அமெரிக்க அதிபர் பதவி ஏற்பு : உலகமெங்கும் கோலாகலம்

வாஷிங்டன் : உலகமே ஆவலுடன் எதிர்பார்க்கும் அமெரிக்க அதிபர் பதவி ஏற்பு விழா இன்று வெள்ளை மாளிகையில் நடைபெற உள்ளது. பாரக் ஒபாமா அதிபராக பதவி ஏற்க உள்ளார். இவர் அமெரிக்காவின் முதல் ஆப்ரோ-அமெரிக்க அதிபராவார். பதவி ஏற்பு விழாவை முன்னிட்டு அமெரிக்கா விழாக்கோலம் பூண்டுள்ளது.


இந்திய நேரப்படி இரவு 10.30 மணிக்கு பதவி ஏற்பு விழா துவங்குகிறது. வெள்ளை மாளிகை பதவி ஏற்பு விழாவில் 20 லட்சத்திற்கும் மேற்பட்ட மக்கள் கலந்து கொள்வார்கள் என எதிர்பார்க்கப்படுகிறது. பதவி ஏற்பு விழாவிற்கு முன் பாரக் ஒபாமா தனது குடும்பத்தினருடன் செயின்ட் ஜான் சர்ச்சிற்கு செல்வார். பின்னர் வெள்ளை மாளிகைக்கு சென்று அங்கு முன்னாள் அதிபருக்கு விடை கொடுத்த பின் பதவி ஏற்பு விழா நடக்கும் இடத்திற்கு செல்வார். முதலில் துணை அதிபர் ஜோ பிடன் பதவி ஏற்ற பின் ஒபாமா ஒரு கையை மேலே உயர்த்தியும் மற்றொரு கையை பைபிள் மீது வைத்தும் பதவி ஏற்பார். தலைமை நீதிபதி ஜான் ராபர்ட்ஸ் பதவி ஏற்பு பிரமாணம் செய்து வைப்பார்.


அமெரிக்காவின் புதிய அதிபர் பதவி ஏற்பதை முன்னிட்டு வெள்ளை மாளிகையில் உள்ள கட்டில், நாற்காலி, தரை விரிப்புகள் உள்பட அனைத்துமே புதிதாக மாற்றப்பட்டுள்ளன. ஆப்ரோ-அமெரிக்கரான ஒபாமா இன்று நடைபெறும் கோலாகல பதவி ஏற்பு விழாவில் அதிபராக பதவி ஏற்கிறார். இதையடுத்து அவர் வெள்ளை மாளிகையில் தனது குடும்பத்தினருடன் குடியேறுவார். இதற்கு முன் இருந்த மாளிகையின் உள் அலங்காரங்கள் மற்றும் பொருட்கள் அனைத்தும் ஒபாமா குடும்பத்திற்கு ஏற்றபடி மாற்றப்பட்டுள்ளன. வெள்ளை மாளிகையில் குடியேறுவதற்காக வரும் ஒபாமா குடும்பத்தினரின் பொருட்கள் 3 லாரிகளில் கொண்டு வரப்படுகிறது. இந்த பொருட்களை எடுத்து வைக்கும் பணி இன்று துவங்குகிறது. இதற்காக பல முறை ஒத்திகை பார்க்கப்பட்டுள்ளது. மொத்தம் 6 மணி நேரத்திற்குள் இந்த பணி நிறைவு பெறும். இந்த பணியை வெள்ளை மாளிகையில் இருக்கும் 93 பணியாளர்கள் ஈடுபட உள்ளனர்.