ராணுவ தளபதி பிறந்த தேதி சர்ச்சை : பிப்.3-ல் சுப்ரீம் கோர்ட் விசாரணை

ராணுவ தளபதி பிறந்த தேதி சர்ச்சை : பிப்.3-ல் சுப்ரீம் கோர்ட் விசாரணை



புதுடெல்லி: ராணுவ தலைமை தளபதி வி.கே.சிங்கின் பிறந்த தேதி தொடர்பான வழக்கு, வரும் 3-ம் தேதி சுப்ரீம் கோர்ட்டில் விசாரணைக்கு வருகிறது. ராணுவ தலைமை தளபதி வி.கே.சிங், 1950-ம் ஆண்டு மே 10-ம் தேதி பிறந்ததாக சில ஆவணங்களிலும் 1951-ம் ஆண்டு மே 10-ம் தேதி பிறந்ததாக வேறு சில ஆவணங்களிலும் பதிவாகியுள்ளது. ராணுவ அமைச்சகம், 1950-ம் ஆண்டையே வி.கே.சிங் பிறந்த ஆண்டாக கணக்கில் எடுத்துக்கொண்டு இதுவரை அவருக்கு பதவி உயர்வு வழங்கி வந்தது.

இதன்படி, வரும் மே 31-ம் தேதியுடன் வி.கே.சிங், தலைமை தளபதி பதவியில் இருந்து ஓய்வுபெற வேண்டும். இந்நிலையில், பழைய ஆவணங்களை காட்டி தனது பிறந்த ஆண்டை 50-ல் இருந்து 51 ஆக மாற்ற வேண்டும் என ராணுவ அமைச்சகத்துக்கு வி.கே.சிங் கோரிக்கை வைத்தார். அதை ராணுவ அமைச்சகம் நிராகரித்துவிட்டது. மத்திய அரசின் தலைமை வக்கீல் ஆலோசனை அடிப்படையில் மத்திய அரசு இந்த முடிவை எடுத்தது. இதை எதிர்த்து சுப்ரீம் கோர்ட்டில் வி.கே.சிங் மனு தாக்கல் செய்தார். 1951 மே 10-ம் தேதியை தனது பிறந்த தேதியாக அறிவிக்க வேண்டும் என மனுவில் கூறியிருந்தார்.

இதற்கிடையே, இதே பிரச்னைக்காக ஓய்வு பெற்ற ராணுவ அதிகாரிகள் சங்கமும் சுப்ரீம் கோர்ட்டில் தனியாக ஒரு வழக்கு தாக்கல் செய்தது. இந்த வழக்கை சுப்ரீம் கோர்ட் தள்ளுபடி செய்து உத்தரவிட்டது. பிரச்னையில் சம்பந்தப்பட்ட ராணுவ தளபதியே தனியாக வழக்கு தொடர்ந்திருப்பதால் இதில் பொதுநல வழக்கு தேவையில்லை என சுப்ரீம் கோர்ட் கருத்து தெரிவித்திருந்தது. இது தொடர்பாக புதிய வழக்குகள் தாக்கல் செய்யப்பட்டால் அவற்றை ஆரம்ப நிலையிலே ரத்து செய்ய சுப்ரீம் கோர்ட் பதிவாளருக்கு உத்தரவிட்டது.

அதே நேரத்தில் வி.கே.சிங் தாக்கல் செய்த மனு மீது எப்போது விசாரணை நடத்தப்படும் என்பதை சுப்ரீம் கோர்ட் தெரிவிக்கவில்லை. இந்நிலையில் வி.கே.சிங் மனு மீது வரும் 3ம் தேதி சுப்ரீம் கோர்ட் விசாரணை நடத்தும் என டெல்லி வட்டாரங்கள் தெரிவித்தன.