சிதம்பரம் பங்கேற்ற நிகழ்ச்சி; மம்தா மூக்கறுப்பு !

கோல்கட்டா: மேற்குவங்க மாநிலம் கோல்கட்டாவில் மத்திய உள்துறை அமைச்சர் பங்கேற்ற நிகழ்ச்சியை மாநில முதல்வர் மம்தா பானர்ஜி புறக்கணித்தார். தேசிய பயங்கரவாத தடுப்பு மையம் தொடர்பான விவகாரத்தில் தமக்கு உள்ள எதிர்ப்பை காட்டவே இவ்வாறு முதல்வர் நடந்து கொண்டார் என கூறப்படுகிறது.

மாநிலங்களில் மத்திய அரசு அமைக்கவிருக்கும் தேசிய பயங்கரவாத தடுப்பு மையம் மாநில அரசின் உரிமைகளில் தலையிடுவதற்கு சமம் என்றும் இதனை திரும்ப பெறவேண்டும் என்றும் பிரதமருக்கு நேற்று கடிதம் எழுதியிருந்தார். இவரது நிலைக்கு ஒரிசா, தமிழ்நாடு, குஜராத், பீகார் உள்ளிட்ட முதல்வர்கள் ஆதரவு தெரிவித்திருந்தனர்.

இந்நிலையில் இன்று கோல்கட்டாவில் தேசிய பாதுகாப்பு மைய திறப்பு விழா நடந்தது. மத்திய உள்துறை அமைச்சர் சிதம்பரம் பங்கேற்றார். இந்த நிகழ்ச்சியில் மாநில முதல்வர் மம்தா பங்கேற்பதாக இருந்தது. ஆனால் கடைசி நிமிடத்தில் புறக்கணித்தார், இருப்பினும் முதல்வர் வருவதற்கு காலதாமதம் ஆகலாம் என மையத்தை திறந்து வைக்காமல் 10 நிமிடம் காத்திருந்தார் சிதம்பரம் . ஆனாலும் ஏமாற்றமே மிஞ்சியது. மம்தா வரவில்லை. இதனையடுத்து அப்செட் ஆனார். தொடர்ந்து திறப்பு விழாவில் பங்கேற்று உரையாற்றி கிளம்பினார்.

மம்தாவை பொறுத்தவரையில் ஆளும் ஐக்கிய முற்போக்கு கூட்டணியில் அங்கம் வகித்தாலும், பல விஷயங்களை எதிர்த்து வந்துள்ளார். இந்தியவர்த்தகத்தில் நேரடி அன்னிய முதலீடு, லோக்பால் மசோதா, பென்சன் திட்டம், பெடரோல் விலை உயர்வு உள்ளிட்டவை அடங்கும். தற்போது விரிசல் அதிகரித்து கொண்டே போகிறது.

தினமலர்

மம்தா அரசுடன் இணைந்து செயல்படுவது மகிழ்ச்சி : சிதம்பரம்

கோல்கட்டா : மாவோயிஸ்டுகளை கட்டுப்படுத்துவதில் மேற்குவங்க முந்தைய அரசுடன் பணியாற்றிய மத்திய அரசு, தற்போது மம்தா பானர்ஜி தலைமையிலான அரசுடனும் பணியாற்ற இருப்பது மகிழ்ச்சியளிப்பதாக மத்திய உள்துறை அமைச்சர் சிதம்பரம் தெரிவித்துள்ளார்.

மேற்குவங்க மாநிலம் கோல்கட்டாவில் நடைபெற்ற தேசிய பாதுகாப்பு படை மையம் துவக்க விழாவில் சிறப்புரையாற்றிய மத்திய உள்துறை அமைச்சர் சிதம்பரம் கூறியதாவது, தேசிய மற்றும் உள்நாட்டு (மாநில) பாதுகாப்பு இரண்டிற்கும் மத்திய மற்றும் மாநில அரசுகள் பொறுப்பு ஆகும். மாநிலத்தில் பாதுகாப்பு குறைபாடு ஏற்படும்போது, மத்திய அரசு தகுந்த நேரத்தில் உதவிக்கரம் நீட்டி உதவி வருகிறது. குறிப்பாக, மேற்குவங்க மாநிலத்தில் மாவோயிஸ்டுகளின் ஆதிக்கம் அதிகமாக இருந்த முந்தைய ஆட்சியில், அந்த அரசுடன் இணைந்து மாவோயிஸ்ட் தடுப்பு நடவடிக்கைகளை மேற்கொண்டோம். தற்போது அமைந்துள்ள மம்தா பானர்ஜி தலைமையிலான புதிய அரசுடனும் இணைந்து செயல்பட உள்ளது மகிழ்ச்சியளிக்கிறது என்று அவர் கூறினார்.

இந்த நிகழ்ச்சியை, மாநில முதல்வர் மம்தா பானர்ஜி புறக்கணித்துள்ளது குறிப்பிடத்தக்கது.