குடியரசு தின விழா

புதுடில்லி: நாட்டில் குடியரசு தினம் என்றால் எவ்வித அசம்பாவிதமும் இல்லாமல் நடக்க வேண்டும் என பல முனை பாதுகாப்பு ஏற்பாடுகள் இருக்கும். ஆனால் இந்த முறை எந்தவொரு பயங்கரவாத அமைப்புகளிடம் இருந்தும் எவ்வித மிரட்டலும் இல்லை என்ற ஒரு திருப்தியுடன் பாதுகாப்பு படையினருக்கு சிரமம் இல்லாமல் போனது என்ற நிம்மதி கிடைத்திருக்கிறது. இன்றைய குடியரசு தின விழாவில் முதல் நிகழ்ச்சியாக பிரதமர் மன்மோகன்சிங் டில்லியில் உள்ள அமர்ஜவான் ஜோதியில் அஞ்சலி செலுத்தினார். குதிரைபடை சூழ ஜனாதிபதி பிரதீபாட்டில் ராஜ்பத்துக்கு அழைத்து வரப்பட்டார். இவருடன் சிறப்பு விருந்தினரான தாய்லாந்து பிரதமர் யுங்லுக் ஷனாவத்ரா வந்தார். சரியாக 10 மணிக்கு துப்பாக்கி குண்டுகள் முழங்கிட ஜனாதிபதி தேசிய கொடியேற்றி வைத்தார். தமிழகம் முழுவதும் மாவட்ட தலைநகரங்களில் அந்தந்த மாவட்ட கலெக்டர்கள் தேசிய கொடியை ஏற்றி வைத்தனர்.

மிரட்டல் இல்லாமல் நடக்கும் குடியரசு தினம்: நாட்டின் 63 வது குடியரசு தினத்தை முன்னிட்டு டில்லியில் ஜனாதிபதி பிரதீபாபாட்டிலும், அந்தந்த மாநிலத்தில் கவர்னரும் கொடியேற்றி வைக்கின்றனர்.இதற்கான அணிவகுப்பு ஒத்திகை தொடர்ந்து நடந்தது. இந்த முறை குறிப்பிடத்தக்க எவ்வித அச்சுறுத்தலும் இல்லை. இதனால் டில்லி உள்பட எந்தவொரு மாநிலத்திற்கும் சிறப்பு அலர்ட் எதுவும் அறிவிக்கப்படவில்லை. அந்தந்த மாநிலம் வழக்கமான அதிகபட்சம் பாதுகாப்பு பணியில் ஈடுபட்டு கொள்ளுமாறு கேட்டு கொள்ளப்பட்டுள்னர். நக்சல் பாதித்த வட கிழக்கு மாநிலம் மற்றும் காஷ்மீரில் கூடுதல் கவனம் எடுத்து கொள்வது நல்லது என்றும் உள்துறையினர் அறிவுறுத்தியுள்ளனர். இதற்கு முன்னர் பல ஆண்டுகள் தொடர்ந்து குறிப்பிட்டு சொல்லும் அளவிற்கு பயங்கரவாத அமைப்புகளிடம் இருந்து மிரட்டல் விடுக்கப்பட்டிருக்கும் . இதன் அடிப்படையில் படு பயங்கர பாதுகாப்பு ஏற்பாடுகள் இருக்கும். இந்த முறை அது போன்ற பெரும் சிரமம் இல்லை என்பது மகிழ்வுக்குரிதே.

இருப்பினும் முன்னெச்சரிக்கை நடவடிக்கையாக குடியரசு தின அணிவகுப்பு செல்லும் பாதையில் ரகசிய கண்காணிப்பு காமிரா, துணை ராணுவ படையினர், தேசிய பாதுகாப்பு படையினர் ஆங்காங்கே பாதுகாப்பு பணியில் ஈடுபட்டுள்ளனர்.


