ஒலிம்பிக்ஸ் செய்தி 2012 ஒலிம்பிக் போட்டியில் நுழைந்தது இந்திய ஹொக்கி அணி

ஒலிம்பிக் ஹொக்கி தகுதிச்சுற்று இறுதி போட்டியில் வென்று, இந்திய ஆடவர் ஹொக்கி அணி ஒலிம்பிக் 2012 போட்டியில் நுழைந்துள்ளது.
லண்டனில் நடைபெற உள்ள ஹொக்கி தகுதி சுற்று போட்டிகள், இந்திய தலைநகர் புதுடெல்லியில் நடைபெற்று வந்தது. இந்த போட்டிகளில் இந்தியா, பிரான்ஸ், போலந்து, கனடா, சிங்கப்பூர், இத்தாலி ஆகிய 6 நாடுகள் பங்கேற்றன.

இதுவரை இந்திய அணி சிங்கப்பூரை 15-1 என்ற கோல் கணக்கிலும், இத்தாலியை 8-1 என்ற கோல் கணக்கிலும், பிரான்சை 6-2 என்ற கோல் கணக்கிலும், கனடாவை 3-2 என்ற கோல் கணக்கிலும், போலந்தை 4-2 என்ற கோல் கணக்கிலும் வென்றது.

நேற்று நடந்த இறுதிப்போட்டியிலும் இந்தியா அணி 8-1 என்ற கோல் கணக்கில் பிரான்சை வீழ்த்தி சாம்பியன் பட்டம் பெற்றது.

இதன்மூலம் யூலை மாதம் நடைபெற உள்ள லண்டன் ஒலிம்பிக் போட்டிக்கு இந்தியா தகுதி பெற்றுள்ளது. இந்தியாவின் தேசிய விளையாட்டான ஹொக்கி போட்டியில் வென்று ஒலிம்பிக் போட்டிகளில் விளையாட தகுதி பெற்றிருப்பது இந்தியர்கள் அனைவரையும் மகிழ்ச்சியில் ஆழ்த்தியுள்ளது.

நேற்று நடந்த இறுதிப்போட்டியில் இந்திய அணி, 17வது நிமிடத்தில் லக்ரா, ஒரு பீல்டு கோல் அடித்து வலுவான துவக்கம் தந்தார்.

19வது நிமிடத்தில் பெனால்டி கார்னர் மூலம் சந்தீப் சிங் ஒரு கோல் அடித்தார். இதற்கு 23வது நிமிடத்தில் பிரான்சின் மார்டின் பிரிசாக் ஒரு கோல் அடித்து பதிலடி கொடுத்தார். 26வது நிமிடத்தில் மீண்டும் பெனால்டி கார்னர் மூலம் சந்தீப் கோல் அடித்தார்.

இந்நிலையில் முதல் பாதி முடிவில் இந்தியா 3-1 என்ற கோல் கணக்கில் முன்னிலை பெற்றது.

இரண்டாவது பாதியிலும் இந்திய அணி கோல் மழை பொழிந்தது. 38வது நிமிடத்தில் சந்தீப் ஒரு கோல் அடித்தார். 43வது நிமிடத்தில் சுனில் ஒரு கோல் அடிக்க, இந்தியா 5-1 என்ற கோல் கணக்கில் முன்னிலை பெற்றது.

49வது நிமிடத்தில் சந்தீப் இன்னொரு கோல் அடித்தார். 56வது நிமிடத்தில் ரகுநாத் தன் பங்குக்கு ஒரு கோல் அடித்தார்.

இறுதியில் இந்திய அணி 8-1 என்ற கோல் கணக்கில் வென்று, லண்டன் ஒலிம்பிக் போட்டிக்கு தகுதி பெற்றது. தவிர, இத்தொடரில் இந்திய அணி நூறு சதவிகித வெற்றியை பெற்றது. தகுதிச் சுற்றில் பிரான்ஸ் இரண்டாவது இடம் பெற்றது.

கடந்த 2008ம் ஆண்டு பெய்ஜிங்கில் நடந்த ஒலிம்பிக் போட்டிக்கு இந்திய ஹொக்கி அணி தகுதி பெறவில்லை. இருப்பினும் இந்த ஆண்டுக்கான ஒலிம்பிக் போட்டிக்கு தகுதி பெற்றுள்ளது.

கடந்த 80 ஆண்டுகால ஒலிம்பிக் வரலாற்றில் பிரதான சுற்றுக்கு முன்னேறுவதில் தோல்வி கண்ட இந்தியா, இந்த முறை அனைத்து ஆட்டங்களிலும் அபாரமாக விளையாடி வெற்றி பெற்றுள்ளது.

இந்தப்போட்டித் தொடரில் அணியின் பிரதானவீரர் சந்தீப்சிங் மிகவும் சிறப்பாக விளையாடினார். அவர் மொத்தம் 16 கோல்கள் அடித்து தொடர் நாயகன் விருதை பெற்றார்.

சந்தீப்சிங், ஹரியானா மாநிலத்தின் பொலிஸ் டி.எஸ்.பி பதவியில் உள்ளது குறிப்பிடத்தக்கது.

இந்த ஹொக்கி தொடரில் ஒரு கோல் அடித்தால் ரூ.1லட்சமும், இறுதிப்போட்டியில் கோல் அடிக்கும் வீரருக்கு ரூ.5 லட்சமும் வழங்கப்படும் என்று ஹரியானா முதல்வர் பூபிந்தர்சிங் கோடா அறிவித்திருந்தார்.

இதன்மூலம் இறுதிப்போட்டியில் 5 கோல் அடித்து ரூ.25 லட்சமும், லீக் ஆட்டங்களில் அடித்த 11 கோல்கள் அடித்து ரூ.11 லட்சமும், மொத்தம் ரூ.36 லட்சம் சந்தீப்சிங்கிற்கு வழங்கப்படும்.

மேலும் ஹொக்கி இந்தியா சார்பில் ரூ.2லட்சம் பரிசும் கிடைக்கும். மத்திய பிரதேச அரசு, ஹொக்கி வீரர்களுக்கு தலா ரூ.1லட்சம் வழங்கப்படும் என்று அறிவித்துள்ளது.

இந்தியா அணிக்கு வாழ்த்துக்கள்

இந்தியா ஹாக்கி அணிக்கு என் மனமார்ந்த வாழ்த்துகள்
ஒலிம்பிக் போட்டியிலும் வெற்றி பெற என் வாழ்த்துகளும் ,பிரார்த்தனைகளும்

கண்டிப்பாக ஒலிம்பிக்கிலும் வெற்றி நமக்கே

ஆசியப் போட்டியில் வெற்றி பெற்றிருந்தால் ஒலிம்பிக் தகுதிச் சுற்றுக்குச் செல்ல வேண்டியதில்லை.

இனிமேலாவது இந்திய ஹாக்கி அணி சாதனைகள் படைக்கட்டும்.