ஆனைமலை மாசாணியம்மன் கோவிலில் நள்ளிரவில் மயான பூஜை

ஆனைமலை மாசாணியம்மன் கோவிலில் நள்ளிரவில் மயான பூஜை: ஆயிரக்கணக்கான பக்தர்கள் பங்கேற்பு

தமிழகத்தின் பிரசித்தி பெற்ற வேண்டுதல் தலங்களில் ஆனைமலை மாசாணியம்மன் கோவிலும் ஒன்றாகும். இங்கு குண்டம் திருவிழா ஒவ்வொரு ஆண்டும் தை அமாவாசை அன்று தொடங்கும். இந்த ஆண்டுக்கான குண்டம் திருவிழா கடந்த 23-ந் தேதி தொடங்கியது.

விழாவின் சிகர நிகழ்ச்சியான மயானபூஜை நேற்று நள்ளிரவு ஆழியாறு ஆற்றங்கரையில் உள்ள மயான எரிமேடையில் நடந்தது. இதற்காக மயான மேடையில் முறைதாரர்கள் அம்மனின் உருவாரத்தை அமைத்திருந்தனர். மயான பூஜையையொட்டி நள்ளிரவு 1 மணிக்கு மாசாணியம்மன் கோவிலில் சிறப்பு பூஜை நடந்தது.

அதைத்தொடர்ந்து முறைதாரர் ஏ.பி.மனோகரன் தலைமையில் அம்மன் அருளாளிகள் அருண், குப்புசாமி, மற்றும் நூற்றுக்கணக்கான முறைதாரர்கள் மயான எரி மேடைக்கு வந்தனர். அங்கு அம்மன் உருவாரத்துக்கு சிறப்பு பூஜை செய்தனர்.

அதன் தொடர்ச்சியாக அதிகாலை 2-30 மணிக்கு பம்பை மேளம் முழங்க அம்மன் அருளாளி அருண் அருள் வந்து ஆடி உருவாரத்தை சிதைத்தார். அதிலிருந்த எலும்புகளை வாயில் கவ்வியபடி ஆக்ரோஷமாக ஆடினார். பின்னர் பட்டுச் சேலையில் பிடிமண் எடுத்துக் கொண்டு உப்பாற்றங்கரை வந்தனர்.

நள்ளிரவில் நடைபெற்ற மயான பூஜையில் ஆயிரக்கணக்கான பக்தர்கள் கலந்து கொண்டனர். பூஜையில் கலந்த கொண்ட பெண் பக்தர்கள் அம்மன் அருள் வந்து ஆடினர். அங்கு இன்று காலை 7 மணி அளவில் கும்பஸ்தாபனமும் அதைத்தொடர்ந்து குண்டம் இறங்கும் பக்தர்களுக்கு கங்கணம் கட்டும் நிகழ்ச்சியும் நடந்தது. இன்று மாலை மகா பூஜை நடக்கிறது.

நாளை (செவ்வாய்க்கிழமை) காலை 10 மணிக்கு குண்டம் கட்டுதலும், மாலை 6 மணிக்கு சித்திரை தேர் வடம் பிடித்தலும், அம்மன் வீதி உலாவும் நடைபெறுகிறது. நாளை நள்ளிரவு 10 மணிக்கு குண்டம் பூ வளர்க்கப்படும். 8-ந் தேதி காலை பக்தர்கள் குண்டம் இறங்குவார்கள்.

குண்டம் இறங்கினால் நினைத்தது நிறைவேறும் என்பது ஐதீகமாக இருந்து வருகிறது. மாவட்ட போலீஸ் சூப்பிரண்டு உமா, துணை சூப்பிரண்டு பழனிசாமி தலைமையில் இன்ஸ்பெக்டர் சுப்பிரமணியம் தலைமையில் 200 போலீசார் பாதுகாப்பு பணியில் ஈடுபட்டனர்.

மாலைமலர்