சங்கரன்கோவில் சட்டசபை தொகுதியில் மார்ச் 18-ந் தேதி இடைத்தேர்தல்

சங்கரன்கோவில் சட்டசபை தொகுதிக்கான இடைத்தேர்தல் மார்ச் 18-ந் தேதி நடைபெறுகிறது. இதற்கான வேட்புமனு தாக்கல் வருகிற புதன்கிழமை தொடங்குகிறது.

கடந்த ஆண்டு நடைபெற்ற தமிழக சட்டசபை தேர்தலில், நெல்லை மாவட்டம் சங்கரன்கோவில் (தனி) தொகுதியில் இருந்து அ.தி.மு.க. சார்பில் தேர்ந்து எடுக்கப்பட்டவர் சொ.கருப்பசாமி.

18-ந் தேதி இடைத்தேர்தல்

அமைச்சராக இருந்த இவர் கடந்த ஆண்டு அக்டோபர் மாதம் மரணம் அடைந்தார். இதனால் அந்த தொகுதி காலியாக உள்ளது.

காலியாக இருக்கும் சங்கரன்கோவில் சட்டசபை தொகுதிக்கு வருகிற மார்ச் மாதம் 18-ந் தேதி இடைத்தேர்தல் நடைபெறுகிறது. இதுபற்றிய அதிகாரபூர்வமான அறிவிப்பை தேர்தல் கமிஷன் நேற்று வெளியிட்டது.

புதன்கிழமை மனுதாக்கல்

இதற்கான வேட்புமனு தாக்கல் வருகிற 22-ந் தேதி (புதன்கிழமை) தொடங்குகிறது. மனுக்கள் தாக்கல் செய்ய 29-ந் தேதி (புதன்கிழமை) கடைசி நாள் ஆகும்.

வேட்புமனுக்கள் மீதான பரிசீலனை மார்ச் 1-ந் தேதி (வியாழக்கிழமை) நடைபெறும். போட்டியில் இருந்து விலக விரும்புவோர் தங்கள் வேட்புமனுக்களை வாபஸ் பெற மார்ச் 3-ந் தேதி கடைசி நாள்.

மார்ச் 18-ந் தேதி (ஞாயிற்றுக்கிழமை) வாக்குப்பதிவு நடைபெறும்.

ஓட்டு எண்ணிக்கை

மார்ச் 21-ந் தேதி வாக்குகள் எண்ணப்பட்டு முடிவு அறிவிக்கப்படும்.

தேர்தல் தேதி அறிவிக்கப்பட்டதை தொடர்ந்து, சங்கரன்கோவில் தொகுதியில் தேர்தல் நடத்தை விதிமுறைகள் உடனடியாக அமலுக்கு வருவதாக தேர்தல் கமிஷன் அறிவித்து உள்ளது.

சங்கரன்கோவில் தொகுதி இடைத்தேர்தலுடன் ஆந்திர மாநிலத்தில் உள்ள மெகபூப்நகர், நாகர்கர்னூல், கோவூர், கான்புர் (தனி), கொல்லாபூர், அடிலாபாத், காமரெட்டி, குஜராத் மாநிலத்தில் உள்ள மன்சா, கேரளாவில் உள்ள பிரவோம், ஒடிசாவில் உள்ள அத்கார் ஆகிய மேலும் 10 சட்டசபை தொகுதிகளுக்கும், கர்நாடகத்தில் உள்ள உடுப்பி சிக்மகளூர் பாராளுமன்ற தொகுதிக்கும் மார்ச் 18-ந் தேதி இடைத்தேர்தல் நடைபெறும் என்றும் தேர்தல் கமிஷன் அறிவித்து உள்ளது.

அ.தி.மு.க. வேட்பாளர்

சங்கரன்கோவில் தொகுதி இடைத்தேர்தலில் அ.தி.மு.க. சார்பில் எஸ்.முத்துசெல்வி போட்டியிடுகிறார். இதுபற்றிய அறிவிப்பை அ.தி.மு.க. பொதுச்செயலாளரும், முதல்-அமைச்சருமான ஜெயலலிதா சமீபத்தில் அறிவித்தார்.

சங்கரன்கோவில் நகரசபையின் தலைவியாக இருந்து வரும் இவர் ஏற்கனவே பிரசாரத்தை தொடங்கிவிட்டார்.

கடந்த தேர்தல் ஓட்டுவிவரம்

சங்கரன்கோவில் சட்டசபை தொகுதியில் கடந்த தேர்தலில் கட்சிகள் பெற்ற ஓட்டு விவரம் வருமாறு:-

மொத்த ஓட்டுகள் 1,90646

பதிவான ஓட்டுகள் 1,44,627

சொ.கருப்பசாமி (அ.தி.மு.க.) 72,297

மு.உமா மகேஸ்வரி (தி.மு.க.) 61,902

செ.சாரதா (பாரதீய ஜனதா) 1,862

இந்த தொகுதியில் போட்டியிட்ட பாரதீய ஜனதா வேட்பாளர் உள்பட 12 வேட்பாளர்கள் டெபாசிட் இழந்தனர்.

தினதந்தி

அடுத்த திருமங்கலக் கூத்து இந்த ஆட்சியாளா்களிடத்திலும் காணலாம்

அடித்தது யோகம் சங்கரன் கோவில் வாக்காளா்களுக்கு...

இதன் மூலம் தங்களுக்கு தெரிவித்துக் கொள்வதென்றால் சங்கரன் கோவிலில் வசிப்பவர்கள் வீட்டிற்கு விருந்தாளியாக வருபவர்களுக்கும் ”மேற்படி” கவனிப்புகளை வழங்குமாறு அனைத்துக் கட்சி கூட்டத்தில் முடிவெடுக்கப் பட்டுள்ளது.

பேசாம எல்லா தொகுதிக்கும் இடைதேர்தல் வச்ச நல்லா இருக்குமே!!!!