`பசங்களுக்கு நான் சவால்!' - அலிஷா அப்துல்லா

அலிஷா அப்துல்லா... இந்தப் பேரைக் கேட்டாலே பைக், கார் பந்தயத் தடம் அதிரும்.

மிகைப்படுத்திச் சொல்லவில்லை. ஆண்களின் ராஜ்ஜியமான பைக், கார் டிராக்கில் அவர்களுக்குச் சரிக்குச் சரியாக சவால் விட்டு நிற்கும் பெண். பந்தயத் தடங்களில் பொறி பறக்க வைக்கும் இந்தியாவின் முதல் பெண் பைக் ரேஸர்.

பந்தயத்தில் ஈடுபட்டிருந்தாலும், இல்லாவிட்டாலும் பரபரவென்று இருக்கும் அலிஷாவிடம் கொஞ்ச நேரத்தைப் பிடுங்கி பேசினோம்...

அப்பாவின் அடிச்சுவட்டில்...

எங்கப்பா ஆர்.ஏ. அப்துல்லா, பைக் ரேஸ் வீரர். ஏழுமுறை தேசிய சாம்பியன். அவர் பந்தய தடத்தில் பறப்பதைப் பார்த்துத்தான் நானும் இதற்கு வந்தேன். ஒன்பது வயதுச் சிறுமியாக `கோ கார்ட்டிங்'கில் ஈடுபடத் தொடங்கினேன். பதினோரு வயது முதலே போட்டிகளில் வெல்லத் தொடங்கினேன். 13 வயதானபோது, எம்.ஆர்.எப். நேஷனல் கோ கார்ட்டிங் சாம்பியன்ஷிப்பில் வென்றேன். 2004-ம் ஆண்டில் ஜே.கே. டயர் தேசிய சாம்பியன்ஷிப் போட்டியில் ஆண்களுடன் போட்டியிட்டு ஐந்தாவது இடத்தைப் பிடித்தேன்.

பைக்குக்கு தாவினேன்

கார் பந்தயம் ரொம்பவே காஸ்ட்லி. பொருளாதார ரீதியாகச் சமாளிப்பது கடினம். தவிர, அப்பா பைக் ரேஸ் வீரர் என்பதாலும், அதன் நுணுக்கங்களை எனக்குக் கற்றுக் கொடுக்க முடியும் என்பதாலும் என்னை பைக் பந்தயத்தில் கவனம் செலுத்தும்படி கூறினார். காரில் இருந்து பைக்குக்கு மாறுவது ஆரம்பத்தில் எனக்குக் கடினமாகத்தான் இருந்தது. ஆனால் அப்பா அதை எளிதாக்கி விட்டார். அப்பா ரொம்ப கண்டிப்பானவர். அந்த கண்டிப்புதான் என்னை பைக் பந்தயத்தின் கடினங்களுக்கு என்னை தயார்ப்படுத்தியது. ஆரம்பத்தில் குறைந்த சக்தி பைக்குகளை ஓட்டினேன், பிறகு சூப்பர் பைக்குக்கு மாறினேன். 2009-ல் 600 சிசி ஹோண்டா பைக்கை ஓட்டிய நான், தேசிய சூப்பர் பைக் சாம்பியன்ஷிப்பில் மூன்றாமிடம் பிடித்தேன். அப்போட்டியில் கலந்துகொண்ட ஒரே பெண் நான்.

மீண்டும் கார்களுக்கு...

