட்டும் முயற்சியில் உலகின் 6 அதிகாரசக்திகளும் முயற்சியில் ஈடுபட்டுள்ளன.

ஐக்கிய நாடுகள் அணுசக்தி கண்காணிப்பகத்தில் புதன்கிழமை இடம்பெற்ற கூட்டத்தின்போது ஈரான் தொடர்பான கலந்துரையாடலுக்கு மேலதிக நேரத்தை இராஜதந்திரிகளுக்கு வழங்குவதற்கு இணக்கம் காணப்பட்டது.

ஈரான் தொடர்பில் எத்தகைய அணுகுமுறையை முன்னெடுப்பது என்பது குறித்து ஆறு நாடுகளும் மாறுபட்ட கருத்தைக் கொண்டுள்ளன.

அதே சமயம் ஈரானின் இராணுவ தளமொன்று தொடர்பில் சர்வதேச அணுசக்தி முகவர் நிலையத்தின் நிபுணர்களின் கவலை அதிகரித்துள்ளதாகக் கூறப்படுகிறது.

மேற்படி பார்சின் இராணுவ தளம் தொடர்பான செய்மதி புகைப்படங்களில் காணப்பட்ட நகரும் உபகரணங்கள் மற்றும் டிரக் வண்டிகள் என்பன அத்தளத்தில் அணுசக்தி பரிசோதனை நடைபெறுவதற்கான சாத்தியப்பாட்டை வெளிப்படுத்துவனவாக உள்ளதாக மேற்படி நிபுணர்கள் கூறுகின்றனர்.

ஆனால் தனது அணுசக்தி நிகழ்ச்சித் திட்டம் அமைதி வழியில் அமைந்த சக்திப் பிறப்பாக்க தேவைப்பாடுகளை நிறைவேற்றுவதை இலக்காகக் கொண்டது என ஈரான் வலியுறுத்தி வருகிறது.

ஈரானானது நியூத்திரன் உபகரணமொன்றைப் பயன்படுத்தி அணு வெடிப்பு பரிசோதனையொன்றை மேற்கொள்வதை மறைக்க முயற்சிப்பதாக சர்வதேச அணுசக்தி முகவர் நிலையத்தின் இரு இராஜதந்திரிகள் "ஏபி' செய்திச் சேவைக்கு அளித்த பேட்டியில் தெரிவித்தனர்.

இந்நிலையில் ஈரானுடன் எதிர்கால பேச்சுவார்த்தை தொடர்பில் தயாராகும் முகமாக அமெரிக்கா, பிரித்தானியா, பிரான்ஸ், ஜேர்மனி, ரஷ்யா மற்றும் சீனா ஆகிய நாடுகளைச் சேர்ந்த இராஜதந்திரிகள் வியன்னாவிலுள்ள சர்வதேச அணுசக்தி முகவர் நிலையத்தில் கூடியுள்ளார்கள்

ஐக்கிய நாடுகள் அணுசக்தி பரிசோதகர்களுடன் ஒத்துழைக்க தவறியமை குறித்து ஈரான் கண்டனத்துக்கு உள்ளடக்கப்பட வேண்டும் என மேற்குலக நாடுகள் தெரிவித்துள்ளன. ___
வீரகேசரி