முத்தரப்பு கிரிக்கெட் : இலங்கை அணியை வென்றது ஆஸ்திரேலிய அணி

ஆஸ்திரேலியாவில், இந்தியா-இலங்கை-ஆஸ்திரேலிய அணிகள் பங்கேற்கும் முத்தரப்பு ஒரு நாள் கிரிக்கெட் போட்டி தொடர் நடைபெற்று வருகிறது. இதில் ஒவ்வொரு அணியும் மற்ற அணிகளுடன் 4 போட்டிகளில் விளையாட வேண்டும். புள்ளிகள் அடிப்படையில் முதல் இரு இடங்களைப் பிடிக்கும் அணி இறுதி போட்டிக்கு தகுதி பெறும்.

இறுதிச் சுற்றில் 3 போட்டிகள் நடைபெறும். இதில் 2 போட்டிகளில் வெற்றி பெறும் அணிக்கு சாம்பியன் பட்டம் வழங்கப்படும். இதுவரை 2 போட்டிகள் முடிந்துள்ளன. முதல் போட்டியில் இந்தியாவை, ஆஸ்திரேலியா தோற்கடித்தது. 2-வது போட்டியில் இலங்கையை இந்தியா வீழ்த்தியது.

இந்த நிலையில் 3-வது போட்டி பெர்த்தில் நேற்று (பிப்.10) தொடங்கியது. இதில் ஆஸ்திரேலியா-இலங்கை அணிகள் விளையாடின.

இலங்கை கேப்டன் ஜெயவர்த்தனா டாஸ் வென்று ஆஸ்திரேலியாவை முதலில் பேட் செய்ய பணித்தார்.

அதன்படி முதலில் களமிறங்கிய ஆஸ்திரேலிய அணி, 49.1 ஓவரில் அனைத்து விக்கெட்டுகளையும் இழந்து 231 ரன் எடுத்தது.

அடுத்து 232 ரன்கள் எடுத்தால் வெற்றி என்ற இலக்குடன் களமிறங்கிய இலங்கை அணி 49.5 ஓவர்களில் 226 ரன்களில் ஆட்டமிழந்தது.

ஆஸ்திரேலிய கேப்டன் மைக்கேல் கிளார்க் ஆட்டநாயகனாகத் தேர்வு செய்யப்பட்டார். இந்தத் தொடரில் ஆஸ்திரேலியா பெற்றுள்ள இரண்டாவது வெற்றி இது. முதல் ஆட்டத்தில் ஆஸ்திரேலியா, இந்தியாவை வீழ்த்தியது குறிப்பிடத்தக்கது

சென்னை ஆன்லைன்