காதல் கணக்கு

**சிவா** · **சிவா** Fri Mar 02, 2012 12:32 am

தன் மானசீக காதலை இன்று எப்படியும் உமாவிடம் தெரிவித்து விட வேண்டியது தான். ஒரு வருஷமாக உள்ளத்திலேயே புதைத்து வைத்திருந்த காதலை சொல்ல, உமாவின் சீட் பக்கமாக சென்றான், தினேஷ்.

தினேஷ் அந்த ஆபீசில் சீனியர் கிளார்க். உமா அந்த ஆபீசில் கம்ப்யூட்டர் கிளார்க். உமாவுக்கு டோட்டலாக பதினெட்டாயிரம் சம்பளம். அவனுக்கு இருபத்து ஆறாயிரம் சம்பளம். இருவரும் இல்லறத்தில் இணைந்தால் சுளையாக மாதம் நாற்பத்தாறாயிரம் வந்து விடும். வாழ்க்கைப் பயணத்துக்கு தடையில்லாத வருமானம். வாழ்நாள் முழுவதும் கஷ்டம் இல்லாத ஜீவிதம். இப்படி கணக்குப் போட்டிருந்தான் தினேஷ்.

"ஹாய் உமா! என்ன வேலையெல்லாம் எப்படி போயிட்டிருக்கு?''

`பளிச்'சென்ற புன்னகையுடன் உமாவின் எதிரில் உட்கார்ந்தான்.

அவளும் முகம் மலர்ந்தாள். "வாங்க தினேஷ்...எல்லாம் உங்களை மாதிரியானவங்க ஒத்துழைப்பிலே வேலை நல்லாவே போயிட்டிருக்கு. அப்புறம் உங்க கல்யாணம் எப்போ? சீக்கிரமே கல்யாணச்சாப்பாடு போடுவீங்க தானே...'' உமாவே இப்படிக் கேட்டதும் இது தான் நல்ல சந்தர்ப்பம் என்று முடிவெடுத்தான் தினேஷ்.

''உமா! தப்பா நினைக்கக்கூடாது. நீங்க இப்படி வெளிப்படையா கேட்டுட்டதால நானும் என் விருப்பத்தை சொல்லிடறேன். நீங்க சம்மதிச்சா நாம ரெண்டு பேரும் சேர்ந்து எல்லாருக்கும் கல்யாணச் சாப்பாடு போட்டிடலாம். என்ன சொல்றீங்க?''

தினேஷ் சொல்லி முடிப்பதற்குள் உமாவின் முகத்தில் அப்படியொரு மலர்ச்சி. "தினேஷ்...உங்களை கல்யாணம் பண்ணிக்க எனக்கும் முழு சம்மதம் தான். எனக்கும் இல்லறத்துல ஈடுபட்ட மனைவியா இருக்கணும்னு ஆசை தான். எத்தனை நாளைக்குத்தான் பஸ்சிலே இடிபட்டு ஆபீசுக்கு வந்து இந்த கம்ப்யூட்டரோட மாரடிப்பதுன்னு நினைச்சிட்டு இருந்தேன். உங்களை மாதிரி நல்ல சம்பளத்துல ஒருத்தர் வாழ்க்கைத் துணையா கிடைக்கிறப்ப நான் என் வேலையை விட்டுட்டு ஒரு மனைவியா, குடும்பத்தலைவியா வீட்டு வேலைகளைப் பார்த்தபடி மெகா சீரியல் பார்த்துக்கிட்டு ஜாலியா இருக்கலாம்ன்னு நினைக்கிறேன். முறைப்படி உங்க வீட்ல இருந்து எங்க வீட்டுக்கு வந்து பேசச்சொல்லுங்க...சரியா?''

உமாவின் பதில் தினேஷின் உள்ளக்கணக்கை சுக்கு நூறாக்கி விட்டது. உமாவின் வருமானத்தை குறிவைத்து காதல் கொண்ட தினேஷின் காதல்கோட்டை தகர்ந்து போனது. மவுனத்தை பதிலாக்கி விட்டு பின்வாங்கினான் தினேஷ். எதுவும் நடக்காததுபோல் வேலையில் மும்முரமானாள், உமா.

-கு.அருணாசலம்