விஜயகாந்த், பண்ருட்டியாரின் முதுகில் வைத்த கண் வாங்காமல்..

விஜயகாந்த், பண்ருட்டியாரின் முதுகில் வைத்த கண் வாங்காமல்..
on Tuesday, February 7, 2012 | 1 Comment



விஜயகாந்த், சட்டசபையில் முதல்வர் ஜெயலலிதாவுடன் நேரடியாக மோதியுள்ள நிலையில், அவர்கள் கட்சித் தலைமையின் கோபம், ஜெயலலிதாவுக்கு அடுத்தபடியாக, உள்வீட்டுக்குள்ளேயே பாய்ந்திருக்கிறது என்கிறார்கள் தே.மு.தி.க. வட்டாரங்களில்.கட்சியின் துணைத் தலைவர் பண்ருட்டி ராமச்சந்திரன்தான் கேப்டனின் கோபப் பார்வையில் சிக்கியிருப்பவர் என்றும் கூறுகிறார்கள் அவர்கள்.

அ.தி.மு.க.-வுடன் அதிகாரபூர்வமாக கூட்டணியில் இருந்து விலகியாயிற்று என்ற நிலையில், அடுத்து எப்படியான நடவடிக்கைகளை எடுப்பது என்று கட்சி முக்கியஸ்தர்களை அழைத்து நேற்று (ஞாயிற்றுக்கிழமை) ஆலோசனை நடத்தியிருக்கிறார் விஜயகாந்த். இந்தக் கூட்டத்துக்கு துணைத் தலைவர் பண்ருட்டி ராமச்சந்திரன் ஆப்சன்ட்.கேப்டன் அழைக்கவில்லையா, அல்லது அழைத்தும் அவர் வரவில்லையா என்பது குழப்பமாக உள்ளது. இரு விதமாகவும் சொல்கிறார்கள்.


அ.தி.மு.க. பவர் சென்டராக சசிகலா இருந்ததுவரை அ.தி.மு.க. பக்கமே பார்வையை செலுத்தாத பண்ருட்டியார், இப்போது அந்தப் பக்கம் கனிவுப் பார்வையைப் பார்க்க தொடங்கியிருக்கிறார் என்றும், மிகச் சமீபத்தில் பண்ருட்டியாரை நேரில் சந்தித்தார் செங்கோட்டையன் என்றும் இரு தே.மு.தி.க. எம்.எல்.ஏ.க்களும் கேப்டனிடம் வத்தி வைத்திருக்கிறார்கள் என்றார் தே.மு.தி.க. பிரமுகர் ஒருவர்.கட்சியில் சமீபகாலமாக விஜயகாந்துடன் அதிக நெருக்கத்தில் உள்ள இரு எம்.எல்.ஏ.க்கள், பண்ருட்டியார் மீது பெரிய லிஸ்ட்டாகவே குற்றச்சாட்டுகளை வைத்திருக்கிறார்களாம். அவர்களது பிரதான குற்றச்சாட்டு, முதல்வர் ஜெயலலிதாவுக்கும் பண்ருட்டியாருக்கும் இடையே வெளியே தெரியாத அன்டர்ஸ்டான்டிங் உள்ளது என்பதே.


பண்ருட்டி ராமச்சந்திரன் ஆளுனர் உரைக்குப்பின் பேசியபோது, “எடுத்ததற்கெல்லாம் எதிர்ப்புத் தெரிவித்து வெளிநடப்புச் செய்வது சரியான எதிர்க்கட்சியாக இருக்க முடியாது. ஆளுநர் உரையில் குறைகள் இருக்கும் அதே நேரத்தில்ஈ நிறைகளும் உள்ளன. பொறுப்புள்ள எதிர்க்கட்சிகள் நிறைகளை பாராட்ட தயங்கக்கூடாது” என்ற டோனில் பேசியிருந்தார்.

தே.மு.தி.க.-வில் இருந்து சில எம்.எல்.ஏ.க்கள் அ.தி.மு.க. பக்கம் தாவுவதற்கான முன்னேற்பாடுகள் நடப்பதாக கடந்த சில வாரங்களாகவே செய்திகள் அடிபட்டுக் கொண்டுள்ளன. நாம் அறிந்தவரை, நெருப்பு இல்லாமல் புகை வரவில்லை. அது விஜயகாந்த்துக்கும் நன்றாகவே தெரியும். விஜயகாந்த்தின் வாட்ச் லிஸ்டில் சில எம்.எல்.ஏ.க்கள் ஏற்கனவே உள்ளனர். அவர்களில் இருவருக்கு நள்ளிரவுக்குப்பின் போனில் ‘அர்ச்சனை’ வழங்கப்பட்ட சம்பவமும் உள்ளது.

அதெல்லாம் ஏற்கனவே நடந்துவரும் விவகாரம். அதில் புதிய டெவலப்மென்ட் என்னன்றால், ரெடி-டு-ஜம்ப் குரூப்புக்கு கட்சியின் துணைத் தலைவரே தலைமை வகிக்கிறாரா என்ற சந்தேகம் ஏற்பட்டுள்ளதுதான்.விஜயகாந்துடன் தற்போது நெருக்கமாக உள்ள எம்.எல்.ஏ. ஒருவர், பண்ருட்டியார் பற்றி தலைவரிடம் வத்தி வைத்தபோது, “நம்ம கட்சி எம்.எல்.ஏ.க்களிலேயே அ.தி.மு.க.-வுடன் பூர்வ ஜென்ம தொடர்புகள் அதிகம் உள்ளவர் பண்ருட்டியார்தான் என்பதை எப்போதும் ஞாபகத்தில் வைத்திருங்கள்” என்றாராம்.

இந்த கீ கொடுத்தல்களின் பின் விஜயகாந்த், பல்லைக் கடித்தபடி பண்ருட்டியாரின் முதுகில்…. (வாக்கியம் முடியுமுன், அவசரப் படாதீர்கள்) …குத்த நினைக்கும் கட்சிக்காரர்களை கண்டிப்பாரா, அரவணைப்பாரா என்பது விரைவில் தெரிந்துவிடும்.

தகவல் பகிர்வு - தமிழ் வாரஇதழ் செய்திகள், ARRKAY.BLOGSPOT: -:

நடக்கட்டும் நடக்கட்டும்