பைக்குகளில் இருந்து மீண்டும் நான் கார்களுக்கு வந்தேன். அதற்கு, சென்னை இருங்காட்டுக்கோட்டை தடத்தில் நான் சந்தித்த ஒரு மோசமான விபத்தும் காரணம். கார் பந்தயத்தில் பங்கேற்கத் தொடங்கியது முதலே சீரான முன்னேற்றத்தைக் காட்டிவருகிறேன். கடந்த 2010-ல் வோக்ஸ்வேகன் போலோ கோப்பை போட்டியில் 10-வது இடத்தைப் பிடித்தேன். 2011-ல் ஏழாவது இடத்தை எட்டினேன். குறிப்பிடத்தக்க வகையில் ஒரு போட்டியில் மூன்றாவது இடத்தைப் பிடித்து வெற்றி மேடை ஏறினேன். அவ்வாறு மேடை ஏறிய முதல் வீராங்கனை நான்தான். கோவையில் நடந்த போட்டியில் வீரர்கள் விஷ்ணு பிரசாத், மிஹிருக்குப் பின் நான் மூன்றாவது இடம் பிடித்தேன். அந்தப் போட்டியில் அதிக நேரம் முன்னணியில் இருந்த நான், கடைசியில் அவர்களை முந்த விட்டுவிட்டேன்.

உடல் தகுதியே காக்கும்

பெண்களை பலவீனமானவர்கள் என்று சொல்லிச் சொல்லியே அப்படி ஆக்கிவிட்டார்கள் என்று நினைக்கிறேன். கார் பந்தயத்தைப் பொறுத்தவரை உடல்தகுதியும், தாக்குப் பிடிக்கும் திறனும் ரொம்ப முக்கியம். எனவே நான் உடல்தகுதியை கட்டிக்காப்பதில் கவனமாக இருக்கிறேன். ஏன், நான் ஒரு பிட்னஸ் பைத்தியம் என்றே சொல்லலாம். கல்லூரியில் வகுப்புக்கு போகத் தவறியிருக்கிறேனே தவிர, `ஜிம்'முக்கு போகத் தவறியதில்லை. சென்னை அளவிலான போட்டியில், `மிக வலிமையான பெண்'ணாகத் தேர்வாகியிருக்கிறேன். ஒரே மூச்சில் என்னால் 40- 50 `புஷ்-அப்'கள் செய்ய முடியும். அதில் பல ஆண்களாலேயே என்னைத் தோற்கடிக்க முடியாது.

பிளஸ்சும்... மைனஸும்...

ரேஸ் டிராக்கில் முதல் பெண்ணாக என்ன `பிளஸ்', `மைனஸ்' என்று கேட்டீர்கள் என்றால், மைனஸ் எதுவும் தோன்றவில்லை. ஆரம்பத்தில் ஒரு பெண்ணாக தடத்தில் தயாராகும்போது கிண்டலடித்த ஆண்கள் இருக்கிறார்கள். வெற்றியால் அவர்களின் வாயை அடைத்திருக்கிறேன். தற்போது அம்மாதிரியெல்லாம் இல்லை. பிளஸ், எனக்குக் கிடைத்திருக்கும் நட்சத்திர அந்தஸ்து. போகும் இடங்களில் எல்லாம் ஆட்டோகிராப் கேட்கிறார்கள். பேஸ்புக்கில் தினசரி 200 பேருக்கு மேல் நட்புக் கோரிக்கை விடுக்கிறார்கள்.

டென்னிஸ், நீச்சல்...

கார் பந்தயம் தவிர டென்னிஸ், நீச்சல், ஸ்னூக்கர் எல்லாம் எனக்குப் பிடித்த விளையாட்டுகள். பந்தயங் களுக்காக அவற்றையெல்லாம் கொஞ்சம் ஒதுக்கி வைக்க வேண்டியிருக் கிறது. ஆனாலும், நேரம் கிடைக்கும்போதெல்லாம் நீச்சலிலும், ஸ்னூக்கரிலும் ஈடுபடுகிறேன்.