அமர்ஜவான் ஜோதியில் பிரதமர் அஞ்சலி: குடியரசு தின விழாவின் முதல் துவக்க நிகழ்ச்சியாக பிரதமர் மன்மோகன்சிங் மலர்வளையம் வைத்து சல்யூட் அடித்து மரியாதை செலுத்தினார். முன்னதாக அவரை பாதுகாப்பு துறை அமைச்சர் ஏ.கே., அந்தோணி வரவேற்றார். இந்நேரத்தில் பாதுகாப்பு படையினர் துப்பாக்கியால் வானத்தை நோக்கி சுட்டனர். பின்னர் ராஜ்பத்தில் நடந்த விழாவில் ஜனாதிபதியை வரவேற்றார். சரியாக 10 மணிக்கு ஜனாதிபதி பிரதீபா பாட்டீல் தேசிய கொடியை ஏற்றி வைத்து மரியாதை செலுத்தினார். தொடர்ந்து அவர் வீர தீர செயல்கள் புரிந்தவர்களுக்கு பாராட்டும், பதக்கமும் வழங்கி கவுரவித்தார், தொடர்ந்து வீரர்களின் அஅணிவகுப்பு மற்றும் கலை நிகழ்ச்சிகள் நடந்தன. வானத்தில் வட்டமிட்டபடி ராணுவ ஹெலிகாப்டர்கள் மலர் தூவின.


கைத்தட்டி ரசித்த சோனியா : இந்த அணிவகுப்பில் பல்வேறு மாநிலங்கள் மற்றும் அரசு துறை சார்பில் 23 அணிவகுப்பு வாகனங்கள் வந்தன. பல்வேறு மாநிலம் சார்பில் அங்குள்ள பாரம்பரிய கலை நுட்பத்தை பறைசாற்றும் வகையில் கரகாட்டம் , பொய்க்கால் குதிரை ஆட்டம் உள்பட பல நிகழ்ச்சிகள் கவர்ந்தன. இதில் மேள தாளத்துடன் கரகாட்டம் ஆடியபோது அரங்கமே மகிழ்ந்தது. பிரதமரம் மன்மோகன்சிங், மத்திய அமைச்சர்கள் நாராயணசாமி காங்., தலைவர் சோனியா, சபாநாயகர் மீராகுமார் உள்பட பலரும் தன்னை மறந்து கைத்தட்டி மகிழ்ச்சியும், பாராட்டும் தெரிவித்தனர்,



தமிழகத்தி்ல் குடியரசு கொண்டாட்டம்: தமிழகத்தில் சென்னை மெரீனா கடற்கரையில் நடந்த விழாவில் கவர்னர் ரோசய்யா தேசிய கொடியேற்றி வைத்தார். முதல்வர் ஜெ., மற்றும் அமைச்சர்கள் பங்கேற்றனர். விழாவில் வீர தீர செயல்கள் புரிந்த தீயணைப்பு அலுவலகர்கள், காவல்துறையினருக்கு பதக்கம் மற்றும் விருதுகளை வழங்கினார். காந்தியடிகள் காவலர் விருது 4 போலீஸ் அதிகாரிகளுக்கு வழங்கப்பட்டது. சமீபத்திய எழிலக தீ விபத்தில் சிக்கி உயிரிழந்த மற்றும் காயமுற்ற தீயணைப்பு அலுவலர் மற்றும் அவரது குடும்பத்தினரிடம் அண்ணா விருது வழங்கி கவுரவிக்கப்பட்டது. தொடர்ந்து மாணவ, மாணவிகளின் கலைநிகழ்ச்சிகள் நடந்தது. சென்னை ஐகோர்ட்டில் நடந்த விழாவில் தலைமை நீதிபதி இக்பால் கொடியேற்றி வைத்தார். விழாவில் நீதீபதிகள், வக்‌கீல்கள், மற்றும் கோர்ட் அலுவலர்கள் பலர் பங்கேற்றனர்.


15 ஆயிரம் பேர் பாடிய ஜன, கன மன: இந்திய திருநாட்டின் தேசியகீதமான ஜனகனமன என்ற பாடலை 15 ஆயிரம் பேர் ஒருசேர பாடி கின்னஸ் சாதனை புரிந்தனர். அவுரங்காபாத் விளையாட்டு மைதானத்தில் நடந்த இந்த நிகழ்ச்சியில் 15 ஆயிரம் பேர் கூடி நின்று பாடினர்.

தினமலர்

15 ஆயிரம் பேர் பாடிய ஜன, கன மன: இந்திய திருநாட்டின் தேசியகீதமான ஜனகனமன என்ற பாடலை 15 ஆயிரம் பேர் ஒருசேர பாடி கின்னஸ் சாதனை புரிந்தனர். அவுரங்காபாத் விளையாட்டு மைதானத்தில் நடந்த இந்த நிகழ்ச்சியில் 15 ஆயிரம் பேர் கூடி நின்று பாடினர்