மலை கிராமங்களின் அடுத்த "மழைக்கட்டு' யார்?வினோத தேர்தலுக்கு தயாராகும் திண்டுக்கல்.

மலை கிராமங்களின் நம்பிக்கை நாயகன் "மழைக்கட்டு' இறந்ததால், அடுத்தது யார் என்பதை அறிய, திண்டுக்கல் மாவட்டத்தில் வினோத தேர்தல் நடக்க உள்ளது.

திண்டுக்கல் மாவட்டம், கொடைக்கானல் மலைப்பகுதியைச் சுற்றிய பகுதிகள் மேல் மலை கிராமங்களாகவும், தாண்டிக்குடியைச் சுற்றிய பகுதிகள் கீழ் மலை கிராமங்களாகவும் பிரிக்கப்பட்டுள்ளன. நாகரிகம் குடியேறினாலும், இன்றும் மலை கிராமங்களில் பாரம்பரிய முறை பின்பற்றப்படுகிறது. அந்த பாரம்பரியத்தின் முக்கிய பொறுப்புகளில் ஒன்று தான், "மழைக்கட்டு'.மழைக்கட்டாக பொறுப்பேற்பவர் நினைத்தால், மழை பெய்ய வைக்கவும், நிறுத்தவும் முடியும் என்பது, மலை கிராமங்களின் நம்பிக்கை. பண்டைய மரபுப்படி, பழங்குடியினர் தான் இப்பொறுப்பை ஏற்க முடியும். ஒரு முறை பொறுப்பு ஏற்றால், இறக்கும் வரை ஒட்டு மொத்த மலை கிராமத்திற்கும், அவர் தான், "மழைக்கட்டு'. கிராமங்களில் மழை இல்லாத சமயத்தில், தாண்டிக்குடியில் உள்ள தலைமை பட்டக்காரரை (முக்கிய பொறுப்பாளர்) அணுகி, கிராம மக்கள் முறையிடுவர். அவர் அறிவுறுத்தலின்படி, "மழைக்கட்டு'வை சந்திக்க வேண்டும். தன்னை சந்திக்க வருவோரை, "மழைக்கட்டு' வசை பாடி விரட்டுவாராம்.அவர்கள் அதை பொறுத்துக் கொண்டு, "மழைக்கட்டு'வை சமரசம் செய்து, கிராமத்திற்கு அழைத்துச் செல்ல வேண்டும். அவர் கிராமத்திற்கு வந்து, வனதேவதைகளை வழிபட்டதும், மழை பெய்யும் என்பது மலை கிராமங்களின் நம்பிக்கை.

கீழ் மலையைச் சேர்ந்த கடுகுதடி புதூரின் பழங்குடியினரே, தொடர்ந்து மூன்று தலைமுறையாக, "மழைக்கட்டு' பொறுப்பை பெறுகின்றனர். இறுதியாக இப்பொறுப்பில் இருந்த பழனிச்சாமி, கடந்த வாரம் இறந்தார்.பழனிச்சாமிக்கு மகன் ஒருவர் இருந்தாலும், அவருக்கு, "மழைக்கட்டு' முறைகள் தெரியவில்லை. இதனால் அடுத்த,"மழைக்கட்டு' யார் என்ற எதிர்பார்ப்பு, கிராமங்களில் எழுந்துள்ளது. விரைவில் அடுத்த "மழைக்கட்டு'வை தேர்வு செய்ய, வினோத தேர்தல் நடக்க உள்ளது.

இது தொடர்பாக கிராம மக்கள் கூறியதாவது:

கோகுலகிருஷ்ணன் (பூலத்தூர்): நான்கு ஆண்டுகளுக்கு முன் மழை பெய்யாத போது, பட்டக்காரரிடம் முறையிட்டோம். அவர் அறிவுறுத்தலின் படி, "மழைக்கட்டு' வந்ததால், மழை பெய்தது. முன்னோரின் வாக்குப்படி, இன்றும் இந்த நடைமுறையை பின்பற்றுகிறோம்.

கோபால் (மறைந்த "மழை கட்டு' மகன்): என் அப்பாவிடம் இருந்த சக்தியை கற்க தவறிவிட்டேன். என்னால் அடுத்த, "மழைக்கட்டு' பொறுப்பை ஏற்க முடியாது. இறுதி முடிவு பட்டக்காரர் வசம் உள்ளது.

மங்களகாந்தி (பட்டக்காரர், தாண்டிக்குடி): அடுத்த, "மழைக்கட்டு' யார் என்பதை விரைவில் தேர்வு செய்ய உள்ளோம். அதே கிராமத்தின் பழங்குடியினரை ஒன்றுகூட வைத்து, வனதேவதை அருள் பெற்று, அதில் யாரை தேர்வு செய்கிறார்களோ, அவர் தான் அடுத்த, "மழைக்கட்டு'.

தினமலர்