விளம்பர, சினிமா வாய்ப்புகள்

நான் உடல்தகுதியில் எந்த அளவுக்குக் கவனம் செலுத்துகிறேனோ, அதே அளவுக்கு அழகாகத் தோன்றுவதிலும் கவனமாயிருக்கிறேன். அதனால்தானோ என்னவோ, எனக்கு விளம்பர, சினிமா வாய்ப்புகள் வந்தவண்ணம் இருக்கின்றன. இதுவரை விளம்பரங்களை விரும்பாத நான், இனி அவற்றின் பக்கம் பார்வையைத் திருப்பலாம் என்று நினைக்கிறேன். அதே மாதிரி, ஆசைக்கு ஒரு சினிமாவில் நடிச்சுட்டு ஒதுங்கிடணும்.

புதிய பொறுப்பு

தமிழகத்தில் முதல்முறையாக சென்னையில் தொடங்கப்பட்டுள்ள `ஹார்லி டேவிட்ஸன்' ஷோரூமின் விற்பனைப் பிரிவு தலைவராகியிருக்கிறேன். இந்த விலையுயர்ந்த பைக்குகளை அமெரிக்காவில் இருந்து நேரடியாக இறக்குமதி செய்து விற்கிறோம். பந்தயத்தைப் போலவே எனக்கு இதுவும் சவாலான பணிதான். இதிலும் சாதிப்பேன்!'' என்றவரிடம், `சரி, இந்த பைக்குகளின் விலை என்ன?' என்று கேட்டோம்.

``ஆறரை லட்ச ரூபாய் முதல் நாற்பத்தைந்து லட்சம் வரை!''

`யம்மாடியோவ்'

* `ஸ்லோ சைக்கிள் ரேசில்' கலந்துகொள்வீர்களா?

நிச்சயமாகக் கலந்துகொள்வேன்!

* பந்தயத் தடத்தில் நீங்கள் சந்தித்த காமெடி?

பந்தயம் முடிந்ததும், `இந்தப் பையன் நல்லா பைக் ஓட்டினான்' என்று பார்வையாளர்கள் பேசுவது காதில் விழும். நான் ஹெல்மெட்டை கழற்றியதும் பெண் என்று அறிந்து `ஙே'ன்னு முழிப்பாங்க.

* நீங்க சமைப்பீங்களா?

சூப்பரா சமைப்பேன்! உங்களுக்கு என்ன வேணும்னு சொல்லுங்க.

* சினிமா பைக் சாகசங்களை பார்க்கும்போது என்ன தோணும்?

காமெடியா!

* பைக் `ரிப்பேர்' பார்க்கத் தெரியுமா?

வண்டியை ஓட வைக்கிற அளவுக்கு பழுது பார்க்கத் தெரியும்.

* அப்பாவிடம் திட்டு வாங்கியிருக்கிறீர்களா?

பல தடவை!

* பந்தயத் தடத்தில் பைக் ஓட்டுவது... சென்னை சாலைகளில் பைக் ஓட்டுவது- இரண்டில் எது கடினம்?

சென்னை சாலைகளில் ஓட்டுவதுதான்!

* மோட்டார் சைக்கிள்கள் உங்களுக்கு அறிமுகமாகியிராவிட்டால்...?

டென்னிஸ் ஆடிக் கொண்டிருப்பேன்.

* `பொம்பளைப் பிள்ளையா லட்சணமா இல்லாமல் இதெல்லாம் என்ன...' என்று யாராவது பேசியிருக்கிறார்களா?

ஒரு ஆளா... ரெண்டு ஆளா?

* சாலையில் பைக்கில் செல்லும்போது வேறு பைக்காரர்கள் `டீசிங்' செய்திருக்கிறார்கள்?

என்னை அலிஷா என்று தெரிந்தும், தெரியாமலும் செய்வார்கள். அப்போதெல்லாம் எனது பைக்கால் அவர்களை மறித்து நிறுத்தி, `மச்சான்... டிராக்குக்கு வந்து இந்த ஆட்டத்தையெல்லாம் வைச்சுப் பாரு!' என்பேன்.

தினதந்தி

பகிர்வுக்கு நன்றி தல ..