3 நாடுகள் கிரிக்கெட்:இந்தியா-இலங்கை நாளை மோதல்

**இளமாறன்** · **இளமாறன்** Wed Feb 08, 2012 1:58 am

First topic message reminder :

பெர்த், பிப். 7-

இந்தியா, இலங்கை, ஆஸ்திரேலியா ஆகிய 3 நாடுகள் பங்கேற்கும் கிரிக்கெட் போட்டி ஆஸ்திரேலியாவில் கடந்த 5-ந்தேதி தொடங்கியது. தொடக்க ஆட்டத்தில் இந்திய அணி 65 ரன்னில் ஆஸ்திரேலியாவிடம் தோற்றது.
3 நாடுகள் போட்டியின் 2-வது “லீக்” ஆட்டம் பெர்த்தில் நாளை (புதன்கிழமை) நடக்கிறது.

இதில் இந்தியா-இலங்கை அணிகள் மோதுகின்றன. ஆஸ்திரேலிய பயணத்தில் இந்திய அணி ஒரே ஒரு வெற்றியை மட்டுமே பெற்றுள்ளது.
4 டெஸ்டிலும் தோற்று ஒயிட்வாஷ் செய்யப்பட்டு 0-4 என்ற கணக்கில் தொடரை இழந்தது. இரண்டு 20 ஓவர் போட்டியில் ஒரு ஆட்டத்தில் தோற்றது. மற்றொரு ஆட்டத்தில் தோற்றது.

மோசமான விமர்சனத்துக்கு ஆளாகி இருக்கும் இந்திய அணி 3 நாடுகள் போட்டியிலாவது சிறப்பாக ஆடும் என்று எதிர்பார்க்கப்பட்டது. ஆனால் தொடக்க ஆட்டத்திலேயே தோற்றது வேதனை அளிக்கிறது. இதனால் நாளைய ஆட்டத்தில் சிறப்பாக விளையாடி இலங்கையை வீழ்த்த வேண்டிய நெருக்கடி இந்தியாவுக்கு உள்ளது.

கடந்த போட்டியில் கேப்டன் டோனி அதிரடி வீரர் ஷேவாக்கை நீக்கினார். அவரது இந்த முடிவு அனைவருக்கும் ஆச்சரியத்தை அளித்தது. இதனால் எந்த பலனும் இல்லாமல் போனது. இதன்மூலம் அவருக்கும், ஷேவாக்கும் இடையே கருத்து வேறுபாடு இருப்பது உறுதியானது. நாளைய ஆட்டத்தில் ஷேவாக் இடம் பெறலாம் என்று எதிர்பார்க்கப்படுகிறது.

இதேபோல ஜாகீர்கானும் நாளைய ஆட்டத்தில் விளையாடுவார் என்று தெரிகிறது. தனது 100-வது சதத்தை நிறைவு செய்ய முடியாமல் திணறும் தெண்டுல்கர் 3 நாடுகள் போட்டியிலாவது சதம் எடுப்பாரா என்று அனைவராலும் எதிர்பார்க்கப்பட்டு வருகிறது. இந்திய அணி பேட்டிங், பந்துவீச்சு, பீல்டிங் ஆகிய 3 துறைகளிலுமே மோசமாக இருந்து வருகிறது.

உலக சாம்பியனான இந்தியா இதில் இருந்து மீண்டு சிறப்பாக ஆட வேண்டிய நிலையில் உள்ளது. இலங்கை அணி சமீபத்தில் தென்ஆப்பிரிக்காவிடம் தொடரை இழந்தாலும் கடைசி 2 போட்டியில் சிறப்பாக ஆடி வெற்றி பெற்றது. ஜெயவர்த்த னேவுக்கு மீண்டும் கேப்டன் பதவி கிடைத்து உள்ளது.

அவரது தலைமையிலான இலங்கை அணியை வீழ்த்த இந்திய அணி கடுமையாக போராட வேண்டும். இந்த ஆட்டம் இந்திய நேரப்படி காலை 9.50 மணிக்கு தொடங்குகிறது. ஸ்டார் கிரிக்கெட்டில் இந்த போட்டி நேரடியாக ஒளிபரப்பு செய்யப்படுகிறது.

இரு அணி வீரர்கள் வருமாறு:- இந்தியா: டோனி (கேப்டன்), தெண்டுல்கர், ஷேவாக், காம்பீர், வீராட் கோலி, ரோகித்சர்மா. ரெய்னா, ஜாகீர்கான், அஸ்வின், பிரவீண்குமார், ரவிந்திரஜடேஜா, வினய் குமார், இர்பான் பதான், மனோஜ் திவாரி, ராகுல் சர்மா, உமேஷ்யாதவ், பார்த்தீவ் பட்டேல்.

இலங்கை: ஜெயவர்த்தனே (கேப்டன்), மேத்யூஸ் (துணை கேப்டன்), உபுல்தரங்கா, தில்சான், சங்ககரா, குலசேகரா, சண்டிமால், மலிங்கா, தமிகா பிரசாத், செனாயசே, திரிமானே, வெலுகேந்திரா, ஹேராத், மெகரூப், பெனரரா.

மாலைமலர்