பொற்கோவிலை அவமதித்த அமெரிக்க டி.வி. தொகுப்பாளர் மீது வழக்கு

பஞ்சாப் மாநிலம் அமிருதசரஸில் உள்ள பொற்கோவில் குறித்து தரக்குறைவாகப் பேசிய அமெரிக்க டி.வி. நிகழ்ச்சித் தொகுப்பாளர் ஜே லெனோ மீது அமெரிக்க வாழ் இந்தியர் ரந்தீப் தில்லான் நீதிமன்றத்தில் வழக்குத் தொடர்ந்துள்ளார்.

கலிஃபோர்னியா நீதிமன்றத்தில் தாக்கல் செய்துள்ள மனுவில் சீக்கிய மதத்தினரின் உணர்வுகளைப் புண்படுத்தும் வகையில் ஜே லெனோ பேசியுள்ளார் என்றும் குறிப்பிட்டுள்ளார்.

என்பிசி தொலைக்காட்சி சேனலில் ""தி டுநைட் ஷோ'' எனப்படும் நிகழ்ச்சியில் அமெரிக்க தொலைக்காட்சி தொகுப்பாளர் ஜே லெனோ பேசுகையில், அமிருதசரஸில் உள்ள பொற்கோயில், அமெரிக்க அதிபர் தேர்தலில் போட்டியிடும் மிட் ரோம்னியின் கோடை வாசஸ்தல இல்லம் என்று குறிப்பிட்டார்.

கடந்த 19-ம் தேதி ஜே லெனோவின் கருத்து டி.வி.யில் ஒளிபரப்பானது. இந்த விவகாரம் குறித்து கடும் கண்டனம் தெரிவித்ததோடு, இது தொடர்பாக அமெரிக்க வெளியுறவு அமைச்சகத்துக்கு இந்தியாவின் எதிர்ப்பை தெரிவிக்குமாறு அமெரிக்காவுக்கான இந்திய தூதர் நிருபமா ராவை, வயலார் ரவி கேட்டுக் கொண்டார். ஆனால் இந்த விவகாரத்தை அமெரிக்கா பெரிதாக எடுத்துக் கொள்ளவில்லை.

இந்நிலையில் கலிஃபோர்னியாவில் வழும் அமெரிக்க வாழ் இந்தியர் இது தொடர்பாக நீதிமன்றத்தில் வழக்கு பதிவு செய்துள்ளார். தனது மனுவில், ஜே லெனோ வேண்டுமென்றே மத உணர்வுகளைப் புண்படுத்தும் நோக்கில் பேசியுள்ளார். அதிலும் சீக்கியர்களின் புனிதத் தலம் குறித்து பேச வேண்டிய அவசியமே இல்லாத நிலையில் அவரது உள்நோக்கத்தைப் புரிந்து கொள்ள முடியும் என்று தில்லான் குறிப்பிட்டுள்ளார்.

இதற்கு முன்பு 2007-ம் ஆண்டு இதேபோல டி.வி. நிகழ்ச்சியில் சீக்கியர்களை காகிதத் தலையர்கள் என்று குறிப்பிட்டு பேசியதையும் தனது மனுவில் அவர் குறிப்பிட்டுள்ளார்.

இதனிடையே சீக்கிய உரிமைக் குழு ஒன்று காவல் துறையிடம் புகார் மனு தாக்கல் செய்துள்ளது. அதில் மத உணர்வுகளைப் புண்படுத்தும் வகையில் பொற்கோவில் குறித்து அவர் பேசியது கண்டனத்துக்குரியது. எனவே லெனோ மற்றும் என்பிசி மீது நடவடிக்கை எடுக்க வேண்டும் என்று புகாரில் குறிப்பிடப்பட்டுள்ளது.

தினமணி

தோழமைக்கு,
இந்தியா இதற்கு கண்டனம் தெரிவித்ததை அமெரிக்க அரசு கண்டு கொண்டதாக தெரியவில்லை. மேலும் நமது பல முக்கிய தலைவர்களை சோதனை என்ற பெயரில் அவமதிப்பு செய்தது போன்ற அநாகரீக செயல்களை அமெரிக்க செய்து வருகிறது.
வருந்த தக்காதே!